السلطـــان " لامؤاخـــذة " البطـــّـال

 حكاية الليلة دى من زمن المماليك
 بس هتلاقوها متفرقش كتير
عن ايامنا الزرقا بتاعت دلوقتى والله
 وخليكم معايا

النص والتفاصيل من كتاب النجوم الزاهرة
بتاع الاخ ابن تغرى بردى
واللى بحبه وبحب طريقته وسرده لأق أدق التفاصيل
#بدقة_تشل



وما دمنا هنحكى عن المماليك يبقى لازم هنقول
حكاية واحد من سلاطينهم العجب العجاب
 اللى متخلاش سيرة اغلبهم
 من مهازل وافلام هندى + امريكانى





السلطان اللى هنحكى عنه النهاردة
 لازم نقول الأول مين ابوه عشان الأب سلطان برضو
واسمه جقمق
والحاج جقمق كان من مماليك السلطان برقوق ورجالته
وفضل جقمق دا يتنقل من عصر سلطان للتانى
لحد ما وصل هوه شخصيا للحكم وملك زمام البلد
وكان كبّرة ف السن
وقعد لحد سن الـ 80 سنة وعداها


 ثم ...
كعادة الزمن دا اول جقمق ما حس انه خلاص
 هيقابل وجه كريم راح منادى الامرا الكبار والقضاة
وكل من له وضعه ف البلد ولمهم عشان يبصمهم ..
هيبصمهم على ايه؟
 على ورقة التوريث يا جماعة طشبعن
 الحاج جقمق كان عاوز يورث الحكم لأبنه
قوم لم الامرا والقضاة والعالم دى عشان يمضوا 
وهما ساكتين



وطبعا البهوات اتلموا ف حضرته
ومضوا من غير ما يفتحوا بوقهم
 كان وسط الناس دى الامير الكبير أتابك العسكر
 وكبير الليلة أينال الاجرود أفندى




اينال دا كان اكبر راس ف الجيش #اخدينلى_بالكم
وكان بيمشى البلد بأعتباره اكبر الامرا سطوة ونفوذ
ووضع وقوة 
وبموافقته هوه والباقيين تم الآتى ..



تم تنصيب فخر الدين عثمان بلقب " المنصور "
فى 1 فبراير سنة 1453 على العرش
 ومن غير وصاية ولا نايب
هوه بطوله كدا
 وكان عنده 19 سنة يا دوب




عثمان وهنناديه بلقبه بقى "المنصور" من الآن فصاعدا
يعتبر كدا مسك العرش ف حياة ابوه
 قام الولد معملش هيصة ولا هوليلة احتراما لآبا الحاج
 بس مشى المناديين يهتفوا ف الأسواق بالخبر
وبقى كل امير يدين بالولاء للسلطان الاب
 ييجى يدين بالولاء للسلطان الإبن
 وقعدنا كدا لحد ما عدى 12 يوم
والسر الألهى طلع 
ومات الملك عاش الملك




وكدا المنصور بقى السلطان رسمى فهمى نظمى
 لوحده تماما وابتدى النزناز بتاع المماليك يشتغل
 الامرا اتلموا عليه كل فرقة وطايفة عاوزة رواتبها
وكل فرقة وطايفة عاوزة امتيازات واقطاعات وحركات ..
كان فيه وقتها كذا فرقة
الجقمقية والبرقوقية والناصرية
 والمؤيدية والأشرفية والسيفية..الخ



كل فرقة ف دى عبارة عن مماليك سلطان راحل
مات اه بس فضلوا هما بنفوذهم
وكونوا زى مراكز قوى
كانت بتضغط على أى سلطان جديد 
وكانوا بيناطحوا ف بعض ف أوقات الفرااااخ 



المهم .. 
المنصور طبعا ركز ف انه يهتم برعاية الجقمقية
اللى هما مماليك ابوه وخدمه
وبقى يدى الامرا بتوعهم حاجات
ويدلعهم وباقى الفرق تشيل وتنكت



بعدين المنظر معجبهموش
فطلبوا يجتمعوا بالمنصور
 وفعلوا راحوله القلعة وبمندوب عن كل فرقة
وطالبوا برواتبهم
 قام المنصور رمالهم الرد ف وشهم معييش فلوس !!!
- ازاى يا حاج معكش فلوس؟
- كدا اللى حصل 
-هوه بابا مسبش فلوس
- لا مسبشى !
- ازاى ؟؟
 - بابا مسبش ف الخزانة الا 30 ألف دينار بس !
 - نعمممممممم يا خويا
 #وكل_نعم_ف_هذه_القعدة اعتقد انها ذٌكرت مصحوبة 
بشكرة اسكندرانى من بتوع انشراح 
لازم حتماً واكيد 




طبعا الامرا مصدقوش الهرتلة دى
 يعنى ايه جقمق يقعد ف الحكم خمآشر سنة بحالهم
 وبعدين يشيلوا البلاطة بعد موته
فيلاقوا تحتها 30 الف دينار بس .. 
دحنا قاتلين سارقين ناهبين سوا وعارفين اللى فيها  
احنا عنهرج بقى ؟!!




قعد المنصور يحلفلهم 
والله دا اللى حصل
 وهما مش مصدقين المهم ف الآخر قالهم 
هتصرف
وراح الأستاذ شوية رجعلهم 
بعد ما سك عملات اسمها "المناصرة"
اقل ف الوزن عن العادى من عملات زمانه 
وقبضهم 
قوم اتجننوا زيادة 
كدا يا منصور بقى نوافق ابوك يقعدك ع الكرسى
وانتا ملكش فيها وبعدين تخمنا ؟!
#خالنا_يعنى 
دا الأمرا وجندهم اللى بيقولوا وأفاضوا ف الحديث 
بــ طب احنا هنوريك اللى عمرك ما شوفته






بس وسبحان الله الفرق اللى كانت مبتتفقش
وبيقعدوا يدوا أسافين ف بعض اتفقوا ..
اتحدوا على معاداة المنصور
 وتقولولى طيب هوه موقفه كان ايه ساعتها ؟؟
مش انا اللى هقول
دا تغرى بردى اللى بيحكى ازاى
 ان المنصور ومماليكه وحواشيه ف القصر
مهتموش بعاصفة المعارضة دى
وركزوا ف توطيد رجالتهم وبس !!

وبقوا العقلاء ينبهوهم خدوا بالكم
 انتوا كدا بتوسعوا الموضوع
والعالم هتقوم ع السلطان وهتبقى حوسة
فيقولوا مش هيحصل

وتغرى بردى بيحكى بالنص ...
انهم قالوا للأمير تمربغا
" بلغني أن الأشرفية في عزم الركوب على السلطان "
 فضحك "خيرت" وقال: 
" هم نقطوا بعقلهم " !!!!!




القصد انه يعنى 
محدش من بلاط السلطان ولا رجالته
 بص للمشهد ولا شاف الحقيقة
واستهزىء واستهتر وتجاهل واستعبط .. 
ومش بعيد يكونوا قالوها
 حرفيا 
دى زوبعة ف فنجان 
#مش_بعيد



بس واتلم المؤيدية والأشرفية
وكانوا اكبر فرق المماليك وقتها
واعداء الامس بقوا أصحاب اليوم
وننسى الخلافات مؤقتا لحد ما نشيل الراجل دا وكدا




وعقدوا العزم على حصار القلعة واقتحامها
واجبار المنصور يمشى
 بس الأول عدوا على بيت الامير الكبير اتابك الجيش
 واكبر راس ف البلد
 اينال الاجرود

ودخلوا عليه برابطة المعلم
 والمنصور دا مينفعشى
 ولازم تبقى معانا
وانتا الكبير بتاع البلد دلوقتى
 وهيا بنا يا رجل 
اينال عمل مكثوف وتمنع شوية
وقعدوا الامرا يتوافدوا على بيته ويبايعوه
ويقولوله انتا اللى تمسكها بدل المنصور
والافلام دى اللى انتوا هارشينها
 اينال سكت مفتحش بوقه بكلمة 
#يتمنعن_وهن_العايزات_وكدا
بس اول ما قالوا احنا طالعين ع القلعة خلاص
 راح قايم وخارج معاهم .. ! 




ف نفس التوقيت كانت الاخبار وصلت للقلعة
 والمنصور جواها جمع امرائه ومماليكه
والحقونى هنعمل ايه ف الوقعة دى ؟
 قالوله العادى هنحاربهم طبعا
واتمركزوا ف اماكنهم
والمنصور بعت واحد من رجالته بمنادى
 يقول للمماليك السلطانية يطلعوا ياخدوا نفقتهم
نظام بيغازلهم بالفلوس يعنى عشان يشق الصف



طبعا مفيش داعى اقولكم ان الراجل اللى نزل دا
 هوه والمنادى اتلم عليهم انصار الطرف التانى
 وبهدلوهم اخر بهدلة وروحوا القلعة متصابين وبينزفوا .. !
لما رجعوا بالمنظر دا قصاد باقى الامرا
العسكر بتوعهم اتهز شوية منهم
وبقوا بيتجادلوا والاخبار وصلت ان العدو ع الأبواب
 فتمركزوا مضطرين 
وبدأت الحرب



الكلام بدأ يوم الاتنين وحصل عركة كبيرة يوم التلات
كان عدد المماليك ف صفوف أينال فيها
عمال يكبر على عكس المنصور
 والأجرود بقى كعبه أعلى

اينال كمان كان قائد شاطر بعت رجالته
 يفتحوا جامع السلطان حسن بالقوة
بعد رفض اللى جواه انهم يفتحوا
 وبعدين طلع رجالته فوق السطح بالسلاح
زى منتوا عارفين جامع السلطان حسن
ف مواجهة القلعة وارتفاعه عالى
وكان عادى يحصل قتال بين الناحيتين
 كان بينفع ف الحكاية دى قوى 
المهم ...
طلع رجالة اينال فوق سطح السلطان حسن
وبقوا ف موقع احسن للضرب وانهاك رجالة المنصور
 ومش بس كدا .. !!

على ما جه يوم الاربع 
كان اينال ورجالته منعوا تدفق المية للقلعة
الميه اللى طالعلهم من سور مجرى العيون
 عكننة بقى وعشان يقرفهم
ويهزهم زيادة
وابن تغرى بردى بيسربلنا سر عسكرى خطشير
 الا وهو ان القلعة ف هذا التوقيت
نقطة ضعفها هيا 
باب السلسلة والأسطبل السلطانى 
واللى ياخدهم يغلب

باب السلسلة دا اللى بعدين هنعرفه بإسم باب العزب 
 اما الأسطبل السلطانى
فكان فيما يبدو مكان يدخل منه الجند والأسلحة
 ف الغالب
القصد بقينا الأربع
والمنصور ف حالة يرسم لها
 بينما إينال ف وضع احسن
 قوم ايه ؟؟



 يبعتوا يطلبوا الخليفة العباسى القائم بأمر الله حمزة فورا
مين يا طمطم اللى هيبعتوله ؟؟
 الامرا طبعا اللى كارهين المنصور
واللى انشقوا عليه ف الكام يوم اللى فاتوا
ومعاهم يا سيدى القضاة الأربعة ..
وأمين السر بتاع المنصور والكبار والاعيان بتوع البلد
 وطبعا معاهم اينال اول نفر
 وكلهم على نفس واحد للخليفة حمزة
عاوزين نشيل المنصور يا آبا الحاج!




اصلا الخليفة العباسى ف مصر دا كان مجرد منظر
وبارفان لا بيصد ولا بيرد
 بس عشان البروتوكول والحركات
الراجل كان لازم يندهوله 
وقالهم طيب حاضر!
بس وتم خلع المنصور ف ساعته وتاريخه
 ف حضور هذا الجمع الغفير

وبعد ما انكتب المحضر 
ومضى الكل عليه 
الخليفة سألهم ..
طب بعد اذنكم يعنى ولو مفيهاش رزالة
هتجيبوا مين مكانه ؟؟
 مكنش فيه رئيس محكمة دستورية وقتها طبعا
ولا عدلى منصور
 لكن كان فيه مين يا حلوين ؟؟؟
ايون اسم الله عليكو ..
الامير أينال اتابك العسكر
 اللى قاضى القضاة وقف وبص للحاضرين وسألهم ..
هاه يا ولااااد ترضوا بمين وحبيبكم ميييين ؟؟
راحوا قايلين 
" نحن راضون بالأمير الكبير "




يوغتى كميلة عليهم حافظين وشاطرين
وحلوين واموريين وموافقين ومبسوطين
 المهم خلاص احتكم الامر لعبرحيم أينال عمرو
 وبموافقة الخليفة 
وكل دا 
والحرب دايرة عند القلعة



ومشى المنادى بعد اللمة دى ينادى ف الأسواق
الخليفة خلع الملك المنصور من الملك
واينال هوه سلطانكم الجديد
وصل الخبر للمنصور ف القلعة 
ويا ضينايا اتغم قوى
وف وسط العركة مخدش باله ان الامرا الموالين له
كانوا بيتسرسبوا واحد ورا التانى
ويروحوا لأينال ينضموله
#النور_النور_النور_النور_موعودة_يلى_عليكى_النور

وفجأة لقى روحه ضعيف وضهره مكشوف
 عن اول يوم قتال وأسوأ
وفكر يبعت لعربان الشرقية والبحيرة يطلب مساعدتهم
 بس الأمير قاني بك
 قاله لأ مينفعش دول ألعن من المماليك
 ولو جم هيقتلونا احنا 
ويحكموا .. !



قصره 
الموقف بقى مقندل
والقلعة متحاصرة 
والمدد بينقطع
والخليفة تخلى عنه
المنصور لقى مبدهاش راح باعت اتنين من امرائه
 بمنديل الأمان 
يعنى كدا بــ #يسلم_خلاص
ويقال ان حصلت مفاوضات بين الطرفين
الامير اينال والمنصور عن طريق الامرا
وحصلت هدنة
 وبعدين رجعوا تانى اتخانقوا 
والقتال استؤنف

وطبعا الجند والامرا بعد تنصيب اينال سلطان
 قلبهم قوى وبقوا اشرس والقتال احتدم ف القلعة
وتغرى بردى بيقول
 انضربت طلقات م المدافع 
هزت المكان
واقتحم رجالة اينال باب العزب
و قبضوا على كل اللى ف طريقهم
 وسال الدم انهار لحد ما وصلوا لمطرح المنصور أفندى 

سى الافندى المنصور كان فين ساعتها ان شاء الله ؟؟
ف البداية ف الأسطبل
وبعدين لما شتد الضرب عليهم
الباشا طلع الحريم وقعد جنب امه
 ومتحركش
 O.o 
والعرف وقتها كان عدم اقتحام الحريم
يعنى اختار المكان الآمن عشان ميقتلهوش
المهم ركن المنصور جنب نينة الحاجة
 لحد ما إينال بعت يطلبه

 بس اينال مطلبوش ..
واللى حصل انه خرج السلطان المخلوع من القلعة 
على فرس
معزز مكرم مش مقيد بالحديد ولا حاجة
 وحواليه موكب
ووراه بعض الامرا المقبوض عليهم من حاشيته
 ومشى ف وسط الناس اللى وقفت تتفرج ع المنظر العجيب
 ومر بقرافة مصر القديمة
وبعدها ع النيل
 وركبوه مركبة وسافر على اسكندرية




تغرى بردى بيوصف المشهد بأنه كان عجيب وغريب
محدش شافه قبل كدا
 بس ف الوقت نفسه المنصور متبهدلش
كما يحدث عادة لمن ف وضعه
وبعتوه اسكندرية مقبرة المماليك ف هذا التوقيت
وكان معروف ان اللى يروح "البحرة" او اسكندرية
 بيتسجن ويتعذب لحد ما يقّر بالفلوس فين
وبعدها تنقطع اخباره 
ويروح اثره لحد ما يموت

المنصور بقى كان محظوظ وربنا بيحبه الجدع دا
اتاخد على اسكنكرية هوه وامه واخواته الصغار
واتحسبوا كلهم هناك فعلا
 بس دون ضرر
وفضل المنصور طول فترة حكم السلطان إينال
 اللى هيا 7 سنين ..
 محبوس ومقيد الحركة
 ولا بيروح ولا بييجى لحد مات اينال
 وجه ابنه من بعده 



وشوف بقى
كل الافلام اللى بنحكى عنها دى من سلطنة الأبن
 وبعدين خلعه دى حصلت ف قد ايه تفتكروا ؟؟
 شهر و13 يوم
يعنى 43 يوم بس يا ثااااامح




الواد مقعدشى ع العرش الا 43 يوم بس
 وخلعوه
ولما جه اينال من بعده قعد 7 سنين ...
 وكما تدين تدان 
الراجل خلع نفسه وسلطن ابنه
المؤيد احمد ف حياته



ونودى ف الناس بالمؤيد احمد سلطان من هنا
وابوه اينال مات بعدها بكام يوم ... من هنا
وشوف ازاى بقى حكم الزمن
هما 4 شهور و4 ايام 
واتخلع الولا
واللى خلعه كان اكبر امراء ابوه .. خوشقدم
والسبب برضو ان مرتباتهم مجتش
 والمؤيد قال
أصل بابا مسبش غير 100 الف دينار بس ف الخزنة .. !! #اخراشى
مفيش تجديد خالص طب دوّر على حجة تانية 



قصره ..
 نرجع للمنصور المخلوع البائس ...
هل بت ما قعد ف اسكندرية لحد الممات ؟؟
لأ طبعا ربنا بيحبه  الجدع دا 
لأنه قعد فترة حكم اينال قيد الاحتجاز
ولما مسك ابن اينال 
طبعا ملحقش لا يراجع
 ولا يبص لحالة حد واتخلع هوه روخر ..
وودوه على سجن البحرة ..
 اسكندرية 
برضو ... !! 
و#كما_خلع_بابا_اللى_قبلك_هيجيلك_اللى_يخلعك_برضو



ولما جه السلطان الجديد بقى
أمر بالعفو عن المنصور ...
فخرج المنصور م الحبسة
وخوشقدم بعتله فرس هدية وسابه يتحرك بحرية
والجميل بقى ان المنصور قرر يتعلم اصول الفقه 
ويدرسّه ..





وراح خوشقدم
ومسك بداله يلباى اللى حكم 56 يوم
وبعده مسك تمربغا اللى حكم 59 يوم
ثم جاء قايتباى تبتّ فيها وقعد 29 سنة بحالهم
اللى كان سلطان صايع حقا 
#وللصياعة_اصول




قايتباى بقى عامل المنصور بما يليق
وكان بيحترمه وبيقدره وبيستقبله ف القلعة استقبال كويس
ولما المنصور طلب يحج وافقله
 وبعتله هدايا وفلوس 
ودلعه
و احدى المصادر قعدت توصف ازاى قايتباى
اتعامل مع المنصور بشكل فيه احترام
لرئيس سابق من رئيس حالى
ودون اى اهانة او مساس بوضعه حتى لو مخلوع !

القصد 
المنصور انشغل بالفقه والتبحر فيه
وعلى فيه لحد ما بقى مفتى طبقة العلماء 
وسافر الحج ورجع منه على دمياط
وقعد فيها لحد ما مات 1484 ف الخمسينات من العمر
ودفنوه مع ابوه ف تربته الملحقة بالجامع بتاعه والمدرسة 




وتغرى بردى حبيبى بيقول كذا ملحوظة ...
بالنيابة عنى 
:))
اولهم ان المنصور اتخلع ف مدة قصيرة 43 يوم
ومعمرناش شوفناها دى ف حد قبله .. !
وبيرجع اسباب خلعه 
وانهيار دولته بالسرعة دى
 لعدة اسباب اولها قلة خبرته
 وعدم تدبيره وعدم انتباهه لمن حوله وتحذيراتهم



وكمان بيشير لحصار القلعة
وبيقول نصا ان فشل رجالة المنصور ف الدفاع عن القلعة
راجع لأنهم يملكون
 "سلاح حاضر وعقل غائب "
 وقلة خبرتهم بالقتال 
ولؤم الخصم ساعد ف هزيمتهم



تغرى بردى كمان بيحكى
انه بأعتباره قريب من المماليك
 حاول ف اليوم اياه بتاع تجمع الامرا والخليفة والقضاة
.. انه يبص ف وش اينال 
ويعرف رد فعله

وهل هوه سعيد بالحكاية ولاّ لأ فمعرفش
لأن اينال كان صارم الملامح
وعرف يخبى انفعالاته ومبينش حاجة
والظاهر برضو ... #مكنش_فيه_رصد_ساعتها




والمثير ف الحكاية اكتر ان تغرى بردى بيقول
 ان اللى حصل للمنصور دا .. 
بسبب أبوه
 عشان جقمق كان اتابك عسكر برضو
واخد الحكم من ابن سيده غصب!!!
قوم ربنا رده ف ابنه ..
وسبحان الله ...
 اينال كمان اتردله ف ابنه
والسلاطين كانوا اما قاتل ومقتول 
خالع ومخلوع ... 
ملهاش حل تالت .. !!



وخلاص توتة توتة فاضل 
اقول ملاحظاتى انا بقى
 :)

 1) الراجل تغرى بردى دا لطيف قوى
وسيد التفاصيل الدقيقة حقا
 كان امير ومؤرخ وسبع صنايع
وعنده شوية حاجات كدا تفطس م الضوحك

يعنى مثلا قعد يوصف 

ازاى السلطان كان لابس معرفش ايه بنفسجى
وفوق دماغه ايه فحلوقى
ومين دخل عليه وجه ناحية الشمال شوية 
 ولما اتسلطن كان الوقت 20 درجة برج الحوت
والغارب برج السنبلة والمتوسط برج القوس
والفِلة ف المنفلة !!
#اخرابى_ع_الناس_الرايقة !!


2) الامير أو السلطان المخلوع من غير ما ينقتل بعدها
 دا كان من النوادر اللى متكررتش كتير ايام المماليك
وكانوا بيسموه الامير "البطال" أو السلطان "البطّال"
يعنى اللى طلع ع المعاش 
والمنصور كان نموذج نادر الحقيقة
 لسلطان فضل عايش ومفكرش يرجع يطالب بالعرش
وغالبا لأنه شاف الحق
وعرف ان السلطة نجاسة 
وان عرش مصر مهلكة
واهو عاش ييجى 30 سنة بعدها بين الناس والسلاطين
محبوب لحد موته ودا كان أكرمله ألف مرة
 من الوساخة المنتشرة
ف مستنقع السياسة 
كان راجل بيفهم 
#اه_والله_ربنا_كمله_بعقله





3) الجدع قعد 43 يوم سلطنة
 وبعدين خلعوه
مقعدش انصاره بقى يقولولنا الشرعية والمهلبية والملوخية
 ولازم يرجع ويكمل مدتشه والهراء والخراء دا ..!
ليه؟
عشان القواعد وقتها 
كانت الحكم لمن غلبا
واللى ف ايده القوة
 وما زال العرف سايد على فكرة
مصر متغيرتش كتير
احنا ف زمن المماليك 2





وسايقين عليكو النبى يا بتوع مرسى متقعدوش تقرفونا 
وتقولوا دا قعد سنة واحدة ومكملش 
 دا فيه ناس قعدت 43 يوم يا بابا انتا وهيا
واتشالوا هيلا بيلا و..#عادى
 مصر دائما مبهرررررة





4) قالك اينال اتابك العسكر
عمل نفسه ف الاول مش عاوز السلطنة
 بس اول ما اتحرك الجميع .. 
 قام معاهم
 ورغم انه مبينش انه عاوز العرش
 لكن عينه عليه م الاول 


ولما حكم محدش فتح بوقه بعدها
 بالعكس نادوا بيه سلطان 
 وحكم لحد ما سلطن ابنه من بعده كمان
 يعنى هوه اصلا كان ناوى م الاول
 بس استعمل سلاح المكر والدهاء مش اكتر
فنعم بقى؟!

لسه اتابك عسكرنا الحالى 
مكنش عاوزها برضو وشكله ميقصدشى .. ؟
ايش حال ما قالكم سيف احمر واوميجا والسادات
عاوزين مزيد من الخطرفة والفضايح ايه تانى
عشان يفهمكم ان عينه فيها
ومن الأوووول ... !!

5) بيقولك المنصور لما انخلع
انشغل في دراسة الفقه 
لغاية ما بقى مفتي طبقة العلماء
 هاه
شايفين الناس الكومل
مش درايفنج ودرينكنج ودونت ميكس وعاشور
والقرد والقرداتى
 #الله_يخيبك_ريس ! 

6) واخيرا محدش يقولى
 دا كان انقلاب عسكرى ع المنصور
ويعنى هوه منصّ لما خدنا بطريقة .. الحلوة دى ورث
 مكنش انقلاب ع الديموقرااااطية سعادتك ؟!!!!




وبما انى منتخبتش مرسى
 ولا ارتضيت بجماعته البهايم
و بما انه اتعاون مع خونة العسكر
هوه وجماعته عشان يبقى ريس ع البلد دى 
باللؤم والخديعة 
اذن ..
لما الجنرال ينقلب على المتآمر ميبقاش انقلاب
 يبقوا بلطجى بيتعارك مع بلطجى على عضمة 
والجوز يستاهلوا بعض
ويبقى دى حلقة ف سلسلة طويييييلة لا تنتهى
من اغتصاب الحكم ف مصر الغلبانة البائسة !

7) تغرى بردى بيحكى
 ان لما القلعة اتحاصرت يوم الاتنين
 سقطت يوم الخميس
ف وقت قياسى 
واثناء العركة والقتال والضرب بالمدافع
 الناس عاشت حياتها عادى 
على عكس اللى كان بيحصل لما يتعارك المماليك سوا 


يعنى العرف السائد
كان ان المصريين بيقفلوا الدكاكين
ويختفوا ف بيوتهم 
ويعملوا روحهم حظر تجول بمزاجهم كدا 
النوبة دى الوضع اتغير والناس نزلت الشوارع
 والأسواق عادى ولا ف دماغهم 
ومحدش اتصاب الا اللى فضوله شده يروح يتفرج 
عند القلعة بيحصل ايه ...



ياختشى ولا حد انقهر ولا زعل ولا فرق معاه
عشان عارفين انها حرب بين طرفين 
وبيتخانقوا مع بعض مين اللى الأولى انه يسرقهم 
#شعب_منهوب_من_يومه



8) المنصور كان ابن 19 سنة 
وملوش خبرة ولا قرارى ومتودك زى اينال 
اللى عمره وخبرته تغلب 
طب مرسى بقى كانت حجته ايه عشان ينغلب 
غير انه هلاهوطة 
وجماعته فريق من الطماعين .. ؟!!



9) راخر السلطان جقمق دا هوه واينال من بعده 
اللى يورث ابنه الحكم 
مش هيستفله الاونطة جوا الشنطة تحسبا .. ؟
يعنى انتوا عارفين ان العيال هيتلم عليهم الحَوش
والامراء الكبار هيقطعوهم 
طب مش تحصنوهم وتدربوهم وتأمنوهم؟؟
ايه حوار الخزنة الفاضية دى ومفيهاش الا ملاليم 
يا انتوا بتقعوا ف شر اعمالكم
يا العيال بتستهبل وتقول مفيش .. عمدا !!
غالبا .. السببين 
عشان ربنا مش مبارك لكم ف الكرسى 
#آه_تفسير_علمى_محض_اهو

10) تغرى بردى بيقول العرش ضاع لأسباب كتيرة 
بس منها "الشباب الطاهر" بأدبيات العصر الحديث 
واللى هوه موجود ف كل زمن 
شباب الثورة الطاهر 
وشباب الإسلامجية الطاهر 
وكل بينقتل عشان نبل القضية 
وف النهاية الكلاب الحقيرة هيا اللى بتقعد ع الكراسى 
وتجمع الغنايم زى ما قال 
#نجيب محفوظ 
الثورات يصنعها الحالمين
وينفذها المجانين 
ويجنى ثمارها الأنتهازيين ..
 #درر

11) واخيرا بقى 
احنا خلاص هرشنا كيف تسقط القلعة 
وعرفنا نقط ضعفها نقطة نقطة ..
يلا نلم بعشضينا 
وهيا بنا يا رجال ونروح نحتلها
اهو نشوفلنا يومين حلوين ف الطراوة  

والواحد لازم ينبسط يا زينب 
الا الهوا فوق يرد الروح ف الصيف 
واحنا اولى م المماليك 
ولاّ ملناش بخت 
وكما يقال عن مصر دائما وابدا ان .. خيرها لغيرها
#عاااااااااااااا


وكنتوا سميتوه بأى اسم تانى يا اخوننا 
بلاش المنصور دا .. 
من أيام شجرة الدر وام على وقطز 
والفآل مش اللى هيوه 



وخدوها كلمة حكمة ...
مش دايما يقولك ع الست اللاّمؤاخذة دى مشيها بطال
او السكة البطّالة وحشة
او الإيد البطّالة نجسة 
الا السلاطين حضرتك ...
السلطان البطّال دا عمره ما كان شتيمة ولا عيبة 
واقرى الحكاية م الاول 




تصبحوا على خير 

---------------------------