احــنا بتــوع التماثيــــل ..... 2

اتمسوا بالخير .. 

هنكمل حكاية التماثيل 

  

حكينا ازاى ان الخديوى اسماعيل 
ف وسط خطته الطموحة لجعل القاهرة باريس الشرق 
عمل حركة عمران واسعة 
وخلى وسط البلد حاجة ابهة وآخر ألاجة ..

ومن ضمن الفوكيرات ان الميادين تتزين بتماثيل 
لشخوص هامة من اسرة محمد على 
وكمان من رجال حاشيته المخلصين .. 
ومن ضمن العالم دى الحاج لاظوغلى

والحاج بقى اسمه .. محمد لاظ 
 وبيقولوا ان أوغلى دى منصبه .. او رتبة ادارية كدا 
والراجل اشتغل بهمة ونشاط عند محمد على

وفضل يترقى لحد ما بقى دراعه اليمين
وشوفوا انتوا بقى لما حد يبقى ف المكانة دى
عند الحاج سنكفولة يبقى ملة جنس اهله ايه ف الأفترا ؟

 

وقيل كمان 
ان مذبحة القلعة اللى اتعملت للمماليك سنة 1811
كانت على يده وبترتيبه وتخطيطه 
مش بس كدا

دى تمت بكل سرية وكتمان 
لدرجة ان ولاد محمد على المقربين 
زى طوسون وابراهيم مكنوش يعرفوا 
ولاظوغلى بس هوه اللى عرف !

ولظلظ بقى قعد يخدم سيده محمد على تمأشر سنة

وبعدين ربنا خده وريح الكون منه سنة 1828 

والحمدلله كدا المفروض نردم عليه بقى وننساه 

ويغور ف داهية 

انما لأ .. أبضنننن

دا اسماعيل هييجى ف حمى التماثيل 

اللى انتابته دى ويقولهم عاوزين 

نعمل تمثال لأونكل لاظوغلى 

والجماعة ف القصر يقولوا حاضر 

وبعدين يقعوا ف حيص بيص

قالك الراجل مات من بتاع اربعين سنة يا بشر
وايامها التصوير
 كان لسه بيقول يا هادى ف مصر
 زائد انه مكنش بيحب حد يرسمه 
 بتاع امن بقى والحذر غلاب .. قوم ايه ؟

قالوا نأجل الحكاية شوية
وف يوم اتنين من عواجيز الحاشية 
كانوا قاعدين على قهوة ف خان الخليلى 
ونهارك سعيد يا درمللى باشا 
صباحك اسعد يا ثابت باشا

وقاعدين بيشربوا القهوة 
وفجأة لقوا واحد سقا معدى عليهم 
نسخة طبق الاصل من عم لاظوغلى .. 
 وكأنه فولة وانقسمت نصين 
الباشوات انذهلوا واستغربوا

وبصوا لبعض وكل واحد فهم التانى عاوز يقول ايه
واتفقوا مع السقا يجيلهم تانى يوم ف معاد 
ومكان محدد ودفعوله اللى فيه القسمة 
ولبسوه لبس قيافة

ولبسوه سيف شبه سيف لاظوغلى 
وعمامة زى عمامته ووقفوه يتصور
وبعتوا الصورة للأخ اللى حكينا عنه امبارح 
 جاكمار المثال الفرنسى 
وقالوله اعملنا زيه

بس واتعمل التمثال كما الصورة المبعوتة
ووصل مصر وتقام ف الميدان سنة 1872 
واتسمى المطرح على اسمه 
 وبقى ميدان لاظوغلى
 

 

 

 

على مبارك ف خططه بيقول ان الميدان 

كان الاول اسمه .. ميدان الناصرية 

وبعد كدا بقى اسمه ميدان الدواوين 

لأنه كان ملتقى الوزرات والمصالح الحكوميةلكن لما بسلامته شرف واتحط ف مركزه 
بقى ميدان لاظوغلى 
ومنذ هذا التوقيت لا التمثال اتشال 
ولا الميدان اتبدل حاله


 

وبيقولوا كمان انه الاول كان على مصطبة عادية
وبعدين اتحط على القاعدة العالية دى سنة 1893 
والحقيقة انه المفروض الواحد يزعل

ليه ؟
عشان المفروض شخصية وثخة زى دى 
لها باع طويل ف النظم الأمنية المرعبة 
وشغل البصاصين والتجسس والهم دا كله 

يفترض انه لا يتكرم ولا يبقاله تمثال 
ولا ميدان باسمه .. ! 



انما شوف بقى حكمة ربنا يا مؤمن 
انه يبقى الرجل المناسب
 ف المكان المناسب .. للإنحطاط

ويقعد التمثال دا ف أكتر حتة تليق له 
وتتوافق مع تاريخ وسيرة صاحبه 
واعماله الزفت والقطران والهباب 
حيث يقبع الآن مبنى حبايبنا الحلويييين 
والناس بتوقل ان التاريخ ظالم غالبا 
لكن احيان كتير بيبقى منتهى العدل والله

و ف كل مرة اتكلم عن الحتة دى واللى فيها 
افتكر الصورة دى واحطها 
عشان افكرنى انا وغيرى 
ان الحق دايما له ناسه
وان حتى ف مركز الشر المكثف ممكن تلاقى نقطة نور
 وناس بتحاول تلاقى للحق والعدل مكان ف الدنيا 
 ولو كانوا كام نفر قصاد جيوش 


 
والمثير والملفت للنظر بقى 
انه زى ما تمثال محمد على متشالش من مكانه 
رغم تعاقب الأحداث عليه 
 برضو تمثال لاظوغلى محدش فكر 
انه يزحزحه من مطرحه ..!

ودا ان دل فانما يدل على شىء واحد بس 
الا وهو 
ان دايما السلطة ف مصر 
تؤمن بمبدأ ان الوضاعة كنز لا يفنى 
وبتحب الجلادين اللى شبهها .. وبس


 وعلى صعيد ليس ببعيد انا زمان 
لما كنت بشوف التمثال دا كنت بفتكره محمد على 
اتارينى مكنتش غلطانة قوى 
اهو برضو من نفس سلسال الطغاة .. بس برتبة أقل

 
ننقل بقى ع التمثال اللى بعده 
ودا كمان كان من رجال الأسرة العلوية المخلصين 
وابتدى سكريتر صغنن بتوصية من قريبه 
بوغوص باشا احد كبار موظفى دولة محمد على 
كان سكريتر سنكفولة
وبعدين اشتغل عند ابراهيم ابنه ..
ثم قعد يتنقل ف الوظايف والوزرات 
ف عهد عباس وسعيد لحد عهد الخديوى اسماعيل
 وكان اول رئيس وزارء لمصر

الحقيقة ان الراجل خدم مصر وخدم نفسه 
وعاش فترات كتير من تاريخنا 
وبعدين ف النهاية استغنوا عنه وقعد يكتب مذكراته
وفضح الكل مسبش ف نفسه حاجة ومقالش 

 

وف سنة 1903 اتعمله تمثال 
واللى عمله واحد اسمه ... دنيس بيير بيش 
والكلام دا كان ف عهد عباس حلمى التانى 
والتمثال كانت قاعدته عليها كتابة بالفرنساوى

انكتب عليها تاريخ ميلاد ووفاة نوبار باشا  وتواريخ ولايته لرئاسة وزراء مصر  وكانت بالمناسبة ثلاث مرات  واتحط التمثال الشياكة فين يا ترى ... ؟     بيقولوا اتحط ف حديقة الشلالات  والأسكندرانية يفتونا فين الحتة دى تحديدا  اللى جنب جنينة الحيوانات يا ولاد ولا فين ؟؟ المهم .. نوبار كان محسوب ع الأسرة العلوية  اكتر منه ع الاجانب  والتمثال قعد معزز مكرم  لحد ما جاءت هادمة الذات مفرقة التمثالات  ثورة يوليو

 وقالوا ايه دا يع شيلوا البتاع دا من هنا
وحطوه ف المخازن 
واترمى البائس لسنوات طوال 
 لحد ما افرجوا عنه ف يوم ما 
ويقال انهم لما طلعوه م المخزن 
وحطوه ف حديقة كلية الفنون الجميلة ف الزمالك 

 

وقعد هناك ياما يا إيسامة 
لحد ما جددوا تياتروا محمد على

اللى بقى اسمه اوبرا اسكندرية حاليا 
قوم ايه ؟ 

اتكعبلت ف مقالة للأديب يوسف القعيد
بيحكى فيها عن تمثال نوبار
وبيحكى ازاى انه لما زار المطرح بعد تجديده 
لقى تمثال حلو قوى ف المدخل 
بيبص كدا لقاه نوبار باشا استغرب قوى !!

دوس للتكبير وتفاصيل أدق 
 
وسألهم ايه يا جماعة اللى جاب الراجل دا هنا 
دا لا فنان ولا له علاقة بالأوبرا ولا بالمزيكا 
ومش كان تمثال لسيد درويش مثلا 
هوه الأولى بالحتة دى ؟؟؟؟؟
فردوا عليه المسئولين هناك 
بإن اللى اختاره ييجى هنا .. التمثال يعنى 
كان الكابتشن فاروق حسنى سخصيا 
اللى كان عاجبه التمثال قوى قوى فقال حطوه هناك .. !


   

والظاهر لما كان نوبار ف كلية الفنون الجميلة
كانله ذكريات مع فاروق احنا منعرفهاش بقى 
والله اعلم 
المهم ان نوبار قاعد هناك من ساعتها 
وشكرا
مكتوباله ميفارقش اسكنكرية .. #يا_بخته
 
 

نسيب تمثال لاظوغلى ف القاهرة
وتمثال نوبار ف اسكندرية
 ونروح على بورسعيد حيث تمثال حكاية هوه كمان

كلنا عارفينه طبعا .... بتاع الأخ ديليسبس

 

وطبعا مفيش داعى أسرد تاريخ الراجل
اللى كله قلق وطموحات واتهامات بالسرقة
وحفر قبور لآلآف المصريين لحفر قناة السويس

 
وحوارت قربه من الخديوى سعيد ثم اسماعيل
قصره 
الراجل كان داخل دماغ سماعين 
وقبل حفلة افتتاح القنال قرر يعمل تمثال 
قوم ايه ؟ 

الفنان الفرنسى اللى كان عليه العين 
جه مصر وعرض على اسماعيل تمثال شيك 
لفلاحة مصرية عشان يتحط ف مدخل القناة 
يستقبل السفن وبتاع 

 
ويقال ان الموضوع تعثر بسبب التكلفة المادية 
واسماعيل كان فلس خلاص 
والتمثال كان فعلا ضخم ومكلف 
راح الفنان مديه لامريكا
 

 

 

بعد ما عدل ف تفاصيله .. 

وخلصنا على كدا مفيش حاجة 

اتحطت عند مدخل القناة 

 لحد ما روح يا زمان وتعالى يا زمان 

والخديوى عباس حلمى التانى هييجى

 

 

 
وسنة 1899 هيركب يخت المحروسة 
وهيروح على بورسعيد 
عشان يحضر حفل ازاحة الستار 
عن تمثال ديليسبس افندى اللى اتعمل
على نفقة شركة قنال السويس وقتها 
 
 

واللى عمله الفنان Emmanuel Frémiet 

وهيتحط على قاعدة عالية ف مدخل القناة 

 

وفكرة التمثال ان .. 
الحاج ديليسبس واقف ع الناصية بيشاور بإيده
وبيقول للمراكب ..  اتفضلوا يا رجالة 
بيتكو ومطرحكو وتعاشبوا شاى وكدا

 

 
بس بقى وقعد سى بيسو ف موقعه الممتاز دا 
من 1899 لحد ما ثورة يوليو ما قامت 
والغريب ان محدش جه نواحيه خالص 
مع انه رمز للأمبريالية التوسعية اللى جاية 
من التوسع والامبرة يعنى .. !
  

وقعد لحد ما حصل العدوان الثلاثى
وبورسعيد كانت بتغلى واللى بيحكى القصة هنا 
هوه احد رجال المقاومة الشعبية هناك 
وبيقول انهم صحيوا ف يوم ف شهر ديسمبر 1956 

 

وراحوا عند التمثال عشان يبصوا ع السفن 
وحركة الملاحة وبتاع 
واذا بيهم يلاقوا ديليسبس عليه علمين 
لمين يا شهروزة ؟؟؟
قالك علم انجلترا وعلم فرنسا 
ومحطوطين عند ايد ديليسبس كدا
 وفهموا طبعا انها حركة من العساكر 
اللى كانوا هناك عشان يغيظوا البورسعيدية
قوم ايه؟

البورسعيدية حاولوا يتسلقوا التمثال
عشان يجيبوا العلمين يحرقوهم
 لقوا التمثال عليه شحم عشان يزحلق 
اللى هيحاول يطلعه ..!

طب ايه يسكتوا ؟ 
لأ طبعا 
راحوا جايبين سلم وطلعوا جابوا العلمين 
ثم بدأت محاولات زحزحة التمثال عن قاعدته 
واسقاطه
وطبعا المحاولة كانت صعبة بسبب حجم التمثال وتقله 
لكن اثناء ما بيحاولوا لقوا شوية رجالة حلوين 
من بتوع المقاومة جايبين متفجرات 
وهالين عليهم
 

 

ووسع يا بنى انتا وهوه 

وعند رجلين ديليسبس 
وحطوا المتفجرات 
وبووووووووم التمثال وقع

وكل سنة وانتا طيب يا حاج بيسو
 

وبس التمثال اللى يوم ما اتنصب عند القناة 
عملوله هوليلة 
انكفى على وشه ف العدوان الثلاثى 
وبرضو عملوله هوليلة 
 

 
واتركن ديليسبس ف مخازن هيئة قناة السويس
 بعد ما بقت شركة مساهمة مصرية 
 

    
وقعد متكهن 
بينما قاعدته فضلت كما الوسادة الخالية
وشوف بقى عدى بتاع نص قرن ويزيد 
والقاعدة فاضية 


 وشوية يقولوا هنشيلها 
وشوية يقولوا هنعمل عليها تمثال لفلاح مصرى غلبان 
كرمز لكل اللى حفر القناة
ومحدش افتكره بأى حاجة ... 

وطبعا الضبابيط الاحرار 
وكل من جاء بعدهم وهم ف حكمهم من عسكر 
مكنوش فاضيين للفلاح الغلبان دا
وكله كلام وخلاص 

 

وفضلت القاعدة فاضية 
 لحد ما مؤخرا قالوا نطلع بيسو بقى

الا قرب يكمكم م الركنة 
ويلا نرممه وهنرجعه مطرحه
وعنها والدنيا هاجت وماجت وخد عندك بقى
 دا خاين 
دا حرامى 
دا محتال 
دا عمل وسوى
 دا خد صيغة بن اختى وطفش 
دا معرفش ايه ....
 

قالوا خلاص بلاش ..
 احنا هنعمل متحف عالمى تابع لهيئة قناة السويس 
ومقره هيكون ف مدينة الاسماعيلية 
 نوديه هناك وبطلوا دوشة .. حلو كدا ؟!!

 

لا مش حلو .. 
عشان شوية ناس تانيين وتبع ابصر ايه كدا 
جماعة اصدقاء ديليسبس 
ولا الصداقة الفرنسية مش فاكرة 
 طلعوا قالوا .... لأ 

ديليسبس دا تراث بورسعيدى وميخرجش منها 
ولا يروح ف حتة .. 
 وناس تالتة قالت مش عاوزينه خالص

 وياختشىىىىىىىىى

 
والمؤسف اكتر ان ورثة الفنان 
اللى عمل التمثال قالوا لو مش عاوزينه
 ناخده احنا يا جماعة .. !
 الملخص الجدع ينطبق عليه المثل المصرى الجميل اياه

عينى فيه وأقول إخيه 
وحد يقولى يا شهر انتى إيه رأيك 
يرجع ولا ميرجعشى ؟؟
أقولكم يرجع وينكتب حكايته وتاريخه 
من الالف للياء ونثقف المواطن العادى 
يعنى رجوعه مش تكريم له دا تكريم لتاريخنا 
ومش هنحطه ونعبده يعنى !!
واعملوا تمثال للفلاح المصرى اكبر واحلى وأقيم
وكل دا يحصل ... بس على شرط 
ورثة ديليسبس يرجعوا صيغة البت الاول 
والا نروح ننسفه تانى ... هه
 

 
اخر تماثيل النهاردة 
هيكون لسخصية ذات حيثية
كانت من رجالة محمد على سنكفولة المخلصيييين 
 ويرجع بأصوله لفرنسا اللى بعتت حملة سنة 
 1798

وبعد 3 سنين كانت الحملة بقوادها وجنودها  وعلمائها وسلطاتها وبابا غنوجها لمة خلجاتها  ومروحة بعد ما قضت المصلحة  ونهبتنا ودمتم مصر محمد على مسكها  قوم واحد فرنساوى اسمه سيف Seves  ناس ولاد حلال وصوا عليه عند محمد على  وقالوله الراجل دا كويس

سنكفولة ف الوقت دا كان بيحاول يبنى جيش قوى 
وعاوز مساعدة خصوصا من ناس 
عاشت ف جيوش الغرب وعارفة احدث حاجة 
 فقال ماشى نجرب سيف دا 
ونشوف

وكانت الشوفة والاخ سيف ما صدق ولبد زى القرادة 
ف حضن محمد على واعلن اسلامه 
وبقى اسمه سليمان 
والناس لقبته بالفرنساوى اكمنه من فرنسا 
#شوف_ازااااااى
والحاج سليمان الفرنساوى بقى الكل ف الكل 
ف تدريب الجيش الجديد وكانله حظوة ومكانة
عند محمد على لدرجة كبيرة 
وقعد لبعد ما حكم عباس حلمى الاول
واوائل عهد سعيد 

 

وروح يا زمان وتعالى يا زمان 
 وجه الخديوى اسماعيل وقال نعمل لسلامونتى تمثال 
الا الراجل له افضال علينا متتعدش يعنى !

وهيبعتوا لجاكمار 
اللى قاعد بحطة ايدنا ورا باب المطبخ زى المقشة 
الظاهر ولا ايه 
ويقولوله عاوزين تمثال لسليمان والنبى

وسليمان اللى مات 1860 هيتتعمله تمثال فخيم 
بحجمه الطبيعى ويتحط على قاعدة عادية سنة 1872 
وبعد شوية يتحط على قاعدة اعلى شوية 
ف ميدان مفتخر 
وهيتسمى مخصوص ...  ميدان سليمان باشا 
يلا هيص يا عم

 
 

هيص شوية .. مش كتير قوى يعنى 
عشان كالعااااادة الثورة تقوم ويعملوا شوية تغييرات 
من اهمها الجملة الخالدة
شيل الميتين اللى ف الميادين دول

الحق يقال .. سلامونتى قعد ف ميدانه لحد سنة 1964 
وبعدين صدر امر بنقله مع تماثيل تانية 
راح فين بقى الحاج ؟؟
قالك ودوه القلعة طراوة وشرحة وبرحة 

 
القلعة حلوة جميلة يا عاطف 
 وعند مدخل المتحف الحربى ونصبوه هناك بوقفته 
والآطة امه دى 

 ومن يومها وهوه هناك 
وحد يقولى وحشة دى يا حاج محمد اقولكم .. لأ 
هوه مكانه الطبيعى عند المتحف الحربى 
بس السؤال بقى .. 
الراجل وقائد عسكرى 
والضباط الاحرار ومجوش ناحية تماثيل العسكريين 
وبتوع الامن المفتريين زى لاظوغلى 
اشمعنى بقى البائس دا اللى شالوه بدم بارد .. ؟؟ 

 
الاجابة ببساطة
 وعلى حد تفسيرى المتواضع 
لأنه كان جد الملكة نازلى لزم
 وهما كانوا شايلين ومعبيين من فاروق 
وأى حد من ناحيته بشكل مرضى 

أظن ذلك يعنى 

طبعا الميدان بعد ما اتشال تمثال سليمان منه .. 
القاعدة اتحط عليها تمثال عبيط كدا 
بمناسبة المعرض الصناعى

 
وبعدين اتشال واتحط مكانه تمثال لطلعت حرب 
واتغير الأسم من ميدان سليمان باشا 
لميدان طلعت حرب

وحد يقولى هوه كله تماثيل لتراكوة واجانب 
مفيش تماثيل مصرية يا شهر؟! 
اقولكم الحكيوة الجاية ان شاء الله 
هنحكى عن الشخصيات المصرية وتماثيلهم 

وتوتة توتة 
نرتوت المنشنات 
ونقولكم تصبحوا على الف خير مقدما


--------------------------
 

سعدية سليم @sa3deaselim
 أوغلي أو أغلو بمعنى ابن

mohamedzaky @mohzaky25
 مكنش عنده باعة جائلين يا فاتيما


فروح وريحان @mohamedtamimi1  
هو حد قدر يقرب من تمثال اللى كان مشغله :)

Mohammed Attya @mohammed_attya 
هو فيه اصلا كام واحد فى مصر
 يعرف مين لاظ اوغلى ؟؟

 

اكتئاب ما بعد الثورة @MahometusUsama 
مصر فيها الكرم حتى لﻻظوغلى 
ﻻظوغلى مين والله ما أعرف
 نظرة يا عرابى عارف عرابى يا شهدى 
ونبى تقولى على رأى عمك شكوكو أ*ا
 يا خرابى

  

 

اكتئاب ما بعد الثورة @MahometusUsama
الصورة اﻷهم لتمثال سعد زغلول فى رأيى

 

الكبيرة قوي @__Marwa____ 

 ع الناشف ؟

Mohamed Refa't @Talatin_  باب شرقي لو تفتكري كان فيه ساعة الزهور  هناك زمان.. اكيد شوفتيها

الكبيرة قوي @__Marwa____
 سليمان ده جد الحيزبونه ام الملك فاروق

 

ʎqɐɹɥƃɐɯ-lɐ ɯɐɥʇʎɐɥ @H_Almaghrab

  كنتي كملتي حكاية ديليسبس 

وانه مات ازاي مفلس عشان اللي بيكرهه يشمت فيه :)