قالك ايه يا سيدى ...
وفضلت أكون ف نفسى
أكون ف نفسى
لحد ما كومت نفسى
وبعدين دورت على نفسى .. ملقتهاش
وفضلت أدور لحد ما لقتها متكومة ف المرارة
#حسن_عابدين
#إفرض
الحدوتة الليلة دى عن شخصية مميزة
انا من صغرى بحبها لأكتر من سبب معروف
وغير معروف
الا انه سبب ربانى من عند الله لما يحببك ف حد بعيد ...
ويفضل الحد دا يكبر معاك سنة بسنة
لحد ما يبقى جزء من ذكرياتك وعقلك وقلبك ومشاعرك
... وحاجة من زمن جميل راح ومبيرجعش
صاحب الحدوتة يبقى حسن ...
ابن الحاج عبدالوهاب عابدين عين أعيان بنى سويف
ومن وجهائها وكبراتها
والحاج عبوهاب عابدين دا بقى
كان غاوى ادب وسياسة
وكان بيعمل صالون كل أسبوع ف بيته الكبير
وبيعزم فيه الناس المهمة والعالم الحلوة ...
كان راجل غنى وابن أصول
وكمان كان راجل صحته ما شاء الله كويسة
وبيقولوا انه خلف خمآشر ف عين العدو
ولاد وبنات وكان رقم 14 ف القايمة
هوه حسن
الذى حضر الى هذا العالم سنة1931
حسنوله وهوه صغنن
كان بيحضر الصالون بتاع أبوه
ويقعد وسط الكبار يسمع كلامهم وخناقاتهم واشعارهم
والاغانى اللى كانت ساعات تزين القعدة
وبعدين جه معاد المدرسة
وعاوزاكم تبصوا ف الصورة كدا
دى لأطفال ف الروضة ف اوائل الأربعينات
وشوفوا الطعامة والرقة والحلويات بقى
وبعدين تتخيلوا ان حسن عابدين
كان طفل زى العيال دى تمام لما دخل المدرسة
ف بنى سويف الأبتدائية
:)
والعهدة على الراوى وهوه حسن شخصيا
ف حوار مع مفيد فوزى حكى انه ف الروضة
كانوا بياخدوا حصة المحفوظات
وهوه كان شاطر ف الألقاء
قوم ايه
المدرسة بتاعته وكان اسمها أبلة فاتن
كانت بتطلعه يقول النصوص قصاد العيال
وتبقى معجبه بيه جدا
وتقول للعيال صقفوله فينبسط هوه جدا بالحكاية!
وبعدين دخل المسرح المدرسى
بسبب موهبته ف الألقاء والخطابة
وكانوا بيدوله أدوار الاب بسبب حجمه وطوله
وجدية ملامحه
ورصانته .. الخ الخ
بس وعجبته الحكاية قوى
وقرر يبقى فنان
ويمثل
طبعا ابوه معندوش الكلام دا دا راجل صعيدى ناشف
ولا ممكن يسمح بالمسخرة دى ف العيلة
حسن مسكتش
راح وانضم لمسرح ثقافة بنى سويف
وبقى يشارك ف المسرحيات والاعمال الفنية
وكان بيمثل من ورا أبوه
وامه بس اللى كانت عارفة
وعزمها مرة على عرض
بس والست جت مشكورة
واتفضلت قعدت وسط المتفرجين
والعرض ابتدى
وحسن ملعلع ع الخشبة
وبعدين جه احد زملائه ف المسرحية
وراح مديله بالسكينة
الدم غرق قميص حسن
راحت الست من الصالة ... راقعة بالصوت
وانهارت كأى ام مصرية صميمة
ابنى انصاب
ابنى انقتل
هىء هىء
وولعوا النور والعرض وقف
وزميايله قالوله الحق الحاجة عاملة ميتم تحت
حسن راح نازلها
عشان يقولها انا صاحى
وان دا حبر احمر فسكتت!
وكملوا العرض
:))
وبعد فترة حسن اشتهر
وبقى معروف للناس
وراح ولاد الحلال اتطوعوا
وقالوا لأبوه الحاج عبوهاب الحق ابنك بيمثل ..!
#كأنه_بيشرب_سجاير_وكدا
راح الحاج ناده حسن ومبعترله كرامته
ومفيش الكلام الفارغ دا
وزاد وأفاض كمان انه مش هيبعته القاهرة
يكمل تعليمه الجامعى ... ليه يا حاج كدا ؟؟؟
قالك عشان لو باعته القاهرة هتندهه النداهة للأبد
ومش هيعرف يسيطر عليه
وهيتلف أمله
فقرر يقعده ف بنى سويف يمسك الارض
ويشوف احوال الزراعة
وبس
حسن اضطر يوافق الحاج على كلامه
واكتفى بشهادة البكالوريا وقعد كافى خيره شره
لحد ما ف مرة حضر عرض عندهم ف بنى سويف
تبع المسرح العسكرى
المسرحية كان اسمها "كرباج أفندينا"
عن احمد عرابى وكفاحه
فعجبه العرض بس معجبوش الممثل اللى عمل عرابى
وراح يتناقش ف الكواليس مع المخرج
وسألهم عن تفاصيل وحاجات
وف الأخر نوى وقرر ينضم للنوع دا من المسارح
اللى ماشية مع دماغه وجديته
بس هيعمل كدا ازاى
ويعمل ايه ف الحاج ابوه ؟؟؟
قرر يعمل لفة كدا عشان يوصل لهدفه
الاول اتعين ف محكمة بنى سويف ..
سكرتير ف قلم المحضرين
فطبعا الحاج هبوهاب رحب
بعدها بشوية نقل ورقه ع القاهرة
وبكدا تحرر من القعاد ف بلدته
وبقى ف القاهرة رسمى فهمى نظمى
قام مستقيل من شغلانته
و راح مقدم طلب واتطوع ف المسرح العسكرى
وبقى فرد فيه فعلا
الكلام دا كان سنة 1952
لما بقى حسن عابدين عضو بالمسرح
ومعاه مين يا عيال ؟
ابراهيم الشامى
وكمان حسن حسنى .. تخيلوا !
قدم حسن عابدين وقتها هوه وبقية زمايله كام مسرحية
بس كلها كانت محدودة المشاهدة
وف مرة قالوله جمال عبناصر .. هيحضر العرض
وفرح جداااا
وكانوا بيقدموا بالصدفة ساعتها
وكان سنة 1954 الكلام دا
مسرحية "فى سبيل الحرية" المتاخدة عن رواية
لعبدالناصر نفسه فحسن انبسط
وبعدين الزيارة اتلغت ف آخر لحظة
وحسن اتشائم وحسن حسنى بيحكى انهم لولا نكسة 1967
كان زمانهم اتحنطوا أحياء
ومحدش سمع عنهم لحد ما ماتوا ... !
المهم ...
بعد النكسة اتحل المسرح العسكرى
وإتسرح اعضائه وخلاص كل واحد يروح ف حاله
و يشوف نفسه
فتخيلوا حسن قعد من 1952 لحد 1967 مغمور
وف الضل كام سنة من شبابه !!!
قصره
رب ضارة نافعة فعلا
حسن عابدين ابتدى يدور على فرص ف المسارح العادية
فلقى مسرح يوسف وهبى
فأنضمله
واشترك ف مسرحيات زى "بنات الريف"
و"بيومى أفندى" وغيرها
وحسن عابدين بيحكى انه بسبب الشكل والصوت والطلة
عمل مرة دور أبو يوسف وهبى شخصياااااا
ف احدى العروض #تخيلوا؟
واتحبس ف دور الاب دا من ايام مسرح المدرسة
لحد مسرح الكبار كمان
وبس ركن عنده
ومرجعش لورا تانى
:)
ومن مسرح يوسف وهبى ابتدى ينطلق بقى ..
وجاتله فرصة العمر
ف مسلسل "فرصة العمر" مع محمد صبحى
سنة 1972 ف شهر رمضان
مع نسبة المشاهدة العالية
وصبحى كان نجمه طالع
والمسلسل عّلم مع الناس
ودور حسن عابدين كان مميز
خلاه بعد كدا يترشح لدور ف المسرح
هوه اللى عمله شغل عالى
وأقصد بذلك مسرحية "نرجس" ..فاكرينها؟
المسرحية كان بيعمل فيها دور الاب الصعلوك
اللى مش قادر يمنع نفسه من استغلال بنته
والتمتع بثروة جايلها من عريسها
بينما هوه ابن بيئته وفقره وجهله
نفس التيمة اتعملت ف فيلم "المتوحشة" لسعاد حسنى
وبالمقارنة بين العملين
هتلاقوا عابدين عمل لشخصية الاب روح وطعم مميز
عن توفيق الدقن ف الفيلم
مسرحية "نرجس" قعدت على مسرح الدولة
تتعرض قد سنة بحالها
وبعدين ابتدى المخرجين يلتفتوا للموهبة دى
ويستعينوا بعابدين ف أعمالهم
ف المسرح والسينما والتليفزيون
ف السينما كان بخته ف البداية قليل
وظهوره يكاد يكون غير محسوس لحد التمانينات
اما التلفزيون فشده ونداه
والمسرح فضل هوه ملعبه الاول
والحب الكبير
ف مسرح الدولة عمل "نرجس"
وبعدين اتنقل للقطاع الخاص
واشتغل مع محمد نجم ف اجمل واقوى مسرحياته
"عش المجانين"
وبعدين مسك فيه بإيده وسنانه
المخرج جلال الشرقاوى
وبقى نجم مسرح الفن
وعمل معاه "قسمتى"
"افرض"
"ع الرصيف"
وآخر مسرحياته اللى متسجلتش للأسف .. "بولوتيكا"
ف التلفزيون كان بيقدم أدوار بسيطة
وضيف شرف .. لحد ما جاله مسلسل "فيه حاجة غلط"
وبعده بقى نجم
وله اسمه اللى يستحقه
وبعدها توالت الأعمال "برج الاكابر"
"هو وهى" "نهاية العالم ليست غدا"
"اهلا بالسكان" "انا وانت وبابا ف المشمش" وغيرها
وف السينما قدم 15 فيلم
واغلبها أدوارتانية و ثانوية
بس احنا نفتكر منها "فيفا زلاطا"
"درب الهوى"
"عودة ريا وسكينة "
ابن حسن عابدين بيحكى عنه انه مكنش له ف السهرات
ولا الخروجات ولا الشلل
واصدقائه هما هماهم اللى بدأ معاهم حياته الفنية
متغيروش الا قليلا
ابراهيم الشامي وحسن حسني
فردوس عبدالحميد كريمة مختار وزوجها نور الدمرداش
ليلى طاهر
ودول كانوا بيشاركوه الأعمال كمان ..
رفاق عمر يعنى
بس اكتر حد كان بيضحكه كان حسن حسنى
:)
والأبن بيحكى ان عابدين كان ف حياته الخاصة
مهموم دايما بشغله
وكان طيب وحنون جدا
وكان بيزعل من اى حد من ولاده
لو تكاسل ف الصلاة وبيعاقبهم بالخصام
وكان متجوز من بنت عمه
وكان بينهم قصة حب جميلة
وكانت مديرة مدرسة
والأبن بيقول انهم كانوا متفاهمين
وعمره ما شافهم بيتخانقوا ابدا .. !
وكان حسن عابدين ف حياته العادية عاطفى ودمعته قريبة
ومرة كان بيتفرج على فيلم بلال مؤذن الرسول
وبكى ف احد المشاهد بكاء شديد
فجت مراته وطبطبت على كتفه
وقالتله ان شاء الله تروح تزور النبى
وبيحكى الأبن حكاية عجيبة قوى
عن الفترة دى
لازم نقولها
وهيا انه سافر حسن عابدين يعمل عمرة
كان ساعتها بيشتغل مع نجم ف "عش المجانين"
المهم سافر وهناك
وهوه عند قبر النبى الغالى ...
شافه واحد م الحرس وعرفه
راح طارده وقوله امشى بعيد انتا ممثل وبتاع
التصرف دا طبعا حز ف نفسه جداا
ورجع من العمرة حزين
وراح متصل بمحمد نجم وقاله شوفلك ممثل غيرى
انا خلاص مش هشتغل
وقعد بعدها يروح الجامع ويرجع م الجامع
ويدخل اوضته ومبيكلمش حد من شدة الحزن
:(
العيلة راحوا متصلين بكل اصدقائه وعبثا يقنعوه
الا ابراهيم الشامى صديق العمر
اللى كانت علاقته كويسة بالشيخ الشعراوى
وكأنها لقية ولاقاها ...!
الشامى زار حسن وقاله احنا نروح نسأل الشعراوى
اللى بنعمله دا حلال ولا حرام
واللى هيقوله ننفذه !
حسن اقتنع بوجاهة الفكرة
وراحوا فعلا للشيخ الشعراوى اللى قاله
وبمنتهى البساطة انتا بتقدم فن نضيف
ليه تعتزل وتسيب الساحة للفن الهابط .. ؟!!
كمل واختار أعمال كويسة وانفع الناس
دا أحسن بكتير من قعادك ف بيتك ..!
وفعلا خرج عابدين من عنده
وهوه مقرر ميعملش أى عمل أى كلام ...مهما حصل
وبدأ يفكر ف مسرح اسلامى وحاجات كدا
وفضل يشتغل ف التلفزيون والمسرح وقليلا ف السينما
واثناء عرضه لمسرحية بولوتيكا حرارته ارتفعت
وتعب وراح لدكتور
والدكتور شخص الحالة بعد الفحوصات والتحاليل
بأنها لوكيميا
وازاى اصلا الراجل دا واقف على رجله كدا
وسفروه انجلترا للعلاج
وهوه شهر يادوب
وربنا استرد وديعته ف 6-11-1989
وقبل حتى ما يتم الستين
واندفن ف مسقط رأسه ... بنى سويف
بصوا ..
حسن عابدين بالنسبالى رحلة عمر ..
بدأتها من وانا عيلة لحد ما ربنا افتكره
عمل عمل وحاجة حاجة
الراجل دا كان بيتنفس فن وثقافة وشياكة
كام واحدة فينا شافته الاب
اللى مش راضى عن خطيبها او جوزها
وبسرعة ملامح وشه والغضب والعصبية تطلع
زى فرصة العمر تمام
والموظف الكبير لكن المطحون
وازاى قادر يلم ولاده حواليه
ويكسب احترامهم بأخلاقه وثباته ع المبدأ
رغم ان فيه حاجة غلط !
وتنويعة تانية للبطل المحافظ على مبادئه
ومواجهة الفساد المستفحل ف أنا وانتا وبابا ف المشمش
والبحراوية اللى هيا البلد ازاى بقت
كلها ف المشمش
وعشان تنضفها ... عارف امتى ؟؟
ف المشمش
بحبه كمان ف مسلسل يمكن كتير منك مشافوش
اسمه ماشى يا دنيا ماشى
كان كوميدى مع محمد عوض وفردوس عبحميد
وبيلعب على تنويعة الاب اللى ابنه تاه منه
وييجى ابن مزيف ينصب عليه
فالأب يحبه والأبن النصاب ضميره يصحى
والقصة دى اللى اتهرست
ف ميت الف عمل فنى قبل كدا
اشهرها فيلم لمحمد فوزى ومسرحية لمحمد صبحى الخ
كان عامل الدور حلو قوى ..ومنتهى الانسانية
وحلقة واحدة ف "هو وهى" مع سعاد حسنى
غيرتلى النظرة النيلة اللى كنت بحسها
تجاه الجواز بين اتنين بينهم فرق سن
وحسن عابدين وقتها كان المعادل الطيب
لزكى رستم وعمو عزيزز الشرير
ف فيلم اين عمرى
والرعب اللى كان عاملهولى !
جاد الحق عويس شبرا
والشخصية الرهيبة دى اللى مستحيل تتخيل حد تانى
غيره يعملها بالحلاوة دى أبداااا
وشفيق يا راجل
الجملة دى بتاعت شفيق واللى بعد المسرحية بسنيييين
هتيجى ف 2012 وتتصدر الانتخابات الروئاسية
والناس تقولها
وتجيب المشهد من اوله
دوره ف "نرجس" وازاى كان أب لسهير البابلى
اللى من سنه هيا ورشوان توفيق
وازاى عمل للشخصية كيان ومذاق
القاضى "كمال" ف "ع الرصيف"
ومسرحية بتحاكم الانفتاح
وزمن السادات اللى اخد ف وشه انجازات ما قبله
وآه يا دمااااغى
ومظاليم البلد كلها اللى قبل الثورة بشهور
وبعدها .. لسه قاعدين ع الرصيف ... وخلف القضبان !
مسلسل "نهاية العالم ليست غدا"
وحكايته مع المخلوقات الفضائية
حاجة كدا مختلفة عن وقتها
ورغم قلة الأمكانيات النص كان حلو
وياريتهم يعرضوها تانى
ياريت
ومسرحية "افرض" اللى على تنويعة فيلم "زهايمر"
وغيره
عن هذا الراجل اللى بيجننوه عمدا
عشان يحجروا عليه ويستولوا على فلوسه
اتفرجوا ع المسرحية دى خصوصا فصلها التالت
لأنه الاقوى
وشوفوا اخر عشر دقايق
لما البطل بيكتشف ان مراته هيا اللى عاوزة تجننه
وازاى بيشخط ف بنته لما بتعرفه اللى حصل
وازاى الشخص اللى طول المسرحية هيتجنن
عشان يعرف الباقيين حقيقة انه عاقل
فلما بيعرف الحقيقة بيتجنن!!
وكل الادوار دى كووووم
ودوره ف فيلم "درب الهوى" كووووم تاااااانى يا ثااااامح
والمثير للغرابة ..ان حسن عابدين بعد عرض الفيلم
اتجنن م الغضب
وكلم المخرج حسام الدين مصطفى
وانفعل عليه
واتهمه بالخيانة وحاجات كدا
ليه؟
ابن حسن بيحكى ان عابدين كان عامل مشاهد كتير
جنب اللى ف الفيلم
فالمخرج شال منها
ودا ضايق حسن عابدين جدا
وقفل السكة ف وش حسام ..!!
حسام الدين مصطفى جاله البيت
وحاول يهدى فيه ويقوله الأنتاج وابصر ايه
فعابدين مقتنعش
وقاله انه عمره ما هيشتغل معاه تانى لأنه غير أمين عليه
وأصلا أصلا الفيلم اتمنع
واتشال من العرض ف السينمات بسرعة
هوه وفيلم "خمسة باب"
لكن طبعا ف سوق الفيديو الرايجة وقتها
ف الخليج ومصر ... كان بيتشاف كالنار ف الهشيم !
وابن حسن بيقول ان مرة والده رجع من برا
لاقاه مشغل الفيلم على الفيديو
راح مطلع الشريط وكسره نصين !!
كان متضايق منه جدا
وسبحان الله يا جدع !!
دور الباشا المريض نفسيا علم مع الناس
ومشهد الرقص ف بيت الدعارة
بقى من المأثورات الفنية والواقعية
آه والله زمبقولك كدا
دوره كمان ف عودة ريا وسكينة
الفيلم اللى مفروض انه كوميدى وبسيط
لكن شخصية رجل الامن الهزوء
كانت مميزة جدا
وازاى بتاع الداخلية وقتها
كانت عافقة ف رقبته زوجة تركية بتدوس عليه
ورضا السرايا ممشيه
بينما ابن البلد بيلعب بيه كورة
والزغلولة الكبيرة بقى واللى كل اللى ف سنى
وكانوا عيال وقتها لا يمكن ينسوها
هيا إعلانات شويبس
طارق نور وقتها راح ف احدى ليالى عرض مسرحية
وعرض على حسن عابدين الفكرة
طبعا حسن رفض وبشدة
وقال ايه دا مينفعش!
كانت فكرة شغل الفنانين ف الاعلانات دى حاجة غريبة
وغير تقليدية
ويادوب تلاقيلهم اعلانات ف المجلات والجرايد
مطبوعة مش اكتر
وطارق نور مستسلمش
وراح لعثمان احمد عثمان
عثمان احمد عثمان كان مشارك ف الحكاية دى
وراح لحسن عابدين
وقاله دا منتج وطنى مية بالمية عكس الباقى وقتها ..
ولازم تساعدنا ننافس المنتجات الامريكية الموجودة ف السوق
وبس الدخلة كانت اللى هيا حسن وافق علطول
وعمل سلسلة اعلانات وغرقت التلفزيون
وانا فاكرة وقتها ازاى كان الهجوم عليه ضارى
وبشع من الناس والنقاد اولهم طبعا !!
وكنت مستغربة جدا اذ اننا نحن العيال كنا بنحبه
وبنستنى اعلاناته ومش فاهمين
الكبار مالهم زعلانين ليه ؟
بس دا اللى حصل
ساعتها حسن عابدين دخل ف نوبة اكتئاب
والمجلات والنقاد مسكوه تقطيع وتقريع
والراجل قرف جدا
بس المنتج كان بينجح وينتشر
ودا اللى شجع شركة BMW
انها تعرض على حسن يعملها حملة اعلانات هيا كمان
الاعلان الواحد ب50 ألف
وعربيات آخر موديل
لكل فرد ف عيلته فوق ال18 سنة كمان !!
وشوفوا العرض كان مغرى ازاى ...
لكن حسن رفض وقال توبة من دى النوبة
كفاية اللى جرالى وافتكروا الحكاية دى
عشان ليها عوزة بعد دقايق ..#هه
انا شخصيا كنت بحب اعلان شوبيس
بتاع قصر باكينجهام
وكنت هتجنن واعرف حسن بيوشوش العسكرى
وبيقوله ايه خلاه يقع ع الأرض يكركع كدا !!
وعثمان احمد عثمان كان من اسماعيلية
وبلديات ابويا
ويعرفوا بعض فكنت دايما اقوله
والنبى تسأله ايه سر شوبيس
ايه سر شوبيس
ايه
ايه ؟؟؟
كان بيضحك وميردش طبعا هيقولى ايه ؟؟
#بنتك_هبلة_يا_حاج
وكنت ولا زلت بحب شوبيس اليوستفندى جدا
وبعديييين لما خلفت يوسف وكبر
وبقيت احكيله
كنت بقوله يوسفى اسم الفاكهة
بس كمان يعنى يوسف واخرها (ى) يعنى بتاعتى
يعنى يوسفى هوه يوسف بتاعى انا
يعنى انا بحبك
وانتا مشروبى المفضل من قبل ما اعرفك بزماااان قوى..!
انا شفت حسن عابدين مرة واحدة واولى واخيرة ف حياتى
وكنت راجعة مع بابا من المدرسة
الكلام دا كان سنة 1988
وف نهار احد الايام ف اول شارع الهرم
كنا ساكنين هناك وقتها
واشارة نصر الدين كانت واقفة وقفة بنت بوبى
وانا بسلى نفسى بالفرجة ع العربيات
واذ فجأتن لقيت حسن عابدين ف عربية جنبنا !
كان لابس الكاسكتة بتاعته
وكان باين عليه ان خلقه ف مناخيره من الوقوف ف الأشارة
لما شفته قولت لبابا
فقالى شاورليه
انكسفت طبعااااا
راح بابا ضاربله كلاكس .. فأنتبه وبصلنا
وابويا حياه فرد التحية وابتسم بذوق
انا كنت هستخبى ف الدواسة من كتر الخجل الحقيقة
بس اللى فكراه كويس
ان حسن عابدين كان راكب عربية 132 بيضا
وحالتها عادية جدا ف توقيت كان المرسيدس 200
معبأة البلد وركوبة الناس العليوى
والمفارقة تأنى هنا ف انه
الراجل دا اتعرض عليه عربية BMW
ومع ذلك عشان قناعته الفنية والأخلاقية رفض العرض
لأنه خاف يزعل الجمهور منه تانى
وعمل اعلانات تانى !!
وقد ايه رضا الناس كان هدفه ..
رغم تمرده من الصغر على والده والجو التقليدى اياه
لكن هوه كان شخص واضح انه حساس
وكرامته وكبريائه وضميره صاحيين
وانا خلصت
وبس الملاحظات فاضلة
1) بالنوسبة للحاج عبوهاب عابدين ابو حسن
الراجل دا خلف 15 عيل
وعاش لحد الـ 95
والسؤال هو ... سمنة بلدى دى ولا انقلاب ؟!!
2) حسن عابدين عمل شخصية ابوه دى بالمللى
ف مسلسل اسمه طيور الصيف لما تتفرجوا عليه ..
اعرفوا انه دور واقعى صِرف
3) حسن عابدين ف فرصة العمر وغيره من مسلسلات
كان نسخة من ابويا الله يرحمه
هذا الرجل اللى اى غلط بيحرقله دمه ف ثانية
ورافض أى حلول وسط
وملوش دعوة ان غيره بيعمل كدا
المهم هوه يقبل على نفسه ايه ... ؟!
عشان كدا بحبه وبحب اشوفه لأنه بيفكرنى بيه
وبكل أبهات هذه المرحلة من العمر
وبزمن راح لكن نقدر نستدعيه ف صور وشخوص
4) فيه طراطيش كلام كدا ان حسن عابدين
ف شبابه انضم للاخوان
وسافر معاهم هوه
وابراهيم الشامى اللى كان عضو ف الاخوان برضو
وراحوا يحاربوا ف فلسطين
وانا لو هعقل الرواية دى وتخش دماغى
فيكون لسبب واحد وحيد
انه ممكن جدا يكون انضملهم
بس طبعا خرج بعدها من تحت عبايتهم وقال يا فكيك
اصلا الجماعة دى مينفعش يدخلها حد دماغه عدلة موهوب
ويفضل قاعد فيها ... !
5) احنا عرفنا خلاص ليه حسن حسنى
شغال بفظاعة كدا ف كل الأفلام والمسلسلات
اتارى الراجل يا نضرى كان محبوس حبسة سودة
ف المسرح العسكرى ...
قوم اما جاتله الفرصة بقى وخرج
راح منتشر انتشار رهيب
#حقه_الصراحة
6) الشخصيات العرر اللى طردوا حسن عابدين
من جنب قبر الرسول (صلى الله عليه وسلم) دول
عشان ف نظرهم مشخصاتى وشغلانته حرام
طب بالنوسبة لكسر نفس الناس .. مش حرام ؟!!
حططان نفسك مكان ربنا والتحكم ف عباده .. مش حرام ؟!!
فرض ذوقك وافكارك المتكلسة على الآخر
لدرجة انه تكرهه ف العيشة وتجبله اكتئاب
او انك تكرهه احيانا ف الدين .... مش حرام ؟!!
يعنى العالم اللى بتفكر كدا دى
هل تعلم ان عمل فنى او قصيدة او غنوة
ممكن تعلم الناس وترفع من اخلاقهم
وتختصر مجلداااات .. يعرفوا ؟
ولاّ ايه؟
انا شخصيا الراجل دا أثر ف وجدانى وانا بكبر
ف حاجات كتير معرفش اقولها
لكن اقدر احسها واعملها
وتصحصحنى وقت ما كنت ببتدى أغيب واستهتر ..
7) وبالنوسبة لسر شويبس وحسن اهو عند ربنا
وعثمان احمد عثمان كمان
ومفضلش الا طارق نور
فـ حد ابن حلال يزنقهولنا ف كورنر
ويقرّره ويعرفلنا السر
ويعرفلى انا شخصيا حسن كان بيقول ايه للعسكرى
وخلاه ينهار ضحكا
كان بيقوله
ايه
ايه اييييييه؟
8) وبالنوسبة لمقولات عابدين اللى بقت علامات مميزة
زى .. آه يا دماااغى وشفيق يا راجل
وانا عاوز واحدة تهزئنى تهزئنى تهزئنى وكدا
احب اقولك
يا عم حسن احنا بقى عندنا "تويتر" بنهزأ فيه العالم دى
.. متقلقش خالص م الناحية دى
بس للأسف مصر بقت مليانة باشوات مهزأة
ولكن لا حياة لمن تنادى
9) الثورة قامت
وعملنا زى فريقك بتاع "المشمش"
بس برضو اتهزمنا زيهم
ويظهر ان الخير علطول كدا .. بخته مايل
10) اللى يحب شويبس يوسفى له ف قلبى شقة خمس أوض
وعلى ناصييتن
وهيبقى حبيبى حبيبى يعنى ..
11) حسن عابدين بدأ حياته المسرحية على خشبة
قصر ثقافة بنى سويف
والحمدلله انه مات
قبل ما يشوف المسرح بيتحرق بشهدائه
ومش بس المسرح اتحرق
والشهدا حقهم مجاش
والكل طلع براءة
لأ
دا الأنكى والاضل ...
انه سياسة الوزير فاروق حسنى ...
بقى بيطلع بعد الثورة يكلمنا عن لوحاته وانجازته وجوازاته
كدا بوش مكشوف
واللى اختشوا ف البلد دى بيموتوا
ويتحرقوا
وما دام جبنا سيرة جنابه
اسمحولى اقتبس جملة من مسرحية "افرض" بتقول
(حتى قارون يا عنايات
حتى قارون مات بكفن من غير جيوب)
واخيرا ...
انا ازاى منزلش م العربية
وأخد الراجل دا بالحضن اصلاااااا
دا كلام
دى مهزلة
مش كنتوا تنصحونى
مش كنتوا تعقلونى
مش كنتوا تفهمونى وتعرفونى غلطشتى ... !
#الكسوف_احيانا_ويحش
وبحب الغنوة دى
واسمعوه حسن بيتكلم عن بدايته
وازاى لسه فاكر اسم ابلة فاتن مدرسة الأبتدائى
:)
وبس خلاص كدا خلاويص توتة توتة
ويارب تكون الحكاية اتحكت حلو
على قدر صاحبها اللى يستاهل كل محبة واحترام
وتصبحوا على ألف خير
-----------------------------------
ألامام @Dr_Ibraheeem
بلدياتى !؟ الله الله الله <3
Ahmed Rageh @Ahmed_Rageh101
اللي بيحط حاجة في دماغة لازم يعملها
Ahmed Rageh @Ahmed_Rageh101
هو كان شكله طيب فعلا
معنديش صحة أتناقش @AShohdy67
ومين ينسى المشهد اللي بيقول فيه
انا عاوز حد يهزقني يهزقني يهزقني :))
Ahmed Salem @smarty_eg
نسيتى شغلة فى الاذاعة
و مسلسل "مين بيضحك على مين".....
كان اسطووووووووووووووووووووورى
مـيرڤـت @frikeko
للأسف مش من عيلته انا :))
الكبيرة قوي @TheBlackFairy_
انا كنت صغيره وعمري ما فهمت الاعلانات دي
كنت عايزه اعرف السر
وبزعل لما مش بيقوله
مـيرڤـت @frikeko
راجل بيقدر زوق الجمهور ..
ايام ماكان عنده زوق
وعلشان كدا انا مؤمنة بإن كل جمهور يستحق فنانينه الحقيقة
:)
مـيرڤـت @frikeko
المهم ان الشقة تكون بحري علشان بتخنق ف الصيف :D
NadiaKhairy @Cafe_Noir
شخصية النهاردة اختيار موفق لانه حد محترم
عاصرناه في دايرة اغلبها مهرجين واراجوزات
ويقولوا الجمهور عايز كده
عاشقه الرومانسيه @ashketromancya
فى اسكندريه على البحر بقى :)
