حدوتة النهاردة عن مكان
انا بعتبره من أحب الأماكن لقلبى على الإطلاق
له مكانة عندى وطعم
وصوره دايما بتخطفنى
وحكايته هنقولها بالتفصيل
حكاية كوبرى قصر النيل
والقصة تبدأ من الحاج الكبير مؤسس الأسرة العلوية
محمد على باشا اللى جه من ألبانيا ف مهمة
تبع السلطان العثمانى عشان يحارب الفرنساوية
قوم بعد الفرنسيس ما غاروا
مصر حليت ف عينيه وقرر يقعد فيها
وقعد يتمسكن لحد ما يتمكن
وتخلص من كل منافسيه ع السلطة
وهوب قعد ع الكرسى
محمد على بعد ما ركز ف تقوية نفوذه
وعمل جيش وصناعة وادارة وهلما
ابتدى يدلع نفسه هوه وعيلته
مهو مش هيخبز وميكلش نص العيش يعنى ... عيب !!
قوم ف غمرة البنا والتعمير قرر يروق عياله
ويبنى لكل واحد قصر ف حتة شكل
من ضمن الأنجال
الأميرة زينب اللى بنالها قصر ف الأزبكية
اما الست نازلى فكانت البنت المفضلة عنده
فقرر يبنيلها سراية على ساحل النيل ف حتة متطرفة
بعيد عن واغش القلعة وما حولها
الحتة دى التحرير وما حولها يعنى
أيام محمد على كانت عبارة عن برك ومستنقعات وخرابات
وايام المماليك كانت زريبة مواشى كبيرة
اسمها زريبة قوصون
وكانت منطقة مهمشة
والدوشة كلها والعمار كان عند القلعة والقاهرة الفاطمية
وكنا حكينا حكاية التحرير
وزريبة قوصون
هنا
المهم نازلى عاوزة تفتح شباكها تلاقى المية قصادها
بابا محمد على قالها عينى يا كتكوتة
اتبنت سراية ابهة على الساحل اياه
سموها سراية قصر النيل
ف نفس الوقت كان ابراهيم باشا ابن محمد على
واخو نازلى عينه على منطقة مجاورة
هيا منطقة جاردن سيتى
وبناله سرايا هوه كمان فيها
و #عزبة بابا بقى
وروح يا زمان وتعالى يا زمان
ويحكم عباس حلمى الاول وينقتل
وبعدين ييجى الوالى سعيد باشا
ويبتدى يعمل تغييرات جذرية
والجدع يا خويا بعد حادثة قتل عباس حلمى
اللى مات على ايد اتنين من حراسه الخصوصى
قالك انا اخاف على روحى
وقرر يبعد العسكر بتوعه عن القلعة اللى قاعد فيها
ويطوحهم بعيييييد
ولهذا قرر يعمل ثكنات ف مكان متطرف
وينقل الجند هناك منعا لوجع الدماغ
وبيبص شمال ويمين
لقى منطقة النيل مش بطالة فقرر يشترى سراية نازلى
وفعلا اشتراها منها وهدها
وبنى مطرحها ثكنات للجند على مساحة واسعة وممتدة
اتعرفت من وقتها بقشلاق قصر النيل
.jpg)
القشلاق دا او فيما بعد هيعرف بثكنات قصر النيل
شاف مناسبات عظيمة واحداث جلل
ايام الخديوى توفيق وبعده
ودا شكلها من الجو
ثكنات قصر النيل دى
هيا اللى بتواجدها ف المكان دا
شجعت الخديوى اسماعيل انه يركز ع المنطقة دى
ويخليها نواة للقاهرة الخديوية فيما بعد
وبعد ما مسك اسماعيل الحكم قرر ينقل المدرسة الحربية
من القلعة ويخليها ف الثكنات
عشان يخلى الرجل عليها اكتر واكتر
اسماعيل انتوا عارفينه بقى بحبوح
وايده مخرومة ويعز الفشخرة زى عينيه
كمان كان متجوز تلاتة
وواحدة فيهم كانت اللى ع الحجر
فبنالها قصر الأسماعيلية ف منطقة التحرير
عشان تسكنه لوحدها
ومش بس المدام اتدلعت دا الست الضيفة
المودام أوجينى كمان نالها م الحب جانب
#دوس ع الصورة دى للتكبير
لما اسماعيل عزمها عشان تحضر حفلات افتتاح قناة السويس
أمر بإن يتبنى سراية مخصوص
لأستقبال الست اوجينى
اسماعيل اختار منطقة الزمالك
عشان يتبنى فيها القصر الخصوصى دا
وسماه قصر الجزيرة نسبة لجزيرة الزمالك
ونظرا لأن جزيرة الزمالك دى كانت
كما هو واضح
جزيرة
فلى عاوز يعديها مكنش قصاده غير المراكب وبس
فالخديوى طلب يتعمل كوبرى لتسهيل العبور ليها
واتبنت سراية الجزيرة فعلا
واللى بعد كدا بقت فندق كبير اسمه عمر الخيام
ثم حاليا الماريوت
وجت الموكوسة قعدت فيه شوية
وبعد ما مشيت بعد خلصان الاحتفالات
أصبحت سراية الجزيرة مقر لأستقبال الضيوف
زائد ان الست ام حسن احدة زوجات الخديوى اسماعيل
قعدت فيه واستوطنت
وف نفس الوقت الخديوى اسماعيل بنى سراية عابدين
عشان تبقى مقر للحكم
وينقل من القلعة اللى مبقتش قد المقام
والموقف عشان التوهان بقى كالآتى
سراية ف عابدين وسراية ف الزمالك
ونظام اشتريلى جزيرتين يا قرنى
وهاتلى لنشات عشان لما ازهق من جزيرة
اركب لنش للجزيرة التانية اتف عليها وارجع
سى اسماعين كان عاوز يتبنى كوبرى
يربط بين ميدان الأسماعيلية ميدان التحرير حاليا
وما بين جزيرة الزمالك عشان يعرف يتنقل بسهولة
بين هنا وهناك
ومن هنا تقرر بناء كما سماه على مبارك ف خططه
.. قناطر النيل .. المسماة بالكوبرى
للربط بين القاهرة وجزيرة الزمالك
ورغم وجود ثكنات قصر النيل وقتها
كأشهر معلم ف ميدان التحرير
الا ان الكوبرى اتسمى قناطر النيل
لأن كان فيه كوبرى مشهور اسمه قنطرة السباع
اتبنى ف عهد الظاهر بيبرس
واتجدد اكتر من مرة واشتهر بالأسود رمز الظاهر بيبرس
فعلى مبارك سمى الكوبرى
قناطر النيل
والحقيقة ان الاسم الرسمى مكنش مهم قوى
لأن الإسم الشعبى هوه اللى اشتهر
والناس سمته كوبرى قصر النيل وخلِصت
الخديوى اسماعيل اتعاقد مع شركة فرنسية
اسمها "فاف ليل" عشان تبنى الكوبرى سنة 1869
بتكلفة قدرها 108 ألف جنيه ينطح جنيه
وخلص الشغل فيه وتم افتتاحه ف فبراير سنة 1872
والمواصفات كانت 10 متر عرض و 406 طول
و بقاعدة دبش محاطة بحجر جيرى
و عشان تعرفوا مصر قد ايه جميلة
كوبرى قصر النيل كان أول كوبرى
ينشأ على قواعد ثابتة على نهر النيل من نبعه لمصبه
#اه_والنيعمة
غير كدا كانت كلها مجرد معديات وقناطر أى كلام
لكن اول حاجة معتبرة
ومحترمة كانت عندنا
الكوبرى دا شاف احداث كتير قوى
اغلبها مرتبط بالثورات والإحتلال
لأن احمد عرابى ف بدايات الثورة العرابية عمل قلق
وقطاع كبير م الجيش سانده ف كدا
وثكنات قصر النيل شافت قصة مع عرابى
والخديوى توفيق نبقى نحكيها على رواقة بعدين
وكمان شافت احتلال الجيش الانجليزى لمصر
الانجليز بعد هزيمة عرابى ودخولهم القاهرة
راحوا على ثكنات قصر النيل واحتلوها
وفضلوا قاعدين فيها لحد الجلاء منها 1947
.jpg)
الثكنات دى كانت مصدر استفزار شديد
اكمنها كانت مقر لتدريباتهم وفرض نفوذهم
وكان جواها مهبط للطائرات
وكمان كان فيها كنيسة
وفضلت الثكانت دى موجودة بعد جلاء المحتل الانجليزى ورجعلها الجيش المصرى يقعد فيها
لحد بعد ثورة يوليو
هتلاقوها على يمين الصورة
دوس عليها عشان تبان بحجم أكبر
عبدالناصر قرر هدها ف نص الخمسينات كدا
وقرر رجوع الجيش لثكنات العباسية
وتم تغيير شكل المكان تماما
ونرجع بقى للكوبرى نفسه اللى لما اتبنى
كان لعبور المشاة والدواب بس
وكان ماشى فُلة وقشطات
لكن بإختراع العربيات وانتشارها
وظهور التوبيسات كمان
مبقاش بيقضى الغرض
الملك فؤاد قرر يهد الكوبرى القديم
ويبنى مكانه واحد تانى أعرض وأوسع
واتعملت مناقصة
ورسى العطا على شركة "دورمان لونج" الانجليزية
وابتدت الشركة الشغل 1931
وخلصته سنة 1933
وتم افتتاح كوبرى قصر النيل تانى
بعرض 20 متر وطول 406 متر
وتكلفة 308 ألف و250 جنيه و 25 قرش .. !!
وتربست ف نافوخ الملك فؤاد بقى
وانتوا عارفين غتاتة امه ان الكوبرى يتسمى بإسم ابوه
ويبقى كوبرى اسماعيل
بس طبعا كل دا راح ف الهجايص
والناس فضلت تقول عليه كوبرى قصر النيل برضو
والمرة دى الكوبرى مواصفاته اتغيرت شوية
يعنى بدل اساسه القديم
بقت أساساته مكونة من صناديق حديدية
مملؤة خرسانة مسلحة
ودعايم خرسانة مكسوة بجرانيت جالى من اسوان
وطبعا بقى أعرض واطول وسوره بقى أخفض
ويتشاف النيل منه اوضح
لكن المهم هنا الأربع سباع
عشان دول تحديدا ليه قصة عجب
سباع قصر النيل تم التعاقد مع مسيو جاكمار ف باريس
لصنعها
الراجل بدأ شغل وخلص وشحنها
وصلت اسكندرية 1875
واتحطت 1881
يعنى الكوبرى اشتغل والناس مشيت عليه
ومكنتش السباع لسه موجودة
اتحطت سنة 1881
وأى صورة فيها السباع
تبقى بعد التاريخ دا
اللطيف بقى ان السباع دى اتحطت من هنا
وقامت الثورة العرابية وشعللت من هنا
قوم واحد من العرابيين الغلاويين ف غمرة الحماسة
قرر يعمل فيها فلوطة
كان شخصية عرة واسمه الشيخ عليش
الراجل دا قرر فجأة ان كل التماثيل
اللى اتعملت ف عهد الخديوى حرام شرعا
ولازم تتشال من مطارحها #اه_واالنيعمة
الشيخ عليش مسكتش وراح للمفتى وقتها
وكان محمد المهدى العباسى
واستصدر منه فتوى بأزالة هذه التماثيل
لأن الخديوى خاين
والعريس متين والعرووووسة متينة
وطالما الخديوى توفيق خاين
وتعامل مع الانجليز ضد شعبه
يبقى التماثيل دى حرام
ولازم نشيلوها
وندفنوها
قوم المفتى وافق
واجرى يا بنى منك له شيل التماثيل كلها
و من ضمنها تمثال ابراهيم باشا ف العتبة
وسباع قصر النيل وع المخازن عدل
عشان نبقى نصهرهم ونعمل منهم مدافع ..!!
وفعلا ف وسط الهيصة اتشالت التماثيل دى
بس طبعا الشيخ عليش هوه وغيره اكتشفوا
ان مفيش امكانية لصهرها وبتاع
الموضوع عاوز تقنية اعلى مكنتش متوفرة
وأصلا الثورة العرابية اتلمت واتفحتت
وعرابى اتنفى
والشيخ عليش نفسه اتحط تحت الاقامة الجبرية
لحد ما مات سنة 1882 محسور
وخلصت الليلة على كدا
والخديوى توفيق بعد ما سلم البلد للإنجليز
وحل الجيش والقصص دى كلها
رجع ادى اوامر بإخراج تماثيل بابا وجدو من المخازن
ورجعت الأسودة مطرحها على قواعدها العالية دى
اللى بعد تجديد الكوبرى بقت أقصر شويتين
وقت تجديد الكوبرى
ساعتها الملك فؤاد قالهم حطوها ف جنينة الحيوانات
:)
_-_front_-_TIMEA.jpg)
وبعدين رجعت تستقر ف مكانها
من سنة 1933 لحد النهاردة
عشان ليها نصيب ترجع
وعشان كمان امة لا اله الا الله من البهائم
تكتب عليها تاريخ ميلادها وجوازها وطلاقها وكدا
عباس الطرابيلى ف كتاب شوارع لها تاريخ
بيحكى عن الكوبرى ازاى اول ما تعمل
كان فيه رسوم عبور لكل كائن حى بيعدى عليه
ولو بصيتوا ف الصور
هتلاقوا يافطة على يمين الكوبرى ف اتجاه التحرير
كان مكتوب عليها الرسوم بكل دقة
وخد عندك الجمل : محمل قرشين و فاضى قرش
الخيول والبغال : محملة قرش و150بارة وفارغة 30 بارة
الرجالة والحريم النفر : فارغ او شايل 100 بارة
اما الأطفال تحت 6 سنين فببلاش
اما العربيات الكارو للركوب قرشين وفارغة قرش
والمسخرة بقى ف اللى جاى حضرتك
الطرابيلى بيقول كان فيه ف القايمة دى حيوانات عجيبة
لكن واضح انها كانت بتعدى الكوبرى عادى ف الايام دى
زى ايه كدا .. ؟
يعنى بيقولك كان فيه رسوم ع النعام كبير صغير
ع الغزلان
الحلوف
الخنزير
الضبع
الدب
وكله يدفع عشرة صاغ لو حب يعدى من الكوبرى .. ؟!!!
طبع مجرد ما قريت القايمة دى دماغى لفت علطوووول
وقولت دا فيه شخصيات كتير قوى الأيام دى
لو حبت تعدى اياميها
كانت هتدفع عشرة صاغ ع المرة ..!!
بيقولك حلوف .. وضبع .. ودب .. وخنزير
شوف بقى أى اخوانى .. عسكر .. سياسى .. بتاع داخلية
لو عدى يوميها كان هيدفع كاااام .. ؟!!
#زمن
لأ وايه كمان المخاليق مقامات
الحلوف يدفع عشرة صاغ عشان يعدى
انما البنى آدم كلام فارغ والعيال ببلاش ..!
.jpg)
لأ وحاجة غريبة كمان ف القايمة دى
بيقولك ان الكلاب كان بيندفعلها رسوم عبور
و غالبا قصدهم كلاب الهوانم والباشوات بقى
مش كلاب السكك الغلابة ولاّ ايه ؟!!
المصابيح اللى ع الكوبرى دى كانت بتشتغل بالغاز
وكان نفسى يبقى فيه صورة للمكان دا بليل
بس طبعا دا كان صعب زمان
اكيد كان هيبقى شكله تحفة
الكوبرى القديم كان لعبور المشاة والدواب وعربيات الكارو
زى ما قولنا
لكن بعد 1933 والكوبرى اتجدد
فؤاد اتعاقد مع شركة للأتوبيسات اسمها سانتكروفت
ومن وقتها بقى الكوبرى شكل تانى
وبقاله استخدام اكتر خصوصا ان بعد مسافة مش بعيدة
وبعد ما تعدى جزيرة الزمالك
كان اتبنى كوبرى الجلاء .. 1911
وبقى التنقل من التحرير للزمالك لمنطقة الدقى
متاح وسهل الخ الخ
وحاجة كمان لازم نقولها عن كوبرى قصر النيل
انه كان فيه امكانية انه يتفتح ..
كان فيه جزء بيتفتح عشان تعدى منه
المراكب الشراعية المنتشرة وقتها
وكان فيه مواعيد محددة لكدا يوميا
ومعروفة للمارة
وحتى بعد الكوبرى ما اتجدد ف عهد فؤاد
فضلت الخاصية دى موجودة
بس مبقتش تستخدم
لأن المراكب مبقاش فيه حكاية الشراعات دى
الكوبرى من ناحية الزمالك فضل فيه جنينة ف النص
لحد ما اتعمل تمثال سعد زغلول
واتحط ف صينية مواجهة للكوبرى
دا قبل التمثال
دا نفس المطرح
بس بعد تمثال سعد زغلول ما سكنه ..
وهنا صورة كمان
ومعلومة كمان ظاهرة قوى ف الصور
ان لحد سنة 1955 مكنش فيه كورنيش !
يعنى فندق سمراميس القديم هوه وكل المبانى التانية
كانت ع النيل مباشرة..
وبصو كدا على يمين الصورة هتلاقوا الفندق
والحتة اللى بعد واللى بقى مكانها سميراميس حاليا
كان ع النيل طوالى
حاجة كمان عجيبة قوى
لكن منطقية بالنسبة للأماكن اللى عمرها طويل
كوبرى قصر النيل بدأ ف عهد اسماعيل تحت اسم
قناطر النيل المسماة بالكوبرى
بعد كدا
بقت الناس تسميه كوبرى قصر النيل
عشان وجوده جنب الثكنات
جه الملك فؤاد وجدده فسماه كوبرى اسماعيل
ثم قامت ثورة يوليو 1952 فسموه كوبرى التحرير
وبعدين سموه كوبرى عبدالناصر
ثم رجع تانى كوبرى قصر النيل
وفضل الاسم دا ملتصق بيه و مهما كان اتغير قبل كدا ..!!
واخيرا كوبرى قصر النيل بالنسبالى شخصيا
مش مجرد مكان حلو له ذكريات وبس
الكوبرى دى عندى من بعد الثورة
بقاله معنى وشكل تانى
كوبرى قصر النيل بالنسبالى مكان لعبور
مش بس بين مكانين
لكن بين زمنين زمن مبارك و ماضيه الاسود
وزمن جديد ومستقبل رغم متاعبه
لكن أجمل ..
لأن ع الكوبرى دا شاف المصريين أصعب لحظة
ف ثورة يناير
وصحيح بعد كدا بقى ممر للأحتفال والمسيرات
ومبقاش فيه نكد
لكن يفضل هوه الرمز والمعنى
كوبرى قصر النيل
والتنزه عليه ليلا 1882
دوس ع الصورة للتوضيح
كوبرى قصر النيل
وهوه مفتوح لعبور المراكب ...
صورة فوتوغرافية لكوبرى قصر النيل
اثناء فتحه لعبور المراكب
دى جنازة عبدالناصر وهيا بتعدى عليه
والله اعلم
وسوق الحمير وايام ما كانت جزيرة الزمالك
فيها غلابة و عامة ودهماااااااااء
:)
سرايا الجزيرة .. عمر الخيام .. الماريوت حاليا
كوبرى قصر النيل ف الروقان
فؤاد جنب الأسد ...
مكنش كاله وخلصنا .. ؟!!
كوبرى قصر النيل ف كرت بوستال
من اليمة التانية
واخيرا كل واحد اسمه اسماعيل
وبينادوله ابو السباع يدين بهذا الدلع
للخديوى اسماعيل بسبب الكوبرى دا
واظن واضح السبب :)
وتوتة توتة أقول الملاحظات اللى فاضلة
ومقولتهاش
1)الله يرحمك يا حاج اسماعيل
رغم كل البذخ والبلاوى
الراجل دا عمل بنية تحتية دامت ل200 سنة ولسه
2) كان عندنا اول سكة حديد
واول جنينة حيوانات ف افريقيا
واول حاجات كتير قوى
فمش مستبعد يبقى اول كوبرى ع النيل على أساس
يبقى عندنا برضو !
3) الحاج احمد عرابى كان معاه ف الثورة بتاعته
ناس عرر كتير قوى
ولهذا فشل فشلا ذريعا
وابقوا فكرونى احكيلكم عنه حكايات تانية
وهتعرفوا قصدى ايه
يعنى الشيخ عليش دا مش شبه الفسل الشحات
بتاع الاهرامات حرام ولازم نهدوها والكلام دا
وليه يارب كدا بس بالينا بالمناظر دى
#اشكال_ضاااالة
4) انا منفسنة م البت اوجينى دى قوى
وهيا صحيح ماتت بائسة ومعزولة وحالها كرب
بس لا يمنع انى اتحقد واتحسد عليها واقول
اشمعنى هيا يتبينلها سرايا وكوبرى
واحنا يعنى اللى ملناش نفِس
#كُبة
5) ميزانية بناء الكوبرى اول مرة كانت 108 الف جنيه
وتانى مرة كانت 308 ألف وشوية فكة
يعنى تقريبا ضعفين المبلغ ف تقريبا 50 سنة كدا
#يا_بلاش
وتانى مرة كانت 308 ألف و250 جنيه و 25 قرش
ومش هسأل ليه وازاى
بس انا عاوزة أعرف ال25 قرش دى تحديدااا
اتصرفت ف ايه وليه وازاى عشان تربست معاياااااا
لأ بجد .. فلوس البلد دى كانت حلال
الكوبرى اتوسع من 10 ل20 متر
يعنى التكلفة دى بالمقارنة بتكلفة انشائه اول مرة
متبقاش حاجة تذكر ..!
6) التعاقد مع شركتى بناء الكوبرى ف المرتين
تبين كويس النفوذ الاجنبى كان عامل ازاى
اول مرة كانت شركة فرنسية
وتانى مرة كانت شركة انجليزية ..
7) السباع دول فيهم حاجة لله كانوا هيتشالوا
ويسيحوهم حرفيا
بس ربنا رجعهم تانى عشان ليهم نصيب
يحضروا ايام عظيمة
8) قصة دايما تتكرر ف الحكايات بتاعت الاماكن
اللى انشأ مكان ممكن جدا يختارله اسم
وييجى حد تانى برضو ينقى اسم
ومع ذلك اللى الناس والذاكرة الشعبية بتختاره
وتقوله
هوه ف النهاية اللى بيمشى
وكوبرى قصر النيل تنطبق عليه النظرية دى بشدة
:)
دى تدوينة كنت كتبتها زمان بعد الذكرى الأولى للثورة
هتلاقوا فيه صور اكتر
وتصبحوا على ألف خير
------------------------------
امال لو كانت حلوة
Ahmed Rageh @Ahmed_Rageh101
طب معملهوش صيراميق
مـيرڤـت ☺ @MervatSa3ed
الشخصيات بتتكرر ع مدار التاريخ بالمللي مش معقول !
Hany Zaky @Hany_Zaky
مواسير الغاز فى سوق العتبة لسه موجودة بشهادة صديق ثقة
™الدبدوب ® @mazforever
زى ما صلاح السعدنى كان بيقول فى فيلم المراكبى :))
ثورجيه من منازلهم @A7lamAmal
ماهية الباشكاتب
