إحنــــا بتــــوع التمــاثيــــل .... 3

حكينا ف التدوينتين اللى فاتوا 

عن تمثال سليمان باشا الفرنساوى 
وقولنا ازاى اتشال بأمر من نظام عبناصر 
 اللى كان كاره اى حاجة ليها علاقة بالملكية 
واتحط بداله مين ؟؟

تمثال طلعت باشا حرب .. 
 وطبعا منتوش محتاجين تعرفوا مين الراجل دا 
ولا نحكى عنه وعن تاريخه


لكن المصادر بتقول ان الميدان دا 
كان ف بدايته تفريعة من تفريعات ميدان الأسماعيلية 
اللى بعدين هنعرفه بميدان التحرير

وبيقولوا ان الحتة دى كان اسمها 
(ميدان قره قول قصر النيل)
عشان كراكون او قسم قصر النيل 
كان موجود هناك وفضل بهذا الاسم لحد سنة 
 1912

لحد ما قرروا يخلوا اسمه ميدان سليمان باشا
 اللى كان تمثاله سابق القعاد ف المطرح من زمان 
وزى ما تقولوا الميدان اتعرف بيه واشتهر 
فقالوا خلاص
  


وروح يا زمان وتعالى يا زمان 
والثورة بتاعت يوليو قامت ومقعدتشى 
الا لما شالت التماثيل اللى عاملالها هسس ف نافوخها 
ومن ضمنها هذوها التمثال 
وبعدين .. ؟

اتفقوا مع الفنان " فتحي محمود" 
يعملهم تمثال للاخ طلعت ويكون حاجة ابهة 
وفعلا الراجل مكدبش خبر 
وعمل تمثال من البرونز واتحط سنة 1964 ع القاعدة

ومن يومها وقف هناك ومنزلشى من عنده 
 والملاحظ بقى انهم حطوه على نفس قاعدة 
تمثال سليمان الفرنساوى وغيروا بس الإسم عليها
والكلام 

 

وطبعا بعد شوية اتغير الإسم 
من ميدان سليمان

لميدان طلعت حرب

 
وتماثيل بتسلم تماثيل 
إيييييه 
دنيااااااااااااااا

التمثال اللى بعده .. 
 بيقولوا انه كان أول تمثال لزعيم وطنى 
يدفع فلوسه الشعب مليم مليم 
والمقصود هنا الأخ مصطفى كامل

الشاب يا نضرى مات ف عز مجده سنة 1908 
والناس زعلت عليه وانقهرت 
 وقرروا يلموا من بعضيهم 
ويعملوا اكتتاب لصنع تمثال له
الكلام دا سنة 1910 على ما جمعوا المبلغ كله 

وبعتوا لفنان فرنسى اسمه

 Leopold Savine 

والجدع خلص التمثال 

وبعته على مصر سنة 1913 ... حلو ؟

بعد ما وصل كانت الحكومة اتمطعت واتشمللت 
واتنت واتفردت ع الآخر
 وعملوله مدرسة باسمه ف حارة برجوان 
وسموها مدرسة مصطفى كامل الاولية
وراحوا حاطين التمثال هناك ف حوش المدرسة ! 
ليه يا جماعة كدا ؟ 
قالك لحد ما نلاقيله مكان نحطه فيه حضرتك 
 وسكت الموضوع ونام 
سنة ... اتنين ... عشرة ؟؟؟

قلبكوا قلب خساية والنبى 
أكتر 
دا عالم راحت وعالم جت 
عباس حلمى التانى شالوه وجابوا مكانه حسين كامل 
ومصر بقت سلطانية 
وبعدين جه الملك فؤاد
ومصر تحولت من سلطانية الى مملكة 
وانتوا عارفين بقى 
من حكم ف مملكته ما ظلم 
خصوصا لو كان شخصية زبالة زى فؤاد 
 اللى وصل للحكم ف غفلة من الزمن

فؤاد كان عنده مشكلة نفسية متغلغة ف اللاشعور 
 تجاه الزعماء المعارضين له 
سعد زغلول كان مأزمه قوى قوى 
 وحتى الميت مصطفى كامل كان مضايقه 


المهم فؤاد هيقولوله الآتى ...

يا مولانا فيه تماثيل لمصطفى كامل وسعد زغلول 
وعاوزين ننصبهم ف شوارع البلد 
راح زاغر ومزعق وشاتم 
وكان فاضل يقلع شبشبه وقالهم 
أبضنننننننننننن

محدش يتحطله تماثيل ف أى مكان ف مصر ..
 الا شرط يكون من العيلة المالكة وبس
 الباقيين دول لأ 
 نو 
 امبسويبل 
 ابسلوتلى وكدا 
واردموا ع السيرة دى


طبعا اللى ف الحكومة سكتوا 
واللى ف المعارضة قعدوا يبرطموا شوية 
 لكن لا حياة لمن تنادى 
فؤاد اصله كان نيلة ومحدش طايقه 
 المهم مات سنة 1936 والحمدلله وريحنا


وبدأ الوريث الملك فاروق عهده بشوية تغييرات 
على عكس ابوه كان لطيف وحبوب 
 وكرر محبين الزعماء الطلب تانى 
فـ اتوافقالهم فورا وابسط يا درش 
تمثالك هيشوف النور

 

ف الاول كانوا ناويين يحطوه ف العتبة
 لكن بعدين غيروا المكان
 وقالوا ميدان سوارس حلو ومحندق وأشيك 
 نحطه هناك ألطف يا ولاد ... 

وبيقولوا انهم خرجوه من المدرس 
وقرروا ينقلوا التمثال لكلية الحقوق 
اللى اتخرج منها الفقيد الشاب 
ويخرجوا بموكب كبير منها لحد الميدان

ويتحط التمثال فعلا سنة 1940 على قاعدته
 ف منتصف ميدان سوارس 
اللى هيتغير اسمه بعد هذا التاريخ 
إلى .. ميدان مصطفى كامل 

 

ويقال ان مصلحة السكة الحديد ف هذا اليوم
 خفضت اسعار التذاكر 
 عشان يقدر اكبر عدد من الجمهور حضور اللحظة دى
 :)

ومن يومها والتمثال البرونز لمصطفى 
قاعد ف الميدان لم يغادره 

 
والقصة بتاعت المكان حكيناها زمان بالتفصيل
هنا 

قصة تمثال تانى

 حكيناها 

تمثال نهضة مصر اللى المصريين اكتتبوا 

عشان يعملوا منه نسخة كبيرة 

بعد ما اتعرضت منه نسخة مصغرة ف معرض باريس

 
القصة كلها هنا 
بس بالمختصر انه الفنان محمود مختار 
تم تكليفه بعمل التمثال العظيم دا 
 والمصريين هما اللى دفعوا فلوس التمثال من حر مالهم

لحد ما اكتمل المبلغ واستقر الاختيار

على انه يتحط قصاد محطة مصر

ومحمود مختار هيبدأ ف عمايله وينحته ف مكانه 
من الجرانيت ويتممه بعد مشقة وتعقيدات 
ويفتتحوه اخيرا بحضور المزغود فؤاد

 

حد يقولى 
طب ما هو بيوافق اهو ع التماثيل 
اقولك مهو التمثال طالما مش لشخص بعينه 
وهنمجده ونكرمه وبتاع .. يبقى خلاص يعدى

 
ويقال ان الميدان قعد شوية 

متسمى باسم التمثال 

 

لحد ما قامت ثورة يوليو  

 ومتفهموش التمثال زعلهم ف ايه ؟؟ 

راحوا ناقلينه !!

ودوه مكانه الحالى
 والاخرانى اللى كلنا عارفينه طبعا 
 ميدان نهضة مصر عند جامعة القاهرة 
وثبت متحركشى من هناك بقى

اما مكانه القديم 
عند المحطة فاتعمل نافورة
 ووقفوا الحاج رمسيس التانى يعمل فيها بيبى 
عينى عينك كدا لحد وقت قريب 

والميدان اتسمى باسمه .. ميدان رمسيس 
وخلاص احنا حلوين وكويسين ومستقرين
 قالك لاااااااا شيلوا التمثال دا من هنا 
عشان غلط على نفسيته وكدا

ليه يا عم الحاج ؟ 
قالك دا آثار وبيتعرض لضوضاء وتلوث واهتزازت 
وهيقع بعد شوية وكدا هيضيع 
قصره ... صدر قرار بنقله

وف ليلة ليلاء كلنا فاكرينها كويس ..
 اتنقل الحاج رمسيس من ميدانه 
 ورموه ف حتة ف الجيزة بعيد 
عشان يتحط ف متحف فرعونى جديد بيتعمل
جزء تانى للمتحف بتاع التحرير وكدهون .. 

وقعد ميدان رمسيس محتفظ باسم الذى غادره 
ودا تانى تمثال ينشال من هناك 
والظاهر الحتة دى حد معزّم عليها ولا حاجة ... !

وقبل ما نروح لتمثال جديد احب أذكر 
ان تمثال نهضة مصر كان تقريبا كدا اول تمثال مصرى
 بإيد فنان مصرى 
 بفلوس مصرية خالصة 

 

تمثال تانى تم الأكتتاب له 
واللى عمله محمود مختار برضو 
بعد الناس ما انبهرت بتمثال نهضة مصر 
والمرة دى تمثال الزعيم سعد زغلول 
وقصته لطيفة


قالك بعد سعد زغلول ما مات

 الناس اللى بتحبه وما اكترهم ف بر مصر

 قرروا يعملوله تمثال ولموا فلوس من بعضهم 

واكتتاب وشغلانة وحدث الآتى ..

كان خلاص تمثال نهضة مصر 

هيخرج للنور اخيرا وهيصة وهوليلة 

سعد زغلول نفسه حضر اخر فترات 

خلصان نهضة مصر واتصور معاه كمان

بس ربنا افتكره برحمته  قبل ما يتنصب رسميا

المهم 

 اللجنة المسئولة عن الاكتتاب بتاع سعد 

لمت فلوس محترمة لدرجة انه 

لما شافوا تمثال نهضة مصر قد ايه جميل ورائع 
قرروا يعملوا لسعد زغلول تمثالين .. مش واحد 
ويحطوهم ف القاهرة واسكندرية 

 وراحوا لمحمود مختار
اللى اصلا كان ليبرالى ومجنون بحب البلد 
ويختلف مع سعد لكن معاه 
ومع أى حد يقف ضد المحتل
واتحمس للمشروع 
وبدأ ف عمل التمثالين فعلا
وخلصهم .. ويلا يا ولاد تعالوا خدوا التماثيل 

عشان نحطها ف مطاريحها 
قوم اييييييه ؟؟ 
انتوا المفروض حفظتوا  !

طلعلهم الملك فؤاد زى الخازوق كدا 
وقالهم تماثيل لغير عيلتى لأه 
 وكمان جايبينلى سى سعد زغلول 
اللى كان فاشخنى وهوه عايش 
وكمان تمثالين يا غجر .. !!!

بس والموضوع فيشل واتركن التمثالين يا كبدى 
كام سنة لحد فؤاد ما غار 
وسنة 1938 صدر القرار بأن سعد يروح مطرحين
 ف القاهرة واسكندرية

الأول ف القاهرة نهاية كوبرى قصر النيل 
من اتجاه الاوبرا ف وسط جنينة صغننة .

واقف على قاعدة مرتفعة وبيشاور

 
القاعدة عليها 4 أعمدة فرعونية 
ومرسوم عليها زهر اللوتس 
وعليها رموز بتشير للدستور والعدالة والإرادة 
وحاجات كدا
 

 
 
اما التمثال التانى لسعد .. راح على اسكندرية

 فطبعا غنى عن التعريف بموقعه ومكانه 

ف محطة الرمل

 
الوتمثال بتاع اسكندرية مختلف عن بتاع القاهرة 
فيهم وقفة الزعيم بيخطب ف الشعب آه 
لكن مختلف ف التفاصيل .. والحجم 
وبيتفقوا ف الارتفاع عشان يدوا جو السمو والعلو 

 

وزى ما فكرنى 
" @MahometusUsama " 
ان سعد زغلول على قد ما شاف
 لكن كان مكتوبله يحضر جمعة الغضب 
ويشهد على موقعة غالية 
هتبقى من التاريخ الذى لا ينسى

واللطيف ف القصة دى ...
انه كان مكتوب لتماثيله تشوف النور 
بينما اللى منعها بعد ما اتعملت من التنصيب 
واقصد فؤاد يعنى 
هوه اللى تمثالينه اتشالوا ومتنصبوش 

ولذا
كما تقول الحكمة الخالدة ..

 من شال تمثالاً لأخيه .. من غيظه فيه 

هيجيله يوم هوه .. ويشيلوا تماثيله يا مونبييه 

فياريت الكل يتعظواااااا

اللى بعده تمثال برضو لواحد من بتوع السياسة 
 ومش هيبعد عنه كتير 
 دحنا هنتمشى بعد تمثال سعد لحد اخر الشارع 
ف طريقنا لكوبرى الجلاء ..

الكوبرى دا يا ولاد كانوا مسمينه الكوبرى الانجليزى
 أو كوبرى الانجليز 
وكان بيربط جزيرة الزمالك بالجيزة 
مارا على البحر الأعمى
الحتة دى من النهر كانوا مسمينها كدا 
عشان ف فترات الجفاف كان بيبقى فاضى
 زى ما العين بتفضى من الميه فتتسبب العمى

الكوبرى دا المصريين كيدا ف الاحتلال الانجليزى

 سموه كوبرى بديعة 

نسبة للست بديعة مصابنى لأن الكازينو بتاعها 

كان هناك

 والكوبرى دا ف سنة م السنين 

هيحضر تنصيب تمثال احدهم عليه

احدهم مين يا شهروزة ؟؟ 
احمد باشا ماهر حضرتك

وسى ماهر كان رئيس وزراء مصر
 ف فترة سودة ومدهولة من تاريخ العالم
 وتحديدا اخر سنتين م الحرب العالمية التانية
 لما طّلع سيادته بيان نصه الآتى ..
 قالك احنا مع الحلفاء وضد المحور
 ومصر معاهم مش مع التانيين وابدا وبتاتا 
 وكان فاضل يقول طز ف هتلر واللى يتشددله 
 قوم ايه ؟ 
الكلام معجبش البعض

 

واحمد ماهر واقف ف يوم ف البهو الفرعونى 
بمجلس الشيوخ ولقى شاب جاى عليه 
وف جزء م الثانية راح مطلع مسدس 
وفرغه ف صدره وقعه قتيل فوراااااا

الكلام دا كان ف فبراير 1945 
والشاب كان اسمه محمود العيسوى 
والحرب خلصت بهزيمة هتلر
 والحكومة عاوزة تعمل تمثال اكراما للى انقتل
 قوم ايه ؟؟
هتكلف الفنان محمد حلمي يوسف 

يعمل تمثال بالحجم الطبيعى لرئيس الوزراء البائس 

وفعلا يتمم يوسف الشغلانة 

ويحددوا يوم ف سنة 1948 لتنصيب التمثال

وبيقولك ايه يا سيدى أل هما اختاروا الموقع 
عند كوبرى الجلاء المذكور 
من ناحية شارع الاوبرا (حاليا) ولفوه بالستاير وكدا

وقالوا هنرفع عنه الستار ف عيد الجهاد
 اللى هوه يوم 13 نوفمبر من كل عام 

 واذا فجأتننن قبل اليوم الموعود تهب رياح ..
وتشيل الستار من على التمثال

 والناس تقولك دا اكيد فعل فاعل ومقصودة وبتاع
 وتعليقى الوحيد ع القصة دى 
بعد انه نصيب وقدر
 الا انه يا ولاد مصر ف يوم ما ف تاريخها 
ف اوائل نوفمبر كان فيها رياااااح قوية 
لدرجة انها توقع ستاير من على تمثال
 هااحيييح 
 فين الأيام بتاعت زمن الشتاء الجميل دى !

وللى بيسأل .. كوبرى الأنجليز - كوبرى بديعة سابقا 
بقى اسمه بعد الثورة .. كوبرى الجلاء 
اشارة إلى جلاء الاحتلال يعنى
اما كازينو الست بديعة مصابنى فباعته 

بعد افلاسها لرقاصة وهربت على لبنان 

والكازينو اتهد ومكانه دلوقتى شيراتون القاهرة

والسؤال الأخير اللى عاملى هسس ف نافوخى 
الراجل دا (احمد ماهر) يعنى له ميدان 
ومستشفى باسمه ف حتة تانية خالص 
طب هل بت  ليه محطوش التمثال دا هناك
حتى يبقى ف التمثال
 والميدان والشارع كله واحد  ؟؟؟

قصره اللى بعده .. 

ودا بقى واحد من الزعماء الحلوين 
اللى ملهمش بخت
 ومرة هبقى احكى حكايته ان شاء الله .. 
محمد فريد

الجدع كان من المناضلين 
والأسماء اللامعة ف الكفاح الوطنى 
 وبعد موت مصطفى كامل كمل المسيرة
 ف الحزب الوطنى القديم واتسجن واتمرمط شوية 


 ثم ..

كانله ايادى بيضاء ف تعريف الناس بحقوقها والدستور 
وكان ابن ناس وصرف فلوسه وثروته على البلد 
وناسها وف النهاية نفوه برا مصر 
عقابا له على حبه


والراجل الطيب قعد ف المانيا 

لحد ما ربنا افتكره برحمته سنة 1919 

بس بعد ما لحق يسمع عن ارهاصات الثورة 

 وقلبه يبرد شوية

 المهممممم 

بيقولوا انه لما مات مكنش فيه فلوس 
ينقلوه من المانيا لمصر .. تخيلوا !
 لحد ولاد الحلال ما جمعوله المبلغ 
وتم نقل رفاته بعدها بسنة يعنى 1920

والراجل اتنسى ف غمار ثورة 19 وما تلاها 
من سخونة ف الاحداث والأزمة الأقتصادية 
والحرب العالمية واخيرا ثورة يوليو 
 وبعدين فيييييين بقى لما النظام القائم 
متعرفوش ليه وايه السبب افتكر يعمله تمثال 
 وبالفعل صدر الأمر لأحد الفنانين 
واسمه .. منصور فرج بعمل تمثال لمحمد فريد

 
الكلام دا سنة كام يا شهر ؟؟ 
سنة 1958 حضرتك على ما التمثال خلص 
وبقى جاهز لأقامته ف أى مكان فين بقى ؟؟ 
قعدوا يفكروا وف النهاية استقروا
قالوا هيحطوه ف الأزبكية .. عند الحتة اللى حاليا 
فيها موقف اتوبيسات العتبة قرب مسرح العرايس
وفعلا قعد تمثال محمد باشا فريد ف الحتة دى

 من 1958 لحد فين وفيييين لما جت الالفينات 
 وقالولك لازم نشيله م الحتة دى ميصحش !!

المنطقة دى كلها اصلا بسبب المترو وخلافه 
كانت بتتعاد تنسيقها والظاهر فجأة خدوا بالهم
 ان التمثال وجوده هناك ملوش اى معنى
 المهم صدر قرار بنقله
طيب هوتوده فين بقى النوبة دى ؟؟ 
قالك نوديه ميدان البستان سابقا 
وعبدالسلام عارف سابقا 
عند تقاطع كام شارع ف عابدين

المضحك بقى ان الميدان دا

 كان بيتعمل فيه لحد وقت قريب

 محطة المترو المعروفة بتاعت .. محمد نجيب

ف الناس استعجبت قوى

 

لما المحطة ف الحتة دى 
مكنتوا تسموا الميدان باسمها
 او تحطوله تمثال هنا 
 او العكس تبقى المحطة باسم محمد فريد
 بدل اللخبطة دى 

لخبطة ايه ؟
اللخبطة جاية من ان البعض مسمى الميدان

ميدان محمد نجيب .. لأن فيه المحطة 

 ودا مش حقيقى 

بينما البائس الغلبان

محدش بعرف كتير عن تمثاله

ولا يعرفه هوه شخصيا مين يبقى محمد فريد .. !
 #للأسف 

وعلى صعيد اخر ملوش دعوة بحاجة 
ميدان محمد فريد دا ف السبعينات 
كان مشهور بميدان ابو ظريفة 
ومين يا ولاد ابو ظريفة دا ؟؟؟
قالوا انه كان حلوانى مشهور .. آآآآآآوى 
الناس بتجيله تاكل وتروق وتنبسط 
فسموا الميدان باسمه حلوانى كدا 
:)

 

 القصد الزعيم المهضوم حقه 
لسه قاعد على قاعدة تمثاله حتى اليوم 
وبيبص على شارعه

شارع محمد فريد اللى ممتد
 لحد ميدان مصطفى كامل
 وفيه بنك مصر القديم والحديث
 وغيره من بنوك وحاجات مهمة

نسيب الحتة دى ونروح التحرير 
 لتمثال انا بحبه 
رغم انه فنيا ممكن ميكونش قيم قوى 
لكن له الف ذكرى .. 
تمثال عبدالمنعم رياض
والراجل غنى عن التعريف 

ويكفى انه هوه والفريق الشاذلى 

وكام نفر كدا من العسكريين القلائل

 اللى لسه ليهم احترام ومحبة 

والحقيقة انه الراجل مات شهيد اثناء تفقده للقوات  والاستعدادت على الجبهة سنة 1969  رغم التحذيرات بأنه ميروحش ويعرض نفسه للخطر  لكن الموت ببينقى .. انتوا عارفين

ودا منظر المكان اللى فيه حاليا 
ميدان عبدالمنعم رياض .. !
معنديش تحديدا التاريخ والسنة بدقة

 بس المؤكد انه بعد استشهاد الفريق

 وتكريم عبدالناصر لأسمه 

 واختيار يوم استشهاده كيوم الشهيد

 جت الخطوة دى

تسمية ميدان باسمه يعنى 

وفيه مصادر لحد اواخر السبعينات 
كانت بتستخدم اسمه كتسمية للميدان
 يبقى نقدر نقول بثقة ان المطرح شال اسمه
 من الفترة دى
 لكن ماذا عن التمثال ؟؟؟

 
التمثال ودا الغريب 
يا دوب معمول من سنة 2002 وبس 
ومعرفش ليه حاسة
 انه هناك من زمان قوى اقدم عند كدا !!

وقصته ببساطة انهم كلفوا المثال فاروق ابراهيم
 بعمل تمثال للشهيد عشان يتحط ف ميدانه 
وتم العمل
 واتحط ف العيد القومى لمحافظ القاهرة 2002

 
ومن يومها وهوه قاعد عنده فووووق 
شاهد ع الثورة واللى جرالها 
وعمال بيتفرج ع المهازل اللى حصلت 
وبتحصل ولسه هتحصل ف هذا الميدان العجيب 
بموقعه وناسه ..! 
 

 
وعلى بعد خطوات وأمتار .. 
وعند مجمع التحرير الشهير
 هنلاقى قصاده فراغ شوية يبقى جنينة وكراسى 

وبعدين فجأة يفتكروا ان فيه واحد من قادة المقاومة 
ضد الاحتلال الفرنسى 
وكان اسمه الشيخ عمر مكرم على سن ورمح
 ولازم نكرموه

والراجل اللى كان من زعماء الثورات الشعبية 

ضد المماليك والفرنساوية

 ثم هينخدع ف محمد على ويساعده للوصول للحكم

 ثم

ياخد شلوت معتبر من محمد سنكفولة
 ويتنفى الى دمياط ثم يعود لبيته بأمر محمد على
 ثم يموت حزينا مقهورا 
وبرضو مرة نبقى نحكى حكايته الا فعلا اتظلم قوى

وهوه اصلا من اسيوط .. 
لكن متعرفوش ايه اللى فكر محافظة القاهرة بيه 
وقررت ف الاحتفال بعيدها سنة 2003 
انها تحطله تمثال ف التحرير 
يلا ... كتر خيرهم

ونفس اللى حصل مع عبدالمنعم رياض 
هيحصل مع عمر مكرم 
 نفس الفنان .. فاروق ابراهيم اللى هيعمله
 ويتنصب سنة 2003 ف احتفال 
انا مش فاكراه الصراحة !

وطبعا لا داعى لأنى أذكر ان الحاج

 حضر معانا ثورة يناير

 وشارك فيها بعدة طرق 

ياما اتعلقت عليه لافتات ومطالب 

وياما اعتصموا عنده المئات 
وياما اتقابلوا عنده الناس وأفترقوا 
وياما انعلقت عليه هتافات 
وياما جريوا من جنبه ناس واتمسكت ناس 
... هيييييييييه ... 
 ذكريات

ونسيب عمر مكرم 
ونمشى لحد الكوبرى
 واخيرا ومخصوص سبته للأخر 
عشان هوه حبيبى واجمل التماثيل ف نظرى 
ومهواش واحد دول أربعة 
كنت حكيت قصتهم مع حكاية كوبرى قصر النيل
 هنا 



لكن بالمختصر المفيد 
انهم الأربع سباع كما درج زمان على تسميتهم

فاكرين مسيو جاكمار اللى حكينا عنه   بتاع تمثال محمد على وابراهيم باشا  وسليمان الفرنساوى ولاظوغلى .. هوه هواه برضو

واضح انه كان فنان كبير 
وانا لا بفهم ف البتنجان ولا حاجة 
بس عاجبنى ان شغله مليان تفاصيل 
 والخامة فيها فخامة وتماثيله اغلبها كدا

 والأسود بتاعتنا على فكرة 
مكنتش الوحيدة من صنعه
وفيه تماثيل مشابهة ليها موجودة ف باريس

 وفيه طراطيش كلام ان الاسود

 كان القصد منها ف البداية انها تحاوط 

تمثال محمد على اللى موجود ف اسكندرية  

لكن بعد كدا غيروا رأيهم 
وقرروا يحطوها على كوبرى قصر النيل 
 

وانا مش مقتنعة بالرواية دى
 لأن تصميم الكوبرى مبيقولش كدا
ولا حجمهم كمان مقارنة بتمثال محمد على 
 المهمممممم

التماثيل خلصت 1875 
وبيقولوا اتحطت ف مطرحها ع الكوبرى 1881 
وسنة يا دوب والثورة العرابية قامت
 قوم اييييه ؟

عرابى كان عنده اتباع لبش قوى ..
 للأسف يعنى هما اللى ودوه ف طوكر 
منهم الجدع اللى حرق اسكندرية 
 ومنهم الكابتن عليش 
 ماله بقى عليش دا .... ؟؟

 

الظاهر عليش كان عنده عقد نفسية 
مترسبة منذ الطفولة
متعرفوش عضته سلعوة ولا ايه .. 
 الاخ فجأة قامت ف دماغه 
الا لازم ندّور نشيل كل التماثيل

وطلع فتوى من شيخ الازهر ف هذا التوقيت
 بوجوب ازالتهم شرعا 
 وابتدوا بتمثال ابراهيم باشا اللى ف ميدان الاوبرا 
 ثم تبعوه بالاربع اسود وشالوهم

 
وفعلا اتشالوا وكانوا ناويين يسيحوهم 
ويعملوا منهم مدافع
 لكن الامكانيات مكنتش متاحة 
 فرموهم ف الأنتكخانة ونسيوهم

 
وعدت سنة وبقينا سنة 1882 
وعرابى ورفاقه بفعل الثورة المضادة 
والخونة الفلول ستهزم 
ويدخل الانجليز فعليا .. مصر 
والكوبرى لسه من غير اسوده .. !
  

ويتحاكم عرابى ويتنفى ورفاقه 
واتباعه كل واحد ياخد اللى فيه القسمة 
ما بين اعدام وسجن واقامة جبرية الخ 
وشوية وترجع السباع لمكانها القديم

وهتفضل مطرحها لحد ما ف عهد فؤاد
 يقرر يعمل اعادة انشاء لكوبرى قصر النيل 
ويأمر ان الأربع اسود يتحطوا ف جنينة الحيوانات

ويخرجوا من الجنينة على مطرحهم من تانى 
عشان يستقروا فيه للمرة الأخيرة 
ومينزلوش تانى بقى يروحوا أى حتة ؟!!! 

لأ هينزلوا
ف فيلم الحرب العالمية التالتة 
عشان ينقذوا العالم من هتلر وهويدا 
والشر الكامن اللى اسمه ايه ف البيضة المقدسة
 :) 

وانا تقريبا خلصت بعد ما شكلى 
كدا خلصت عليكم .. معلش 
  اقول الملاحظات بقى 
 واقوم اروح
 

1) فيه تماثيل مجبتش سيرتها ولا حكايتها 
عشان مبحبهاش 
زى تمثال سيمون بوليفار
اللى عمرى ما حبيته ابدا الصراحة 
رغم انه حلو فنيا 
 بس لا مننا ولا شكلنا ولا عرفت احبه

 
وفيه بقى تماثيل عرة 
 انا مش فاهمة اصلا 
ايه القيمة الفنية اللى فيهم غير الغلظة 

الواحد عينه بتوجعه لما يشوفهم 
 خصوصا تمثال طه حسين 
اللى ف اول شارع التحرير
 

والمؤسف انهم لشخصيات فنانة ومبدعة
و المفروض تماثيلهم تكون ملهمة 
واحلى وأشيك .. 
لكن يظهر انه العكس 
وعشان شعراء وأدباء .. فـ غلابة 
مش  زى بتوع السياسة ولا ايه .. يمكن ؟

وكله كووووووووم ولا التمثال بتاع عبدالوهاب 
اللى ف باب الشعرية دا كوم تاااانى 
 دول لو بيكرهوه مش هيعملوا المسخ دا !

2) تمثال لاظوغلى دا كنت زمان
 بفتكره تمثال لمحمد على لحد ما سألت بابا وقالى
 وكانت المحادثة كالآتى ...

 - بابا دا محمد على صح ؟ 

- لأ مش هوه 

- اومال مين ؟ 

- دا لاظوغلى 

 - لاظوغلى مين؟

 - لاظوغلى ! 

- ايوه مين ؟ 

- اقعدى ساكتة 

-..........

 انتهى

فياريت يعنى طلب سخصى من شهرزاد 
امانة عليكم 
لما حد من عيالكم يسالكم عن أى تمثال 
وعن اسمه وايه حكايته 
متبقوش تردوا عليهم كدا واحكولهم 
 :)

 

3) انا مبفهمش ف الفن ولا متخصصة 
بس انا كشهرزاد وكمواطنة عادية 
 بحب تمثال نهضة مصر
بحس بخامته ناعمة  خملية فيها جو حالم
وفيه جهد وفكرة مبتكرة 
والملامح شبهنا كدا
وقريب من البيئة بتاعتنا

وبحب تماثيل جاكمار كمان .. بدءا بالسباع
 وبعدهم تمثال محمد على 
والباقيين فيهم فخامة
 واهتمام بالتفاصيل 
وكل مرة اشوفهم ع الطبيعة اشوف جمال جديد

أسد قصر النيل دا 
بالنسبالى مقياس ومعيار

 لأى اسد بشوفه ف جنينة حيوانات لايف 
ولا ف فيلم ولا صورة .. بقارنه بيه علطول

ودايما بلاقى الأسود التانية جعانة وهفتانة 
وضعفانة وعاوزة يتعلقلها محاليل 
ومشفتش أسد ف جمال وقوة وعضلات السبوعة بتوعنا
عمار يا مصر ايام ما كانت سمنتك بلدى 
والبلدى يوكل حتى لو معمول ف فرنسا 

وكالعادة أبت الثورة
الا انها تزودلى ذكرى جميلة للكوبرى 
والأسود اللى عليه ... بالصورة دى

4) تمثال طلعت حرب عندى يعنى مكان 
هيتجمع فيه الورد 
اللى هيفضل دايما يفتح ف جناين مصر 
عشان طلع يستعدوا لطلعة من اياهم 
هنهتف فيها ضد الظلم وشخوصه أى كانوا مين

 

5) تمثال عبدالمنعم رياض له غلاوة عندى 
بسبب موقعة الجمل وغيرها 
كان جزء من أنقى ايام حياتنا اللى كنا محظوظين 
عشان عشنا وشفناها ... 
وكمان تمثال عمر مكرم شرحو 



6) احمد عرابى كل ما اقرى حكايات تخص ثورته
 بيصعب عليا الجدع قوى
كان حواليه ناس كتير مخها مفوّت
 وهما اللى وكسوه جامد 
طب وتمثال ابراهيم ومزعلكم 
عشان من اسرة محمد على وبتاع .. 
انما اسود قصر النيل حرام شرعا ليه
 وليه تنزلوها عشان تسيحوها ؟!! 
مش يبقى فيه منطق للامور
 ولا أى حاجة ف رغيف وخلاص !!

7) سباع قصر النيل من كتر جمالها 
اترسمت ف كروت 
واتصورت ف صور بالهبل 
يعنى جمالها كان وهم كدا
 قوم ييجى شوية غجر هذه الأيام
يرسموا عليها قلوب وتواريخ وشتايم
ويتنضفوا فيرجع الغجر يكتبوا تانى ... !!!! #اخص



8) شهرزاد حكت عن قرب الـ 15 تمثال واكتر
مش كلهم بأيدى مصرية وفنانين مصريين
 لكن الاكيد ان كلهم بفلوسنا 
ومفيهاش فصال دى ابدا 

 انا عندى اقتراح لأى حد هنا 

وياريت حد ينفذه هكون اول زبونة يا جماعة 

زى ما بينعمل تماثيل تحفة فرعونية

ليه محدش يعملنا من تماثيل الميادين دى 
تحف صغيرة .. 
 والله هيكسب جامد وهيلاقى ناس كتير تشتريها 
اما  اجانب عدوا ف الشوارع والميادين 
 وهيحبوا يحتفظوا بالذكرى
وكمان احنا المصريين هنحب نحتفظ بيها 

ونحكى حكايتها لعيالنا ونهادى بيها اصدقائنا واحبابنا

 وتتعمل من خامات بسيطة 

حد يفكرلنا ف المشروع دا وينفذه

واخيرا احنا اللى علمنا الدنيا مع اليونانين والطلاينة 
ازاى يعملوا تماثيل 
فتفشخروا بماضيكم الجميل 
واعملوا لمستقبل احسن وأجمل ... 

واخيرا 

شوف الحلاوة
 والدقة 
والجماااااااال 
وإنى أسخر ... 


 
 وقبل ما انسى 
حكايات التماثيل جمعتها من كذا مصدر 
لكن الاساس اللى عاتمدت عليه 
فهو كتاب

" دراسات فى التطور العمرانى لمدينة القاهرة  "
فتحى حافظ الحديدى 
الكتاب من الهيئة المصرية العامة للكتاب 
بـ 10 جنيه فقط
بجد ... كتاب رائع بيحكى قصص الأماكن 
وازاى اتغيرت واتبدلت عبر الزمن 
وفيه مجهود كبير



وتوتة توتة .. 
تصبحوا على ألف خير

---------------------------------

Heba @HappyGeddan
المحبوب في حياته بيتحب في مماته

Mohamed Atef @mohamedatef_ 
الحاج رمسيس دلوقتي في موقع انشاء المتحف

Hany Salama @hnsalama 
ده مش لوتس علي فكرة... ده حلفا
 :)

  مِرڤَت@ frikeko 

ميدان التحرير دا له الف حكاية و حكاية
 :)

Yasser Abdullah @Yasserigo 
 عندهم أسدين زينا بس مزيفين
 فين الكتابة اللي عليهم؟ 
مفيش قلبين وفرانسوا يحب فرانسواز ليه؟!

™الدبدوب ® @mazforever  هم صح.. بس دول نضاف  العيشة في فرنسا بقى ولاد المحظوظة

Samar Sayed @Samar__Sayed
ايوة في اسدين زيهم بالظبط فعلا 
في باريس انا شوفتهم

hmed khalil ‏@ahmedkhalilabdo   

 اكيد ده جد الشيخ عبمنعم الشحات

Rosana Mettry @RosanaMettry
قلبتي علينا المواجع بالصورة ديه يا شهرزاد

Mohammed Attya @mohammed_attya
التماثيل فعلا 
بتمثل تطور الذوق المصرى الرفيع 
على مر العصور

  samraa ‏@samraasamir 

ما هو سبب الوكسات اللي بتنزل علي دماغنا دي

 اننا مش بنقرا التاريخ ولا بنحاول نفهمه

 Dalia Salem ‏@MasryaGedan7 

 دى سباع متكلفه ومسرحه شعرها

 مش زى البؤساء اللى فى الغابه

 :-)