الحدوتة عن الكوليرا
لما دخلت مصر عام 1883م
المصادر
1)
مذكراتى فى نصف قرن
احمد شفيق باشا
2)
مصر والسودان فى اوائل عهد الاحتلال
عبدالرحمن الرافعى
....
والصور من على مواقع مختلفة لا يتسع المقام لذكرها
وناخد بالنا بقى عشان المصدر الاول والأساسى
لأحمد شفيق باشا
واللى كان ربيب السرايا من صغره
ومتربى على حجر توفيق
ومن بعده بقى احد دراعات عباس حلمى التانى
وصعد ف المناصب لحد ما بقى رئيس الديوان الخديوى
وبالتالى فهو دولجى قح
ومن قعر الحلة
ومن تحت الحوض
ومن قلب الكنيف الخ
وأول ما يبدأ يتكلم عن الكوليرا ف مذكراته
لازم هيطلع الوساخة من جواه تلقائى
ويظروفنا الجملة الآتية ...
" لم تكد الثورة العرابية تضع أوزارها
وينقضى عهد الفتن والاضطرابات التي أفضت
إلى الاحتلال الانجليزى حتى منيت مصر بآفة جديدة
لا تقل عن آفة الثورة ضررا بالبلاد وفتكا بالعباد "
والثورة العرابية رغم فشلها كانت عملالهم
خرم ف نافوخهم
فلازم يحطوها مع الوباء ف جملة واحدة !!
القصد ..
بعد المقدمة اللى خارجة من قاع الـ 
دى
دى
هيقولنا الآتى
" ذلك انه في 22 يونيه 1883 ظهرت الهيضة
في دمياط وانتشرت في سائر بلاد القطر "
وحد يقولى يا سلاااام ع الدقة
عارفينها باليوم يا شهرو ؟!!
اقولكم هنعرف اهو السبب
أصل بمجرد انتشار الحالات
الناس قالت مين اللى دخل علينا برجل غراب شمال
وكعبه كان محنى .. مفيش الا الانجليز
اللى كان بقالهم داخلين ع السنة قاعدين اهو
الانجليز قالوا مش احنا
دا الوباء جاى من جوا مصر متلزقوهاش فينا !
القصر قال دى من برا
المهم اتعمل تحقيق وكانت نتيجته ..
" التحقيق الرسمي اثبت ان أحد وقادى السفن
التي وصلت الى بورسعيد آتية من الهند
قبل ظهور الوباء ويدعى محمد خليفة العطشجى
نزل الى البر وجاء الى دمياط وهو يحمل جراثيم الداء
ولم يكاد يصل إليها حتى ظهر الوباء فيها"
ومن هنا تم تحديد التاريخ من معاد وصول
السفينة كانت جاية م الهند
الرافعى أكد ان القبطان السبب
"وساعد على سريان عدواه بها رطوبة مناخها
وكثرة ما فيها من الحوارى الضيقة المتعرجة
ومرور خليج فى وسطها يستقى منه سكانها
ويصل ماء النيل إلى الأراضى المجاورة لها
وكان سببا فى زيادة الرطوبة فى منازلها
وزاد منها قلة الوسائل الصحية
التى كانت عليها مصر"
وخدام افندينا لازم يرص الطقم بقى
" وقد عنيت الحكومة المصرية بامر هذا الوباء
أكبر عناية فاتخذت اشد الاحتياطات الصحية
للوقاية منه وحصره في مناطق معينة
واتت اللجان في مصر والاسكندرية وغيرهما
من مدن القطر وخصوصا في دمياط والمنصورة
لاسعاف المصابين وارشادهم الى طرق الوقاية
"واستئصال شأفته واتقاء مضاره ووصلت
الى القطر المصرى عدة بعثات طبية للبحث
في منشأ الوباء والاشتراك مع اللجان الطبية المصرية
للعمل على ابدته ودرء شره عن البلاد"
ثانية واحدة بقى وقت مستقطع
لازم ناخد بالنا ان مصر ف هذا التوقيت
كانت لسه واقعة طازة تحت حكم الاحتلال
والانجليز مش هيقعدوا ف بلد مريض سكانه
لان دا يضر بيهم وبمصالحهم
ولهذا تم استدعاء علماء من عدة دول
عشان الوضع الصحى الزفت اللى كانت فيه
الصحة العمومية ف مصر
ومفيش داعى نقول كان شكله ايه !!
الناس كانت بتموت بأعداد كبيرة
خصوصا ف الاحياء المكتظة بالسكان
وتفتقر الى النضافة بسبب
اهمال حكومة جناب الخديوى
واهمال جناب الخديوى شخصيا لحال الشعب
وكل همه كان منصب على محاربة عرابى والعرابيين
اللى عاوزين يخلعوه من عرشه .. الويحشين
المهم .. العلماء الاجلاء وصلوا
" ومن هذه البعثات بعثة ألمانية برياسة الدكتور
كوخ المعروف
وبعثة فرنسية برياسة باستور العالم الكيماوى الشهير
ولحقت بهما بعثة أخرى روسية مؤلفة
من اشهر اطبائها وقد اجمع رأى هذه البعثات
على ان الوباء آت من بلاد الهند "
مش من عندنا يعنى قصده يقول
لكن كعب الشوم سره باتع
" وعلى رغم ما بذل من الجهود الكبيرة
وما اتخذ من الوسائل الفعالة التي اشتركت
فيها البعثات الدولية المشار اليها مع الحكومة
واللجان الطبية المصرية فقد انتشر الوباء
في أقاليم القطر ومدنه انتشارا مريعا وفتك بالارواح
فتكا ذريعا
والغلابة أول الضحايا
"وأشد ما كان ذلك في الاحياء الوطنية المكتظة بالسكان
ولا سيما حى بولاق حيث كانت ضحاياه تعد بالالوف "
"وبلغ من ذعر الناس وخوفهم أن ألوفا
من نزلاء القطر غادروه الى سوريا وأروبا
وأقاموا بها حتى تقلص ظله من البلاد "
وأجانب كتير طفشوا لأنهم عارفين
مدى قدرة أفندينا على التعامل مع الوباء وكدا
الرافعى بيقول المرض انتشر
ف
"شربين والمنصورة وطلخا وسمنود والمحلة الكبرى
وطنطا وزفتى وميت غمر والسنبلاوين ومنوف
وكفر الزيات ودمنهور وكفر الدوار والإسكندرية
ورشيد وبورسعيد والإسماعيلية والسويس والزقازيق
ثم القاهرة وبنها والجيزة وبنى سويف
والمنيا وأسيوط وجرجا وقنا"
وان احيانا أعداد المتوفين كانت ف بعض الأيام
تحصى بـ "المئات" رغم الجهود المبذولة م الحكومة
والى فيما يبدو كانت متأخرة وقاصرة
وطبعا لازم شفيق
يجيب سيرة الزبلة العرة كًناسة الحكام
"نحن نذكر ان جناب الخديوى كان يطوف بنفسه
احياء الإسكندرية وشوارعها التي كانت قد انتقل
اليها الوباء في 7 يوليه
ويتفقد المستشفيات والمصحات ويواسى المصابين"
ويكمل فاصل التطبيل
" ويصدر الأوامر المشددة بالمواظبة على تنظيف
المدينة وتطهيرها بالمواد الكيمياوية
ونسج الحكام في الأقاليم عى منوال الخديوى
في تفقد الأماكن الموبوءة
ومراقبة تنفيذ التحوطات الصحية
وارشاد الناس اى طرق الوقاية "
والاعلام بتاع وقتها اشتغل
" وانبرى الأطباء لنشر الارشادات الصحية
في الصحف السيارة وانصرف الكتاب الى الكتابة
في هذا الموضوع الهام تنويرا للأذهان "
واتعمل حجر صحى ف مكان ما بجبل المقطم
وخد الجاية دى ..
" وانشئت في مصر لجنة كبيرة لجمع الأموال
وانفاقها على الموبوئين
وعلى العائلات التي أفقدها الوباء عائليها "
صناديق ياما يامه يا هبة اهو ومن زمااااان
وفى سياق غريب عجيب مريب
"ومما يجدر بالذكر في هذا الصدد انه
في جملة التحوطات الصحية التي اتخذوها
وقتئذ انهم حظروا على الناس اكل الفواكه
مثل البطيخ والشمام والعنب ونحو ذلك
ولكنهم ظلوا ياكلوها خفية
وهبطت اثمانها هبوطا كبيرا "
وف سياق اغرب أعجب أمربب
" وعلى ذكر التحوطات الواقية أذكر ان
احد الموظفين الفرنسيين في المعية
وهو المسيو أودان كان قد ألف أكل الثوم
وفى أثناء الوباء كان يكثر من أكله اعتقادا
انه مطهر وقاتل للميكروبات
والظاهر انه كان على صواب "
الله !
وأبو الشفاشيق بيحكيلنا طرفة
بما اننا قاعدين فاضيين ف ليالى الحظر الحزينة وكدا
وبيقول انه واحد كان راكب مع مكارى
(سواق الحمير يعنى باعتبارها
المواصلة الشعبية الاولى وقتها )
فالمكارى كان صايم وحران فركن على جنب يرتاح شوية
ف جية بتوع الصحة
فالراكب قالهم دا عيان باين خدوه !
متعرفوش الراكب كان عاوز يزوغ من الأجرة
ولا كان عاوز ياخد الحمار ويهرب بيه ولا ايه !
القصد بتوع الصحة راحوا ماسكين المكارى
وحطوه ع النقالة بالعافية ومشيوا
الراجل يصرخ حديد بعيد انا مش عيان
لا ممكن حد سال فيه
لا بتوع الصحة
ولا حتى المارة !
ف السكة عدوا على شجرة بفروع مدلدلة
راح المكارى ماسك ف غصن فيهم ولا يمكن يسيبه
وتعالى يا قناوى خلاص هنجوز هنومة
ويلا يا بلحة ع العنبر بتاعك !
مفيش فايدة
بالصدفة عدى دكتور
كان المكارى عارفه ووصله قبل كدا
فصرخ عليه
الحقنى يا حكيم م العالم دى !
" وتقدم الطبيب الى رجال الصحة ووبخهم مبينا خطأهم
في ما فعلوه مع رجل هذا شأنه معهم
لأنه لو كان مصابا
لما استطاع التعلق بغصن الشجرة
والمقاومة على هذا النحو
وهكذا تخلص المكارى من رجال الصحة
وانطلق في سبيله بين ضحك الناس "
وخلص شفيق الحدوتة الظريفة
عشان يهيئنا للفقرة التالية ويشربهالنا بسلاسة
وهى
" ويؤخذ من التقارير الصحية التي وضعت عن الوباء
بعد استئصاله في أواخر أغسطس سنة 1883 ان
عدد ضحاياه في مختلف انحاء القطر المصرى
" بلغ حوالى الأربعين ألفا
يا بلاش يا أخى 40 ألف ف شهرين
شوية فكة
والحقيقة ان بسلامته مقالش الحقيقة كلها طبعا
لغرض ف نفس يعقوب
الرافعى اللى قال .. انه المرض خفت وطأته ف اغسطس
لكن فضل مستمرة حالاته لحد ديسمبر
بعد ما خلص على حوالى (60) ألف بنى آدم
وشبشب أفندينا بيقول
"ولولا احتياطات الشديدة التي اتخذت للوقاية منه
وحصر شره واجتماع القوى الفعالة على مكافحته
لتفاقم الخطب وعظم البلاء
ولبلغ عدد ضحاياه اضعافا مضاعفة "
ايوه
كان ممكن يموت اكتر من كدا
بس احنا لحقانكم
واحمدوا ربنا
وبوسوا ايدكم وش وضهر
ووصلة تطبيل عاشرة
" ومن اثر انتشار هذا الوباء وفتكه بالارواح
ان عنيت الحكومة بإصلاح حال المستشفيات
وتنظيم الوسائل الواقية وغير ذلك "
الحكومة برضو ؟
قصدك الانجليز بقى يا بابا
قول الصح وخليك دقيق
والقصة خلصت بس لازم نقول
أفندينا أهمل ف حال البلد عشان مكنش فاضى
الا لمحاربة خصومه للحفاظ على عرشه بأى تمن
ولو كان الاستعانة بالمحتل اللى جه
وقعد 80 سنة بسبب الزبلة الفسل راس القُلة دا
وانا رأيى انهم كانوا يسموها
هيضة تيفة
بدل اسم الكوليرا والله
هوه ابن حلال ويستاهل
ثانيا
الاهتمام بالقطاع الصحى ف العصر الحديث
بدءا من محمد على كان لصالح الحاكم وفقط
الباشا الكبير كان عاوز مواطن سليم
عشان يشتغل ف المصانع ويزرع ف الأرض
ويحارب ف الجيش لمجد قاطن القلعة
وكل حاجة تبع الباشا
قطن الباشا
قمح الباشا
فلاحين الباشا
عسكر الباشا
أى حاجة حتى الصحة
واللى جم بعد كدا
حسب شخصيتهم وقدرتهم على ادارة البلاد
بيفوتوا لقمة للمواطن الغلبان
ويبلعوا هما الرغيف والطابونة بحالها !
لحد ما جه هذا الوغد
وكلنا يعلم ماذا فعل بمصر
قوم بعد ما ابنك انتااااا يجيب الانجليز يحتلوا البلد
يجيى الشماشرجى بتاعه وشبشبه يقولنا أصل
" منيت مصر بآفة جديدة لا تقل
عن آفة الثورة العرابية ضررا بالبلاد وفتكا بالعباد "
!!!!!!!!!!!!!!
يا اخى انتا اللى آفة
والاحتلال آفتين
واللى استدعاهم ومشغلك تلات آفات
خمسة عشرة عشرين بالمستريح !
بس ولما ييجى حد عاوز يعرف اجابة السؤال التاريخى
بتاع الست فاتن حمامة ف دعاء الكروان
وين هنادى يا خال ؟
عبعليم خطاب واحنا نعرفها الآتى
(1)
هنادى و59 الف و999 واحد راحوا ف الوبا
(2)
احمد شفيق واللى زيه مطبلاتية كدابين ولاد حرامية
ف هيئة مسئولين
(3)
يندعق توفيق وش القملة
ويندعق أبوه
وأبو أبوه
وأبو أبو أبوه
الكل كليلة
وشكرا
بس خلاص خلصنا
-------------------------
ليست هناك تعليقات:
إرسال تعليق