ليلة سقوط الاسكندرية

حدوتة النهاردة بتحكى عن فصل
من فصول تاريخ الاسكندرية الماريا ام تراب زعفران
وفى العصر الحديث


وهنبدأ من زمن محمد على نركز على كان حالها ازاى
لكن اسكندرية ف ايام المماليك كانت مهملة
الاجانبن بيعيشوا فيها على استحياء
ف احياء لوحدهم بتنقفل آخر الليل ببوابات ضخمة 
خوفا على نفسهم من غدر الممليك 
واحوال البلاد اللى دايما كانت ملخبطة 
بس لما لما جه الفرنساوية خربوها
وبهدلوها
 فأزدادت عروس البحر المتوسط بؤس
 لكن بمجى محمد على الوضع اتبدل حبة 

محمد على اهتم بإسكندرية
كمطرح ممكن ييجى منه الأعداء مش اكتر
 قوم لما ابتدى الغرب يشوف النهضة الحقيقية مش الفالصو
اللى الحاج عملها ف البلاد قلقوا منه
كانت زيارات الاجانب أيام محمد على اصلا
زيارات ودية كدا وخفيفة رحالة مصورين تجار ..
 أى حاجة بيبقوا ضيوف وبيمشوا
اوناس بتشتغل لخدمة مشروع محمد على
مدرسين اطباء مهندسين الخ
قصره محمد على كان بيستقبل رعايا الأجانب 
 بحذر واجب



بس ف اواخر حكمه لما طقش ف اوربا
وحبوا يكسروا سمه
 وضع الاجانب فى مصر كان على كف عفريت
 واكتفوا بالتواجد الحذر هما كمان 
وعدم أثارة المشاكل

من بعد محمد على وابراهيم ابنه اللى مات قبل أبوه حتى
 راح كرسى الولاية لعباس حلمى الاول
 طشعبن كلنا فاكرينه
محمد على كان سامح لدول اوربا
تعمل قنصليات (سفارات يعنى)
وكانت أغلبها ف اسكندرية
وكان بيستقبل القناصل ف أى وقت وعادى
 مفيش مشكلة 
كان معندوش فوبيا لكننننن
عباس كان نِفرى وكئيب وشكاك ومبيحبش اهله حتى
قوم لما مسك
عامل الاجانب متمثلين ف قناصلهم معاملة ناشفة
 وغتت عليهم 
ومبقوش حابين يهوبوا ناحيته توجسا 


وفضلنا كدا العلاقة متوترة لحد ما انقتل ...
ومسك الوالى سعيد باشا
الشهير بسعيد مكرونة
 واللى ف عهده هيبتدى نفوذ الاجانب يكبر ويشتد
 ونوبار ف مذكراته دلل على ذلك 

سعيد كان ضعيف الشخصية
 وسهل النصب عليه
ونوبار بيحكى انه كان سهل جدا جدا جدا
ان أى اجنبى يشتكى من مظلمة ولو حتى بالكذب
ويطلب تعويض فسعيد يدفع زى الرطل
سعيد كان عنده خوف على كرسيه بشكل مرعب
فقرر يهادن الأجانب عشان يكسبهم ف صفه
 وميشيلهوش زى ما عملوا مع محمد على
قوم سفلة الأجانب ساقوا فيها بقى

القناصل او السفراء يعنى
كانوا عاملين زى مراكز قوى كدا
 ونوبار بيحكى ان مرة القصر طلب عدد 12 مراية
من التجار الأروام
وكان المفروض حسب المتعارف عليه وقتها
 ان المراية الواحدة تجيلها ب5 او 6 الاف فرنك بكتيره
قوم اييييه؟
الفاتورة جت بـ 80 ألف للمراية الواحدة !!
طبعا مسئول المشتروات ف القصر رفض يدفع
وعرضوا الموقف على سعيد
اللى قالهم بلاش
 قوم التاجر جرى على قنصليته واشتكى الوالى
راح القنصل رايح لسعيد
 مبعترله كرامته !
ازاى متدفعوش
 مش فيه كونتراتو
 حكومتنا لا تقبل اهانة رعاياها
احنا هنصعد المسائل اذا لم  ... الخ الخ
راح سعيد دافع المبلغ والجزمة الأورباوى فوق دماغه .. !




الأجانب لما سمعوا بضعف سعيد الرهيب دا استلموه بقى
 وسرت حمى الشكاوى
ومن بعدها طلب تعويضات
 لدرجة ان سعيد يا نضرى 
مرة استقبل ف قصره احد القناصل
والجو بديع والجوز واقفين ف التراس بيبصوا ع الحديقة
 وجم شوية هوا كدا لطشوا فيهم
قام سعيد كان لابس على راسه برنيطة راح قالعها
 وملبسها للقنصل اللى استغرب جدا وسأله ..
 ليه؟
قام سعيد رد .. احسن بعدين حضرتك تاخد برد
 وانتا ف ضيافتى
وحكومتك تهب لنجدتك
وتيجى تطالبنى بتعويض عن الزكام .. ! 
#شوف_المسخرة



قصره سعيد بسبب سياسته دى مات
وساب ديون بييجى 10 مليون جنيه
وقرض ب3 مليون استرلينى
يعنى اسماعيل مجبوش من برا بقى
 العيلة كلها فاسكونيا اهو
#لك_الله_يا_مصر

المهم لحد دلوقتى نفوذ الاجانب كان بيشتد
وغالبيتهم أتخذ اسكندرية موقع ونقطة ارتكاز
وعمرت بالجاليات الاجنبية
#دوس_ع_الصورة_اعلاه

بقت المنشية وميدان محمد على
 (اللى كان فيه قصره) وفيه تمثاله حاليا
هوه حى القناصل والاجانب اهتموا بمنشأتهم ف اسكندرية
 يعنى كل جالية كانت بتبنى لأولاد رعاياها مدرسة
ومستشفى ونادى .. الخ
غير نشاط التجاراللى اسكندرية كانت بموقعها
بالنسبالهم مكان عظيم للربح 

وجه اسماعيل
حبيبى انتوا عارفين
وقريت معلومة بقى معرفش مدى دقتها
انه لما مسك الحكم نده لعراف يساله عن الطالع
 فالعراف تنبأله بالعظمة
بس كمان تنبأله ان نهايته هتكون ف أسكندرية .. !
 والمصدر بيقول ان لهذا السبب تحديدا
اسماعيل مكنش بيروح اسكندرية 
ولا مركز بتطويرها الا قليلا عشان تخدّم ع القاهرة 
وبيقولوا انه اهتم بالقاهرة اكتر
وبيقولوا كمان انه أمر رجالته يرموا العراف دا ف النيل
 o.O 
واللطيف بقى ان الجدع طلع صح .. 
وان كذب المنجمون يعنى
لأن صحيح اسماعيل ممتش ف اسكندرية
بس من على رصيف المينا بتاعتها
هياخد المركب ويتنفى برا مصر لحد موته
يعنى نهايته فعلا اهى 
والعراف مكدبشى !!



قصره اسكندرية ف عهد اسماعيل كانت تقريبا
خالصة مخلصة للاجانب
 ولما عمل مشاريعه ف القاهرة وخط القناة
جذب المغامرين من كل مكان ف أوربا لمصر
والمغامرين دول الراغبين ف بدأ حياة
وشق طريق نحو الثراء ابتدوا ف اسكندرية
عشان يكونوا جنب قناصلهم للحماية والسند
 وكنا حكينا عن
 شيكوريل ..  و .. جروبى

اسماعيل اللى جه الحكم صدفة
قرر يستبقى الكرسى لفرع اسرته من بعده
ولتحقيق حلمه ف مصر حديثة زى محمد على
وعشان يسترضى الغرب ...
بدأ يتداين عشان ينفذ مشاريعه ف وقت قياسى
وبدأ ف المقابل يسمح للأجانب بنفوذ اكتر
 وف نهايات عهده القناصل بتوع فرنسا وانجلترا 
كانوا بقوا غيلان

وسيطر الاجانب بمختلف الجاليات على اسكندرية
وف عهد اسماعيل بقت مركز للتجارة الاوربية
اما اهل البلد فيادوب كانوا غلابة وشغلانتاهم بسيطة
وتعايش الكل مع بعضه ف هدوء
بينما تثق الديون كتف مصر
 وتركع اوربا الخديوى اسماعيل
وتفرض عليه الخروج المهين
 فيخرج
ويسيب الحكم لأبنه توفيق
 اللى هيلم التعابين من اول فيمتو ثانية
ويبقى مركوب ف رجِل أوربا
عشان ميحصلش بابا بعد ما شاف رأس الذئب طايرة قصاده

لحد عهد اسماعيل اسكندرية كانت اضئيت بالغاز
وشركة مياة كودييه مدتها بالمية النقية قبل القاهرة
وف سنة 1863 
كان فيه الاحصاء بيقول ان ..
كان يوجد بمدينة الأسكندرية حوالى 70 شركة اجنبية
بينما المصريين زى ما قولنا
اكتفوا بالمهن البسيطة زى حلاق وسقا وحمال
ومكارى ... سواق حنطور يعنى

وعشان توفيق كان جبان بما يكفى
 ربنا باعتله اللى يقرفه من برا ..
وكمان من جوا
واللى أقصده جوا هوه الأخ أحمد عرابى طبعا 
وطبعا كلنا حافظين القصة بتاعته
وازاى عانى عرابى ورفاقه من مظالم ف الجيش
واستفحال نفوذ الشراكسة الأترك
 وثورة الجيش بقيادته ضد الخديوى ...  الخ الخ

ومشهد القصر ولقد خلقنا الله احرار يا تيفة
 ومحاولات تيفة للتملص من الموقف
 لحد ما ف النهاية رضخ للمطالب
وعرابى بقى بطل
توفيق وعرابى من بعد الموقف دا
بقوا  ألد الأعداء رغم المهادنة
ومحاولات كل طرف لأمتصاص كراهية الأخر
 بس عرابى اكتسح
 واخد شعبية عند الشعب خلته ف موقع عالى وكبير
والضغط الشعبى وانضمام فصائل ف الجيش لعرابى
اجبرت الخديوى يحطه ف الوزارة
 ويعينه ناظر للجهادية
 وبقى عرابى عامله كالو ف نافوخه .. مش بس هوه

عرابى كان عامل قلق لاوربا ..
متمثلة ف انجلترا وفرنسا وانجلترا تحديدا
اللى كانت عينها على مصر
وعاوزة تحقق حلمها القديم ف احتلالها .. 
وقد كان
وعرابى لم ينتبه للفخ المنصوب
واللعب التقيل من الخديوى
ومكنش يعرف ان أوربا هتعمله حصان طروداة
عشان تحتل مصر 
ازاى ؟
نقول ونحكى



عرابى قعد يناكف ف الخديوى والخديوى يناكف فيه لزمن
 كل واحد فيهم يستخدم نفوذه
 وحرب تكسير عضام من تحت لتحت كدا
وكل برغوت على قد دمه
توفيق كان مسنود على الأجانب
وكمان على الباب العالى وتركيا
عشان يفضل ع عرشه

اما عرابى فأتسند ع الناس وقطاع كبير م الجيش 
وقعدوا الجوز يلعبوا مع بعض توم وجيرى فترة
إلى ان فى يوم ما
وفى نهار مشمش جميل ف الأسكندرية
 11/6/1882 
حدث الآتى ..

السيد العجان وكان بيشتغل مكارى
 يعنى حمّار
يعنى بيسوق الحمار للى يدفع أجرة عشان يركبه
ويلففه بيه زى الصورة كدا .. 


ماله العجان بقى ؟؟؟
العجان وقفه شاب مالطى تابع للحماية الانجليزية فى مصر
وطلب يركب عشان يوصله لمطرح 

الشاب كان سكران ومبسوط حبتين 
قوم ايه 
قال للمكارى بص انتا لففنى ف الشوارع
 ما أقولك كفاية
المكارى نفذ الطلب لحد ما وصله قرب بيته
 وبعدين اختلفوا ع الاجرة

كلمة منه على كلمتين من التانى
مسكوا ف بعض
 قاله ابوك وامك
 قاله امك وأومين أمك
 والمالطى راح مطلع سكينة وبج بطن العجان بجيج .. !
الناس اتلمت 
وكانوا عاوزين يمسكوا الشاب المالطى
 عشان يعملوا معاه الجلاشة بقى
 معرفوش للأسف
الولا هرب منهم 
وجرى على حى القناصل الوغد

وطبعا اول ما وصل استخبى عند معارفه
وحكالهم القصة كلها وانه كان هينقتل وبتاع
ف هذه الاثناء كان الناس ندهوا اهل العجان واحبابه
والموضوع وسع
الأهالى اتلمت بالنباتيت والأسلحة البيضاء
وراحوا على الحى اللى ساكنه اليونانين واهل مالطة
ومتأبطين شرا بقى
 والاخبار انتشرت ف الأسكندرية كلها
الأجانب جالهم ذعر وخافوا على حياتهم
وبقوا واقفين ف الشبابيك ما بين مترقب وخايف
وما بين اللى ماسك سلاحه متأهب للدفاع 
عن روحه وممتلكاته !



المشكل الاكبر بقى انه ايه الموضوع وصل
 لتحت بيت الحاج تشارلز كوكسون قنصل إنجلترا
في الإسكندرية ونائب قنصلها العام في مصر تحديدا



واشمعنى يعنى هوه ؟؟
بيقولك أن يقال المالطي قاتل الحمار المصري
 كان شقيق خادم السير تشارلز كوكسون قنصل إنجلترا
وطبعا الراجل لازم يدافع عن رعيته



اللى زاد وغطى وبعض المصادر بتحكى
 ان قبل الواقعة كانت القاهرة بتغلى
 بسبب نفوذ الأجانب
وان عرابى اكتسب شعبيته الجارفة دى
بسبب الكلام الثورى عن العدل
وتوزيع الثروة على أهل البلد
واتحب جدا بسبب وقوفه ضد النفوذ دا ف الجيش



المشايخ والمحبين وانصار الثورة العرابية
كانوا شايلين ومعبيين من الخديوى
ومن الأجانب
وبينادوا بخروجهم من مصر
 وتوزيع ممتلكاتهم ع المصريين
والبلد كانت ف حالة احتقان رهيبة ..
شبه الأيام دى كدا
وبتغذيها الثورة ع الخديوى من ناحية
 وبيغذيها الاجانب كمان
وهنعرف دا بعدين 
المهم
 فجأة الموقف بقى كالآتى
الأهالى عند بيت كوكسن القنصل الانجليزى
وف الأحياء اللى بيسكنها الاجانب
وبيهجموا رغبة ف الانتقام لقتل المكارى 
ولغيظ يتملكهم مسبقااااا




الاجانب يعملوا ايه ؟
 يعنى يشنقونا ونسكتلهم ؟
لأ طبعا بقوا يضربوا نار
على اللى يهوب ناحية البيوت والمحلات
وفجأة الدنيا ولعت
 وبقت حرب شوارع
الاجانب خرجوا بالبنادق والأسلحة
والمصريين خرجوا بالشوم والعصيان والمطاوى
ومعارك دارت ف كل شوارع الاسكندرية



وعلى آخر الليل كانت الحصيلة ..
163 قتيل مصرى و68 أوربى
 وفيه اعداد ملحقوش يحصروها ف وسط الضرب
والدنيا قامت مقعدتشى
والعالم تناقل اخبار المدبحة دى 
وكانت فضيحة استغلها الأنجليز للترويج لنفسهم
ومظلوميتهم وبعض الصحف وصفتها بحرب صليبية .. !
#بيفكروكوا_بمين؟؟

المهم ان الموضوع وسع لدرجة الاخلاء
الأجانب خافوا على أرواحهم خصوصا
بعد حالة العدواة الرهيبة اللى طفحت فجأة ف الشوارع
 فبقوا يلموا اللى يقدروا يلموه ويجروا
#دوس_ع_الصورة_للتفاصيل




طبعا الخديوى توفيق لما وصلته الاخبار
لام على عرابى لأن شيوخ ورجاله هما السبب
 بس الموضوع بقى اكبر من عرابى
ومن أى كلام ف أكتر من مطرح ف البلد
الناس بقت بتغلى 
وبتتف ع الأجانب ف الشوارع
وتحرشوا بالأوربين
واحد الشيوخ لما سمع بالمدبحة
بقى يجرى ف الشارع ويحرض الناس صارخاااا
(ايها المسلمون ساعدونا على قتل النصارى) !!

وفورا وسع ميدان القتال
ف طنطا اندبح ييجى 70 يونانى
 ف المحلة مات 8 ايطاليين
 ف دمنهور روخرا فوق ال10 ماتوا غير النهب 
واسكندرية تحولت من مدينة هادئة
الى حلبة صراع وضرب واهوال
ومش بس الاجانب اللى هربوا بجلدهم ... 

المصريين كمان ركبوا القطر وطفشوا 
عشان الخطر اللى بقى ف كل بقعة م المدينة 
ومفرقش بين مصرى ولا غريب 

القناصل طبعا بتوجيهات من حكومات بلادهم
هدوا الدنيا وبعتروا كرامة الخديوى
 اللى قالهم مش انا دى اختشى منى ..
قصده على عرابى يعنى


وقالوله اتصرف
بس كان كدا منظر
بينما هما حضروا نفسهم للتصرف
فرنسا وانجلترا وخصوصا الأسطول الأنجليزى
 اللى كانت سفنه اتحركت خلاص 
وجاية على اسكندرية فعلا




فى هذه الاثناء والبلد مشتعلة وفيها فتنة كدا
 كانت سفن الاسطول جاية ف السكة
وعرابى مقرر انه لازم يدافع عن اسكندرية
 والا تبقى خيانة 
ولا يليق
الخديوى توفيق كان خيخة قوى
وأظنه مش متعمد هوه اللى شكله كدا ولا ايه؟
المهم ان المحافظ وقتها بتاع اسكندرية كان ضعيف
 او متخاذل أى كان يعنى
معرفش طبعا يخلى المدينة تستقر
 ودخلت الاسكندرية ف ازهى عصور الإنفلاتات الامنية
ف تاريخها 
وادى الامر لتدخل عرابى 
ورجاله وأنصاره كمان




منهم شخصية لازم نفتكر اسمها كويس
 وهى القائمقام سليمان داوود
واللى كانوا بيطلقوا عليه لقب عرابى الأسكندرية
 ولقبوه كمان بشرير الثورة العرابية
ماله سليمان بقى ؟



ف وسط الأنفلات الامنى دا عمل فيها حكمدار العاصمة
وسيطر بعساكره ع ا
لأرجاء وكان متمرد 
زى ما بيظهر من القابه يعنى ..
الحادثة بتاعت المالطى وهروب الاجانب دى
كانت ف يولية
على اغسطس كانت السفن الانجليزية
راسية على شط اسكندرية وبتصوب مدافعها ناحية المدينة




واسكندرية ف انفلات
والخديوى مش عارف يلم الموقف
والأوربيين مبهدلينه
ورجالة عرابى هما اللى مسيطرين
وعرابى قرر يحصن الطوابى استعدادا للقتال

الأنجليز وصلهم الأخبار ان عرابى بيستعد لقتالهم
 راحوا زاقين الخديوى عليه
الخديوى سأله ايه الحكاية ؟
عرابى قاله عادى
حضرتك المدافع دى من ايام الوالد والجد .. متحدستشى
ولا حد اهتم بيها
فنا بعملها عمرة وصيانة بس مش اكتر
 :) 
#كيااااد_عرابى_والنيعمة_بس_تيفة_يستااااهل

تركيا بقى هتقعد ساكتة ولاّ لازم تنقط ف الفرح دا ؟؟
 لازم طبعا
السلطان عبحميد بعت لعرابى يهادنه
ويقوله لم الدور
 قوم عرابى رفض الطلب
وبعتر كرامة درويش باشا المبعوث من قبِل الباب العالى
وقاله فيما معناه كدا .. روح لأمك

راح الباب العالى اصدر فرمان
أن عرابى مارق وضد الأسلام
اكمنه خرج على خليفة المسلمين وكدا
والخديوى عمل اجتماع لكبارات الطوايف 
ولشيوخ الأزهر والكنيسة وضمهم لصفه 
#طبق_الأصل_علقة_كل_مرة_يا_مصر
 O.o 
بس الحقيقة كل الحشد والكلام دا ف الواقع 
وقتها كان زى قلته 
والسلاح والقوة هما اللى كان صوتهم اعلى



المصريين اتحمسوا جدا
وتسرى اخبار ان عرابى مطمن من النصر
 لأن الانجليز على حد علمه عسكريا
آخرهم ضرب م السفن
 لكن ع الارض مش هيقدروا يصمدوا
دا كان رأيه .. 

وطوابى اسكندرية استعدت لضرب الأسطول الأنجليزى والخديوى بعت يأمروهم بالعكس
راحوا منفضينله
راح مسافرلهم اسكندرية بنفسه يشوف ايه النظام .. !
والمرة دى المصدر
من مذكرات احد الشخصيات المهمة ف الديوان الخديوى
ف هذا الوقت احمد شفيق باشا
 اللى قال ان توفيق راح ف حماية عساكر انجليز 
o.O
ومع ذلك مقدرشى يومها يوصل لقصر راس التين

ساعتها كان فيه مناوشات على صغير كدا
 بين الأسطول الأنجليزى واللى متمركزين ع الطوابى
 وكام قذيفة اترمت 
ورد من الشط 
عملت بهدلة 
فتوفيق راح سراية مصطفى باشا وقعد فيها 
 وطلب عرابى يجيله حالااا
كان عرابى ف طابية بيشرف ع العساكر والحال
قالوله الخديوى عايزك
 قالهم عينىىىىىىىى

ودخل عرابى ع الخديوى دخلة الاسد
فتوفيق قاله 
ماذا يحدث؟ 
عرابى قاله 
"وعجباه كيف ان افندينا يجهل الى الآن ما كان "




احمد شفيق قال ان أفندينا أتضايق من رد عرابى البارد
 وقاله اكتبلى تقرير بالحالة وما حدث
عرابى قاله معلش وقتى لا يسمح بذلك ...
 وراح خارج



طبعا الموقف أتهبب أكتر
وتوفيق فهم ان ايده مغلولة
وعرابى مسيطر وواكل تايجر
 راح باعت لحبايبه ع الناحية التانية 
وقالهم اتصرفوا انتوا بقى ..

أصلا الاجانب لعبوا لعبة فرق تسد التاريخية
 فهموه ان عرابى عاوز يقتله 
فتوفيق خاف على عمره
وقال زى صهيبة ... أنا عاوز أعيش
واتفق مع الأنجليز
وف الوقت اللى كان بيسلم مقادير البلد للأجانب
كانوا فيه هما بيحاولوا يهادنوا عرابى الاقوى
لولا الخديوى سبق واكل النبق

زائد ان عرابى رفض التعاون معاهم
وبالفعل أعلنت انجلترا عن نيتها
واتوزع منشور بكل اللغات ف أنحاء المدينة
 عشان اللى عاوز يمشى يمشى

بس وابتدى الضرب سعادتك
واسكندرية تحولت الى خرائب ومدينة للأشباح
بعد ما كانت جنة 
امتد الدمار لكل حتة

وبعد ما كانت كدا

بقت كدا
ومش بس كدا دا السجن انفتح 
ومتعرفوش مين اللى فتحه #كالعاااااااااادة 
وحصل انفلات وهرج ونهب وقتل وافلام سودة 

الجثث بقت تترمى ف الشوارع
والأهالى بقوا يتربصوا بأى أجنبى
 ويمسكوه يقتلوه
وكل المحلات والبيوت اتنهبت وبقت خراااااب 
#دوس ع الصورة اعلاه للتوضيح

                     

طبعا مفيش داعى نقول ان امكانيات الجيش وقتها
كانت عاملة ازاى

زائد ان عرابى بدل ما يركز 
فتح جبهة للقتال ف التل الكبير
والدنيا بهوأت منه ع الآخر ...

المهم ان اسكندرية مخدتش ف إيد الأنجليز غلوة
 وبعد الدمار بقت لقمة مقشرة
وصدرت الأوامر بنزول القوات الارض لتكملة المهمة

الكلام دا كله كان بمباركة الخديوى توفيق
 وف هذه الاثناء هنسمع اسم سليمان داوود
بيتكرر تانى
ليه؟
 عشان بعد خبر قرب نزول الانجليز ع البر
 سليمان هيتجنن
وهيلم رجالته ويقعدوا تحت تمثال محمد على
 ف ميدان المنشية المتدمر على اخره
ويقرر لو الانجليز هيخشوا منهنيهومش ع البلد 

ايوه مش هتهنيهم يعنى هتعمل ايه يا حاج
قالك احنا نحرقها
وراح باصص لرجالته
 وقالهم لمولى شوية عربان
وقوموا نحرق هالمدينة ونعمر معرفش ايه

بس واتنيل سليمان 
ولم المقاطيع بتوعه
ومشيوا بالمشاعل
وبقوا يحرقوا كل حتة سليمة فيكى يا اسكندرية !!
وف ظرف ساعات كانت المدينة كتلة من اللهب


توفيق وقتها كان اتنقل لسرايته ف راس التين
 لما البلد ولعت خاف على نفسه
واحمد شفيق بيحكى العكس طبعا
وبيقولك ايه أل افندينا نزل يتفقد الحال !
وبيحكى موقف غريب قوى انهم عدوا بالكارتة
 اللى راكبينها بين النيران اللى ماسكة ف كل حتة
ولقوا ف وشهم سليمان داوود بنفسه
 ولما شافهم هرب !!
أصل كان معاهم جنود السوارى 
وبيحموا مولانا
فخاف يتقبض عليه
طاه يا خويا حمشين قوى وبتخوفوا .. !

قصره الخديوى هرب
وقالك عرابى ورجالته خلاص كدا
يستاهلوا اللى يجرالهم م الانجليز
وانا أروح قصرى ف القاهرة
 وأكِن لحد القصة يبانلها آخر

الانجليز بقى بعد ما كانوا ع السفن ف البحر

بعد الانذار والمنشورات نزلوا ع الأرض

 وطبعا حصلت مقاومة من الاهالى
والناس اللى كانت لسه قاعدة ف البلد 
وانقتل ييجى ألف ف القصة دى من اول ما بتدى الضرب

وطبعا أتقبض على سليمان داوود ورجالته
 وكل اللى الانجليز قابلوهم ف السكة
عشان يسيطروا على الحالة الأمنية من جديد 

وبسرعة وصلت الاخبار لعرابى
ان الاسكندرية سقطت بالكامل
فالراجل صمم ع المقاومة واستردادها
واجتمع برفاقه اجتماع عاصف ف القاهرة 
زمايله عارضوه بعنف وانتا ضيعت البلد
وكفاية كدا اسكندرية بتتحرق يا أستاذ خيرى
عاوز ايه تانى
وخلاص محناش لاعبين ! 

ف نفس التوقيت دا كان الأنجليز
 بيتوغلوا ف أرض البلد

شرقا .. وغربا
بمساعدة الخديوى 
والفرنساوية اللى ملتزموش
 باخراج قناة السويس من الصراع والحرب 
وسابوا الانجليز يستعملوها وخذلوا عرابى .. 

زائد ان فيه رتب انحازت للخديوى
 وسابت ضهر عرابى مكشوف
الراجل لقى الموقف كدا راح قايل خلاص
وراح مسلم نفسه .. !

ف نفس التوقيت دا كانت اسكندرية بتهدأ بعد الدمار
 وابتدى الانجليز يقبضوا على كل المتمردين
ويعملولهم محاكمات سريعة 
وأولهم كان سليمان داوود طبعا
اللى صدر الحكم بأعدامه

وفعلا تم شنقه ف ميدان المنشية
وسط حشد كبير
ف نفس الميدان اياه اللى خرج فيه بفكرة الحرق دى

وطلب عرابى العفو من أفندينا 
بعد ما خرج م الأجتماع النيلة دا
والخديوى رفض
 وفى اليوم اللى سلم فيه عرابى نفسه للخديوى
اللى هوه  16 سبتمبر 1882 كانت دى نهاية الثورة العرابية 




وبعتت حكومة انجلترا للخديوى تبلغه
ان محاكمة عرابى مينفعشى
 تبقى زى محاكمة سليمان داوود كدا
اللى بسببها اتسببتلونا ف حرج والمبادىء وانسانيتنا وكدا  
#يوغتى_ناس_حونينّن_قوى
وقالوا احنا هنعينله محامى من عندنا 

قوم الخديوى توفيق تبطأ
وقال ايه دا هما مالهم بنظام القضاء الشاااامخ بتاعنا
 واذا ببرقية تأتى لفخامته بتقوله فيما معناه 
احنا مبنهزرش يا حاج
وقدامكو 10 ايام من الآن
واذا منفذتوش طلب حكومتنا
 اتحملوا بقى تبعات الرفض كاملتننننننننن
أحمد شفيق بيقول 
ان أفندينا امتعض جدااا م اللهجة دى
وبعدين طبعا وافق

 وحضر المحامى للدفاع عن عرابى
 اللى اعترف بتهم التمرد على الخديوى

واتحكم عليه بالاعدام ف الأول
وبعدين الحكم اتخفف للنفى برا البلد
الانجليز كانوا اذكيا جدا 
لو قتلوه كانوا خلوه بطل والثورة تستمر على حسه 
هما عملوا الاخبث 
حطموه وشوهوا سيرته .. وموتوه وهوه عايش 
واحبطوا الثورة بدهاء 

:( 
وفى 27 ديسمبر 1882 
ركب عرابى
وبعض من أهله وخدمه قطر السويس

ومن السويس أخد السفينة لجزيرة سيلان
وقعد فيها لحد ما رجع مصر بعدييين سنة 1900 تقريبا
 وجابلنا معاه شجر المانجة
اللى اتزرعت من يومها ف مصر 
ومخرجتشى
 :) 

ونرجع لأسكندرية مؤقتا ..
اللى لما الانجليز نزلوها كانوا متوجسين من منظرها
والنار المشتعلة
وفاكرين عرابى مرقّدلهم
فلموا نزلوها لقوها خرابة ... 
وابتدوا يقدروا الخساير المادية والمعنوية

اكتر من ألف مصرى مات
والاجانب مكملوش الـ 70 قتيل
 ولموا الجثث المتناثرة ف كل حتة 
ويحكى ان توفيق بعد ما خربها
 وقعد على تلها زار المدينة
وزعله قوى الروايح اللى انبعثت من حفرة
كانوا دافنين فيها مئات الجثث فوق بعض
وايد باينة 
ورجل طالعة
فأمر بتشكيل لجنة لأعادة دفن الناس دى كويس!

وف الوقت اللى الانجليز حطوا رجلهم ف البلد
ودخلوا القاهرة 
وتوفيق بقى كلب تحت رجلهم
 كانت اسكندرية بتحاول تتعافى 
وتقوم من تانى
والاميرال الانجليزى بالأتفاق مع الخديوى
أصدروا منشور بطمأنة السكان
 ومحاولة تعويض 
كل اللى اتخربله محل او بيت حسب الظروف 

وابتدى الامن يرجع

ويقال ان كلمة سر الليل اللى بيستخدموها ف الجيش حاليا
ابتدعها الأنجليز ف الأسكندرية
عشان محدش يمشى بليل كدا 
ويروع الآمنين 
ونفعت .. !
كانوا كل يوم بيختاروا كلمة
عشان تبقى سيم بين الطوائف والسكان
 وأى حد بييجى متأخر بيروح يعرفها م الكراكون
 والا يبقى غريب
 ويتمرمط براحته بقى

المثير ف قصة سقوط الاسكندرية
 ان المعلومات اللى ظهرت بعدييييين
واللى لما انعرفت فرقت ف تحليل كل الوقائع
 يعنى مبدئيا نؤكد بيها 
ان الحكاية كان فيها مؤامرة
ومفيش حاجة عفوية



اولا 
الشاب المالطى كان قريب من القنصل الأنجليزى
ولو فرضنا انها مصادفة
فاللى مش مصادفة ان كان فيه ناس اتحذرت مسبقا
من الاجانب واتقالهم خلو بالكم من قبل الحادثة بيومين
وفيه وثائق بريطانية عن جوابات متبادلة
 بين رعايا انجليز وموظفين ف القنصلية
بتطالب بقيمة أسلحة دفعوا تمنها من جيبهم
وعاوزين فلوسهم .. 
وعن صناديق أسلحة دخلت احياء الأجانب 
من قبل اليوم المشهود دا 
وكأن الموضوع مرتب





المكارى نفسه بقى .. 
ممتش
وفيه شهادات عن روايته للاحداث
 بعد الواقعة بييجى 50 يوم
يعنى متقتلشى
 والعركة كان متسخنة لهدف ما ..
كلنا عرفناه بعدين اهو !



الناس بقى اللى ولعت الدنيا بين عرابى والخديوى
وتخويف الاخير بأن الاول عاوز يقتله
بينما عرابى كان راجل سلمى خالص اهو 
وملوش ف البتنجان
الملخص 
انجلترا قعدت سنين من ايام الحملة الفرنسية
وهيا هتموت وتدخل مصر
وكان فاضل النفوذ الفرنسى ينحسر
ومصر تضعف وتتداين
ويحكمها واحد عرة يساعدهم بشكل غير مباشر 
على اختراقها 
وقد كان

زائد ان عرابى لما ظهر وجمع حواليه الشعب
عملهم قلق 
وكان لازم يضربوه ف مقتل بالخديعة والغدر
وبكل السبل 
ودا حصل
ويكفى اقولكم ع المناظر الزبالة
حصلت خيانات ف الجيش ..
الأقوياء غدروا بيه وباعوه وقت الجد
وحتى اللى مغدرشى بيه كان غبى ..
زى سليمان داوود كدا لما حرق اسكندرية غتاتة !!




طبعا مش هتكلم عن غدر الباب الواطى
وازاى السلطان عبدالحميد طلع فتوى
بخروج عرابى عن الدين
وتأثير دا ف قطاعات مش قليلة لتشويه صورته ..
دور الشيوخ كمان .. كان عجيب
بعضهم كان معاه بشكل مرعب ولدرجة الاذى
وبعضهم كان ضده وبوق للخديوى
وكانوا بيدعوا عليه ف خطبة الجمعة .. !!

الاعلام النجس بقى
 جريدة الاهرام وصاحبها بشارة تقلا
واللى كان محررها اللى بعد ما كان طالع بعرابى السما
بقى يهاجمه بعنف 
مش لوحده كمان كثيرين
جرايد "الوطن" و"المحروسة" 
وجريدة "الأعتدال" اللى كتب فيها 
الشيخ حمزة فتح الله يتهم عرابى بالجهل بفنون الحرب 
وانه بالحرف كدا
" عرابى جاهل خاطر بدماء المسلمين وأعراضهم وبلادهم"

دا حتى مصطفى كامل ... 
رمز من رموز النخبة السياسية
بعدين وهوه بيتكلم عن عرابى قالك مبعتبروش خاين
 بس هوه السبب ف دخول الأنجليز البلاد .. مفيهاش فصال!
#زعماء_وبيقعوا_ف_بعض

المثير للدهشة ان اللورد كرومر
 (المعتمد البريطانى ف مصر) طلع اجدع م الكل
مقلش عرابى خاين
ولا أمنجى
 ولا عميل
ولا ملحد 
ولا حاجة م الحاجات الحلوة بتاعت الايام دى 
 وقال بالنص
 "انها ف الأصل حركة مصرية
لا شبهة فيها ضد استبداد الحكم التركى"




وزمان وقع ف ايدى كتاب تاريخ 
كان مقرر ع العيال ف المدارس وقتها 
كان سنة 19 وحاجة كدا 
وكان بيحكى عن هوجة عرابى ف كام سطر
من وجهة نظر الحكومة المصرية
حينها طبعا فإدوله م المنقى خيار
وف النهاية قريت جملة 
"وقد نال عرابى وجماعته ما يستحقون .. !"
شوف ازااااى !!!


وخلاص انا اوشكت أخلص
 فاضل بس الملاحظات
وبعض اللينكات
واول ملحوظة ..


1)  الحاج أحمد عرابى
كان لامم واغش حواليه كتار قوى
 نفخوه لفظيا وحرفيااااا
ورغم انه كان بيتعامل مع الخديوى
 ف اكتر من موقف بحذر
وجاتله اكتر من فرصة يعمل يقلب توفيق
ويدوسه
 الا ان الراجل زى مؤمن .. مش بتاع انقلابات
كل اللى كان عايزه وضع كويس للمصريين ف جيشهم
لا قالك عاوز أحكم ولا انيل .. 
بس التسخين والنفخة من الى حواليه بقى
بعيد عنكم تعمل أكتر من كدا ... 

2) مصطفى كامل دا شبه الناس بتوع الايام دى
نظام الثورة هيا اللى بوظت البلد
يعنى يا عم بقى عرابى هوه اللى جاب الإنجليز
 ولولاه مكنوش دخلوا !!
دا الموضوع مترتب وانجلترا جاية متسلطة يا جدعاااان
وعينها على مصر من بدرى
بس كانت بتتحين الفرصة مش اكتر
و اختشوا ومتفتروش ع الراجل الغلبان بقى
عندكو كلمة حلوة ع الجدع قولوها 
معندكوش خدوا جنب .. 
ايه نفسنة الزعماء من بعض دى ؟؟

3) بس عرابى دا طلع بسكوتة قوى
اول ما لقى الدنيا باظت يروح يسلم نفسه بسرعة كدا ..
طب كنت موت ف المعارك أحسنلك يا حاج بدل النفى
والمرمطة اللى حصلتلك دى .. ؟!
بس الله أعلم 
يمكن لما فاق وعرف حجم قوته وقوة الجيش ضد جيش الخصم أدرك ان المقاومة هتؤدى الى خساير اكبر 
ومحبش يشيل وزر الأرواح اللى ممكن تزهق 
غالبا فكر كدا .. 
وأظنه خد قرار صح 
بس متآخر للأسف ... 
وكان م الاول 
كان م الاول قرى المشهد ع الارض صح 
ومعملش زى بتوع رابعة كدا 
مقروش الواقع
فمات أبرياء لمجرد انهم صدقوا القيادات الهلاهوطة
الحناجير ... 





4) توفيق أصدر عفو عام عن كل المقبوض عليهم
 واخدوا احكام بعد سقوط البلد ف ايد الأنجليز
الخديوى عفى عن المقبوض عليهم
 ودا بعد 6 شهور من الواقعة
اخدلى بالك يا حاج محمد
عفو عام بعد كل الخراب دا
و يعنى يا خويا مجتش من مورسى
 ولا عدلى منصور لما اتهببوا مسكوا الحكم
وجت من تيفة البسكوتة .... اخص كسفتونا

5)هاتولى توفيق دا بقى من حواجبه
ايه الحكام العرر دول
 انا شخصيا بعتبره أسوأ واحد ف عيلته
 بجد منتهى الخسة والخنوع والجبونية .. ويزيد
 اخص اخص اخص

وآل بيقولك اصل لما طلبوا بحاكموا عرابى
وهوه قال ازاى تتدخلوا كدا .. راحوا مهزأينه
 فأندهش دون ان يأكل فريسكا ...  ؟!!
 نعمممم يا روح ماما 
اندهشت !!
ليه ؟
لهو انتا فاكر الناس هتقوم من أوربا
 بسفنها وعساكرها وذخيرتها عشان تيجى تجاملك
تضربلها عيارين ف الفرح محبة 
وتمشى .. ؟!!
 #يخربيت_ام_اللى_علمكو_تحكموا



6) الأعلام الوسخ دا من زمان شغال يونيفرسال 
الأهرام طول عمرها كدا .. ؟!! 
#النتانة _اسلوب_حياة
وبعدين الاخ بتاع جريدة الاعتدال دا معلش 
زعلان من عرابى عشان خاطر بدماء المسلمين وبتاع 
طب بالنوسبة للأقباط حضرتك 
ايه نظامهم 
يعنى محدش جاب سيرتهم ليه ؟




7) ودى مرتبطة برقم (6)
 وازاى تركيا كالعادة استغلت الدين 
واستغلت حكاية الخلافة الاسلامية 
عشان تحافظ على مصر كأقطاعية
وتركع الشعوب وتخليها طوع أمرها 
وكأن الباب العالى هوه خليفة الله ف الأرض 
طب والناس زمان كانت غلابة ومصدقة الهطل دا
ازاى عاوزينا دلوقتى نوافق ع الفكرة المختلة دى ..
ونكررها تانى برعاية الأخوان 
ازاى .. معرفششششششش !


8) معنديش للأسف مذكرات عرابى 
لكن فيه مصادر بتقول انه كتب ف المذكرات دى 
ان سليمان داوود قال ف المحاكمة قبل ما يشنقوه
ان عرابى حرضه على حرق اسكندرية 
وانه خد من الأامر شفهى .. !
ومعرفش الكلام دا صح ولا ّ غلط 
بس الراجل الوحيد اللى أتشنق يعنى جايز عذبوه قبلها 
عشان يعترف بالمعلومة دى لتوريط عرابى مش اكتر 
انما عمرنا ما هنعرف الحقيقة للأسف .. 

9) بالنوسبة للاخوة بتوع كتاب التاريخ 
ونال عرابى وجماعته ما يستحقون وبتاع 
أشوف وشكم يا بًعدا دلوقتى بعد كل هذا العمر 
وعرابى بطل قومى 
وثورته سلمت لثورة 1919 الشعلة 
وفضلنا من جيل لجيل لحد ثورة يناير 
وكل أنتفاضة جاية .. 
عرابى بقى علم واسم وتاريخ 
وانتوا بقى روحتوا فين .. ؟!
#التاريخ_بينصف_المظلوم_ولو_بعد_حين

10)آه ..
 ايه حوار فتح السجون دا 
كل مرة نثور نتلب القلم دا
الثورة الجاية نروح نوقف عند السجون بقى
عشان محدش يخرج .. هه 





واخيرا 
جاتها نيلة اللى عاوزة خلف ف البلد دى 
:)


واليكم صور تانية 
عن الأيام المدوحسة دى

الميدان والتمثال على كرت بوستال

ودا أثناء ما بيحاولوا يطفوا الحرايق 

اسكندرية الطيبة الغلبانة
مش بتاعت الأجانب والقناصل 

ودا عرابى كما رسموه بتوع الغرب 
بملامح المتوحش القاسى 

توفيق المخسوف واللى مات 1892
يعنى ف اوائل الأربعينات من عمره
بعد 10 سنين بس 
من دخول الانجليز مصر 

ودى صورة له وعرابى ف الخلفية

واخيرا ما اكثر المتشابهات ف تاريخ البلد دى
كأننا بنعيش أحداث بالمللى 
ولما ببص لصور عرابى لما كبر
بشوف نظرة ف عينه مؤلمة جدا ..
بس أتصور لو صحفى ولا اى حد وقتها ساله عن الثورة ..
تحب تقول ايه للشعب المصرى يا حاج عرابى
فاعتقد كان هيقول بلا أدنى تردد
احب أقوله ............. 

ومعلش طولنا
 بس الحكاية مكنش ينفع تتجزأ
ولا أكروت ف تفاصيلها 
وتصبحوا على ألف خير
 :)

-------------------------