دقايق ونحكى فى عجالة عن حتة
عمرها دلوقتى اكتر من ألف عام
والحتة دى بيحكى عنها المقريزى فى خططه الشهيرة
وبيوصف بين القصرين بأنه
" هذا الخط أعمر أخطاط القاهرة وأنزهها "
والمنشأ فى زمن الفاطميين
بين القصر الشرقى والقصر الغربى
"وقد كان في الدولة الفاطمية فضاء كبيرا
وبراحا واسعا ، يقف فيه عشرة آلاف من العسكر
ما بين فارس وراجل "
وكان الجند بيقفوا فيه حراسة وبيتدربوا فيه
ولما جه صلاح الدين اللى حرص على محو
أى شىء يفكر الناس بعظمة وترف وابهة الدولة الزائلة
..
"فلما انقضت أيام الدولة الفاطمية وخلت القصور
من أهاليها ، ونزل بها أمراء الدولة الأيوبية
وغيروا معالمها ، صار هذا الموضع سوقا مبتذلا
بعد ما كان ملاذا مبجلا"
بيقولك
"وقعد فيه الباعة بأصناف المأكولات
من اللحمان المتنوّعة والحلاوات المصنعة والفاكهة
وغيرها ، فصار منتزها تمر فيه أعيان الناس
وأماثلهم في الليل مشاة ، لرؤية ما هناك من السرج
والقناديل الخارجة عن الحدّ في الكثرة ... "
لحمان جمع لحم يعنى
ومعرفش مالها لحوم .. انما ماشى !
ومش بس للأكل والفرجة ع المعروض
بيقولك انه التجمع كان
" لرؤية ما تشتهي الأنفس وتلذ الأعين
مما فيه لذة للحواس الخمس ، وكانت تعقد فيه
عدّة حلق لقراءة السير والأخبار وإنشاد الأشعار
والتفنن في أنواع اللعب واللهو ، فيصير مجمعا
لا يقدّر قدره ، ولا يمكن حكاية وصفه "
وأيام الفاطميين كان بين القصرين بعد العشا
ينقفل بسلاسل من ناحيتين
ويتمنع الدخول او الخروج عموما
اما بالنهار فكان ممنوع المكارية يعدوا بحميرهم
الا بإذن ومفيش جمل بحمولة تبن يعدى
ولا فارس بحصانه
طبعا بعد شوية القواعد دا انكسرت واحدة واحدة
وبقى المكان مشاع لدرجة كبيرة .. !
تقى الدين المقريزى اللى كان عايش أيام المماليك
بيحكى انه ف حوار مع الاخ تقيّ الدين عبد الوهاب
ناظر الخواص الشريفة
ودى وظيفة البعض يفسرها بإنها
اللفظ الخاص بمتولي مقرّ الحكم
الكابتن حكى للمقريزى ان جاله ضيف
وخده يفرجه الشىء والشويات عن العز اللى كنا فيه
" في كل ليلة من بعد العصر يجلس الباعة
بصنف لحمان الطيور التي تقلى صفا
من باب المدرسة الكاملية إلى باب المدرسة الناصرية
وذلك قبل بناء المدرسة الظاهرية المستجدّة
فيباع لحم الدجاج المطجن،ولحم الأوز المطجن"
وحكاله كمان عن واحد من الجنود اللى كانوا ساكنين
فى حارة برجوان
وان من زهقه طلع مرة مع واحد من غلمانه يتسلوا
ف وسط الزحمة بسرقة الآتى
..
"أنّه خرج في ليلة من ليالي رمضان ، وكان رمضان
إذ ذاك في فصل الصيف ، ومعه رقيق له
من غلمان الخيل ، وأنهما سرقا من شارع بين القصرين
وما قرب منه ، بضعا وعشرين بطيخة خضراء
وبضعا وثلاثين شقفة جبن"
الرجل ذهل وقال
" والشقفة أبدا من نصف رطل إلى رطل
فما منّا إلّا من تعجب من ذلك
وكيف تهيأ لاثنين فعل هذا
وحمل هذا القدر يحتاج إلى دابتين .. "
وبعدين تصادف انه قابله بعد كدا وسمع منه القصة
" فذكر أنهما كانا يقفان على حانوت الجبان
أو مقعد البطيخيّ ، وكان إذ ذاك يعمل من البطيخ
في بين القصرين مرصّات كثيرة جدّا
في كل مرصّ ما شاء الله من البطيخ
قال : فإذا وقفنا قلب أحدنا بطيخة
وقلب الآخر أخرى
فلشدّة ازدحام الناس يتناول أحدنا بطيخته
بخفة يد وصناعة ويقوم ، فلا يفطن به أو يقلب أحدنا
ورفيقه قائم من ورائه ، والبياع مشغول البال
لكثرة ما عليه من المشترين
وما في ذلك الشارع من غزير الناس
فيحذفها من تحته وهو جالس القرفصا
فإذا أحسّ بها رفيقه تناولها ومرّ "
وبس كدا شكرا
وطبعا كان بيعمل كدا مع بياع الجبنة !
وناظر الخواص بيبرر سهولة السرقة بالزحمة الشديدة
"فانظر ـ أعزك الله ـ إلى بضاعة يسرق منها
مثل هذا القدر ولا يفطن به من كثرة ما هنالك
من البضائع ولعظم الخلق "
وانا معنديش مشكلة مع البطيخ والجبنة
والله يعوض ع البياعين
والحرامى بالسريقة الحرام دى هيطفحها
المشكلة ف اللى جاى
المقريزى بيحكى عن رواية ضيف جه
مع قاضي القضاة عماد الدين أحمد الكركيّ
وبيقول انهم لما جم من الكرك في سنة792هـ
بالنص كدا
" كادوا يذهلون عند مشاهدة بين القصرين "
ابن الضيف يا نضرى اللى بيحكى انه
"أوّل ما شاهدّت بين القصرين ، حسبت أنّ زفة
أو جنازة كبيرة تمرّ من هنالك ، فلما لم ينقطع المارة
سألت ما بال الناس مجتمعين للمرور من ههنا؟
فقيل لي : هذا دأب البلد دائما "
الله .. انتا جاى تتفرج ولا تنق علينا يا دلعدى ؟!
ركز ف اللى جاى بقى
" ولقد كنا نسمع أنّ من الناس
من يقوم خلف الشاب أو المرأة عند التمشي بعد العشاء
بين القصرين ويجامع حتى يقضي وطره وهما ماشيان
من غير أن يدركهما أحد لشدّة الزحام
واشتغال كل أحد بلهوه "
يا دى الفضايح ؟!
شارع دا ولا اتوبيس !
المهم ان الولد بيقول انه كان بيعانى
عشان يقضى مشاويره فحد شار عليه
" وما برحت أجد من الازدحام مشقة
حتى أفادني بعض من أدركت أنّ من الرأي في المشي
أن يأخذ الإنسان في مشيه نحو شماله
فإنه لا يجد من المشقة كما يجد غيره من الزحام
فاعتبرت ذلك آلاف مرات في عدّة سنين
فما أخطأ معي
واللى شار عليه قاله السبب
"ولقد كنت أكثر من تأمْل المارة بين القصرين
فإذا هم صفان، كل صف يمرَ من صوب شماله كالسيل
إذا اندفع، وعلَّلَ هذا الذي أفادني
أنّ القلب من يسار كل أحد
والناس تميل إلى جهة قلوبهم
فلذلك صار مشيهم من صوب شمائلهم
وكذا صح لي مع طول الأعتياد"
بس والمقريزى خلص
وفاضل انا اللى مخضوضة ومزبهلة
كدا يا اوغاد تفضحونا قصاد السياح ؟
كدا ف نهر الطريق ؟
تحصل العمايل دى ؟
وكمان بيقولنا خلف الشاب أو المرأة ؟
وفين المسخرة ؟
ف أزحم شارع فيكى يا قاهرة يا فاطمية ؟!
جنب المساجد وف الجو الروحانى دا
يا قلالة الادب وعدماء الاخلاق والرباية ؟!!
أخص
لأ وبيقولك آل عشان اخلص مصالحى ومشاويرى
بمشى ف السكة الشمال أسرع
واكمنها ناحية القلب بتسلك
واللطيف ان المقريزى
لم يستح أن يحكي الفضايح دى عادى خالص
بس انا لو حد سألنى
لأ معلش .. احنا شارعنا أشرف من الشرف
وشوووف الزمن ...
من بين القصرين اللى بيقف فيه حرس سلاح
ويتمنع فيه السير من العشا حتى الفجر
إلى أتوبيس بين القصرين
وعيب يا كابتن احترم نفسك انتا واللى معاك
الحاجات دى متتعملش ف الأتوبيس !
..
وبس خلاص خلصنا
-----------------------
