حديقة الازبكية البراجوزية

 الحكاية .. 
اولا طويلة وممكن أنضطر أكلمها ف الحساب التانى
 بتاع @ro7albmama
 ثانيا الحكاية اهداء لعزة @Azza_ElShinawy
أصل ليها علاقة بالقصة
:)

حدوتة النهاردة هتبدأ بشخص
 وهتنتهى لمكان
والفلاش باك هيرجع للقاهرة
لما كانت بعد الفاطميين وحكمهم هيا العاصمة
 والمدينة اللى ع الحجِر ومتدلعة
وكانت فيها الأسواق والبيوت متزاحمة متلاصقة
وبيسكنها الوزرا وكبار القوم
 والفسطاط او مصر عتيقة خلاويص راحت عليها
 وفيما عدا ذلك أغلب الأراضى كانت مهجورة من السكان 
وحتت متطرفة وكدا 



من ضمن المناطق دى كانت وسط البلد حاليا
بكل شوارعها ومعالمها
كانت أصلا عبارة عن منطقة بتغمرها مية النيل
 لما يفيص وتتحول لبرك ثم تنحسر المية 
فتتلم العقارب والتعابين ف الاحراش 
ويسكنها اللصوص واشباههم 


المنطقة اللى هنحكى عنها كانت من الحتت دى
 وقليلا ما كان يسكنها حد
واندفن فيها اتنين من الاوليا زمان
واتعملهم ضريح كانت الناس بتروحله اوقات 
 لحد ما ..
جه أمير اسمه الأمير بدر الدين التركماني
فـ عَمَّرها وبنى قنطرة
وعمل دكك خشب الناس تقعد عليها حوالين البركة
وقت الفيضان 


وفضلنا كدا فترة
 لحد ما  رجعت المنطقة دى تتهجر تانى
 ومحدش يسكنها لحد ما ظهر على مسرح الأحداث
 أمير مملوكى اسمها .. أزبك بن ططخ
وكان احد مماليك السلطان الأشرف برسباى
وهيظهر الاخ جقمق اللى  شاف أزبك 
وعجبته فروسيته
فقرر يشتريه من السلطان برسباى
ومكنش عارف انه بعد شوية هوه كمان هيكون سلطان
 ويبقى أزبك من مماليكه المخلصين 


بعدها يعينه السلطان جقمق نايب للشام
وبعدين روح يا زمان وتعالى يا زمان
 ويتنقل الحكم من راس لراس
لحد ما نوصل للحاج قايتباى
 ومبحبوش الراجل دا ..
وآه مبحبوش عشان مفترى ورخم وبخيل
وفيه كل العبِر
 بس قايتباى كان من السلاطين القلائل
 اللى عرفوا يعمروا ف كرسى الحكم 
على عكس نظام المماليك
قايتباى قعد قرب ال30 سنة سلطان
وكان أزبك من رجاله العزاز على قلبه
و كان كبير ف السن مش صغير يعنى
 وكان أتابك يعنى قائد جيشه جنب مناصب تانية كدا ..



أزبك قعد مع قايتباى طول المدة دى
ودا يقولك حاجة واحدة بس ..
 انه كان راجل كويس فعلا 
وملوش مطامع ف الحكم ولا نيلة
 وعارف حجمه وشايف شغله وبس 
والا كان قايتباى طّير رقبته لأى سبب
 أصله كان مفترى حقا ومعندوش رحمة ولا شفقة بحد 



المهم ان أزبك جه ف توقيت ما
 وتحديدا سنة 880هـ انه يبنى لنفسه دار فخيمة
 ومكنش حابب يسكن القاهرة
 فأختار حتة مطرفة بعيد عن الدوشة ووجع القلب
الحتة دى كانت ف المكان اللى بنقول عليه
 المية وقتها كانت بطلت تيجى ف البركة
قوم أزبك عملها مجرى من الخليج الناصرى
عشان البركة تتملى تانى بالمية وتجرى فيها 
كانت فدادين الارض معدية الـ 60 تقريبا
سكنها أزبك وأسرته ف الاول 
وبنى عليها دار كبيرة وجنينة وجامع 
وبعدين قرر يروقها ويدلعها بقى 
الاول مهد الأرض وراح مساويها
وعمل سور حوالين البركة 
قصره عمل شوية توضيبات
و صرف ع الحتة دى ييجى 200 ألف دينار بحالهم ..



وكل دا والأرض مش بتاعته
وكانت وقف للدولة قوم لما البنا والتوضيب خلص
 وعزم أزبك السلطان يزوره ف قصره
 قايتباى عجبه المجهود دا 
وقرر يوهبه الأرض
ومن هنا عرفنا لأول مرة هذه المنطقة
اللى هتتسمى على إسم ساكنها و مؤسسها
و يفضل الإسم لحد النهاردة يسمى
 بـ الازبكية

المكان زى منتوا شايفين ف الصورة 
 ف النص كان عبارة عن أرض منخفضة
 الارض دى كانت بتتملى بالمية ف الفيضان
اقوم أزبك عمل ايه بقى ؟
 راح عامل سور داير ما يدور
عشان يخليه زى كورنيش كدا
ومن حواليه الزرع والمصابيح
فتحول المطرح لمتنزه روعة خصوصا ف الليل
والناس بقت تروحه
وانتوا عارفين المصريين بقى .. ميتوصوش
 اول ما يلاقوا حتة حلوة كدا يبتدوا يعمروها
وهذا ما حدث من علية القوم تحديدا مش أى حد يعنى ..

وانا بدعبس عن التفاصيل لقيت وصف يليق بالمكان
وهوه ان الأزبكية كانت حى البراجوازية المصرية
 ف هذا التوقيت 
والناس اتسابقت لبنا البيوت فيها
المؤرخين بيقولوا ان البيوت هناك كانت أبهة وكذا دور
 وليها قباب دهبية ومزينة
وكان أغنى التجار
وأشهرهم ساكن هناك 

#دوس_ع_الصورة_للتكبير_واتفرج

أزبك كان ف اواخر أيامه
وعاوز يعتزل العمل السياسى
 وفلوسه كانت كتير ومعروف بالثراء
 فحوالين قصره (بس) بنى العمايروالملحقات الآتى
ربع من 10 حجرات
وتحت الربع 10 حوانيت تطل ع الطريق
 وممشى واسطبل
وفى مواجهته اتبنى جامع أزبك
الذى كانت فوقه مكتبة 
وجنبها بيت خطيب وامام المسجد
واتعين للمسجد دا 20 شيخ صوفية
 و29 نفر للأدارة
وكان فيه مجموعة كبيرة من الحوانيت
 ومخازن سلاح وغلال ومطاحن 
وحمام للرجال و حمام للنساء
وحديقة المسجد كان فيه الميضة
 و بعدهم بشوية حظيرة للبقر ومخزن للتبن
 وموقد للحمامات
 وف شرق قصر أزبك عمل سبيل
 يعلوه كتاب للعيال تتعلم فيه
ومبنى من عدة الطوابق شملت 89 حانوت
يتوسطهم ميضة كبيرة ومزود لشرب الحيوانات
وبعض المساكن والمخازن وبئر وسواقى
كل دا حواليه جناين واشجار فاكهة!
يعنى مدينة سكنية متكاملة ...
والراجل متفهموش ايه نظامه
 بس ربك لما بيسخر ناس ..
لفعل أشياء قد تبدو غير منطقية
لكن هيرتبط بأسمه حاجات تانية غير المكان 
زى ميدان الازبكية 
و حديقة الازبكية 
ومسرح الازبكية 
و ...  سور الأزبكية بتاع الكتب  .. !

المهم الراجل عمل اللى عليه وزيادة
وشجع الاخرين يسكنوا الحتة الجميلة دى 
وف ظرف سنوات قليلة كانت الازبكية جنة
بيجيلها الناس عشان تتفسح وتتمتع وتحتفل
 لدرجة انه أزبك عمل عيد كل سنة للأحتفال
 وسماه "يوم فتح البركة"
كانت الناس بتسهر 
وتهيص
وتركب المراكب وتعيش حياتها




وازبك مش هيخلل يعنى
 الراجل يدوب وصل لـ 85 سنة والسر الإلهى طلع
كان ساعتها السلطان هوه الظاهر قانصوه الاشرفى
 واول ما مات ازبك
 انتشرت اشاعة بين الناس ان ابنه "يحيى" عمله عمل
 وسحرله عشان يموت
 ويورثه



واللى زاد وغطى ان الورثة اتشاكلوا
قوم ايه ؟
بدل قانصوه ما يحقق ف القضية ويشوف ايه الحكاية
راح ناده يحيى واخواته 
وقالهم بصوا انا ميرضينش تتخانقوا
ولا ممكن هسيبكم تخسروا بعض
عشان شوية دنانير
 وتبوظوا سيرة الراجل
 احنا هندى شوية الفلوس دى للخزانة الشريفة
ومع السلامة يا بابا منك له .. !




اولا .. الخزانة الشريفة دى كانت جيب أم السلطان م الآخر
 ثانيا بقى الشوية دنانير دول كانوا كام سعادتك ..؟
800 ألف دينار حضرتك دا 
غير العقارات
اللى هيا قصر الازبكية والأزبكية بذاتها .. !


وبس حط قانصوه ايده ع الدنانير
وأرض الازبكية والقصر والأمتعة
وكل ما يملكه ازبك
ومحدش يسألنى ازاى يحيى واخواته سكتوا ..
دا  يحمدوا ربنا انه سابهم يعيشوا!

والرحالة ستانلى لين بول ف كتابه "القاهرة"
 أفاض ف وصف مباهج الأزبكية
وذكر بأن المماليك حقا 
هم سادة العمارة والقباب االمنقوشة
وحكى ازاى انه شاف أمراء وكبار التجار
 وعلية القوم اللى سكنوا الازبكية
لأن بيوتهم كانت تحوى النفيس والغالى
 كانوا عاملين بوابة للحى 
بتنقفل بالليل
وكانوا بيوقفوا عليها حراس شداد
واتفضلوا كان فيها كومباوندات من زمان أهو ..
عشان بس تعرفوا ان مصر سباااااااااقة  ورائدة 

المهم راح زمن المماليك
وجه العثمانلية اللى شافوا الأزبكية متنزه جميل وحلو
وعلى عينهم وراسهم
 بس كمان شافوه مرتع للفساد والانيحيلااال
ولازم ينضف بلى بيرتادوه ...هه



قوم مبدئيا عملوا الجزء الجنوبى الشرقى منها جبانة
 وبعدين منعوا الموسيقى والمعازف
 عشان حراااام
ومنعوا حاجات أخرى
حاجات ايه يا طمطومة ..؟
 اقولكم انه ف بعض الحتت المتطرفة
كان بيتعمل قعدات للمزاج والذى منه
 فأزاى بقى حد يفيش الهوامش ويتمسخر وكدهون .. ؟؟؟

العثمانيلية عملوا حملات مداهمة لكل الاوكار دى
وقبضوا على الغوازى وبتوع الحشيش
قصره نضفوا المنتقة



وظهرت بعد ذلك 
اسماء ف المنطقة ليها حيثية ووضع
منهم الشيخ البكرى كبير المشايخ الصوفية
 والشيخ الشرقاوى شيخ الازهر الشهير
والشبراوى والشرايبى
وعثمان كتخدا كل دى اسماء سكنت ف اوقات متفاوتة
كلهم كانوا ناس مشهورة بالورع والتقوى والمهابة والكرم .. كتخدا دا لوحده ابنه عبدالرحمن بنى ييجى 12 مسجد
وكتاب وسبيل وافلام كدا ..
 المهمممم



احد المؤرخين حكى ان كان فيه تاجر بن شهير
اسمه الشرايبى كان ساكن ف الازبكية
واتعرف بيته بـ بيت المجد
 كان راجل كريم وخّير 
وعامل مكتبة عظيمة فاتحها للعامة بلا مقابل 

والمنطقة كانت بيتعمل فيها الأفراح من اهل المنطقة
 فيخرج المعازيم والاهل من جامع أزبك
بعد الصلاة 
وبعدين يزفوا العروسة لبيت العريس
ويعملوا هيصة وهوليلة ويركبوا المراكب وينزلوا البركة
 وزى ما الناس بتتجوز ف البواخر أهو
محدش احسن من حد
 :) 

 #دوس ع الصورة دى للتكبير .. 
الأزبكية كمان سكنها على بك الكبير
 فاكرينه كنا حكينا حكايته الغلبان دا
لما مات
مراد بك الخسيس سكن قصره ف الأزبكية
واتجوز مراته نفيسة
والست نفيسة المرادية (اتنسبت لجوزها الجعر مراد)
كان لها صيت ومكانة بين المصريين
هنبقى نحكى عنها ف يوم ان شاء الله 
المهم ان الازبكية من كتر بهائها
 كان فيها مساحة مخصصة للإحتفال بالمولد النبوى
 اللى يعتبر أهم احتفال دينى بيعدى ع المصريين
 المسلمين ف مصر

وسكن الازبكية زى ما قولنا علية القوم والاكبار والباشوات
 وكان منهم الأخ محمد باشا ألألفى
اللى لما بونابرت هيدخل مصر هيختار قصره عشان يحتله
دونا عن كل البيوت
عشان يبقى مقر لقيادة الحملة ف القاهرة
وطبعا الالفى يهرب م المكان



الفرنساوية كانوا صيع ..
 يعرفون من أين تؤكل الكتف
 سألوا عن الحى الذى يسكنه أغنى أغنياء مصر
وأرفعهم مكانة 
وراحوا قاعدينلهم هناك زى الخازوق
وفى الازبكية هيسكن أخر عنقود البكرية وقتها 
 الشيخ زفت خليل البكرى اللى هيتعاون مع نابليون
 ويبيع ناسه عشان بونابرته يعينه نقيب للأشراف بالغصب
ومش بس كدا دا هيبعله بنته تقريبا برخص التراب
 وكنا حكينا حكاية المسكينة دى ف تدوينة سابقة 
.. هنا

اقروها على مهلكو بقى



ف الأزبكية وقف نابليون ف التراس
 مع المخسوف خليل البكرى يفرجه
 كيف يحتفل المصريون بالمولد النبوى 
ويقول ماا أعجب هذا البلد الذى لا يعرف الحزن أبدا !

وف نفس الحى الازبكية
هيتسلل البطل سليمان الحلبى
 وينط السور بتاع قصر الألفى سابقا ..
مقر الحملة حاليا
ويقتل بوز الاخص المنكود كليبر نايب نابليون 
وف ثورة القاهرة التانية هيحصل دمار كتير
وينوب الازبكية من الخراب جانب
 لما الفرنساوية يفخخوا قصر احد الأمراء 

و ف الازبكية برضو حط الفرنساوية مطبعتهم
اللى سموها مطبعة جيش الشرق ف قصر عثمان بك الأشقر وكمان بنوا مسرح سموه المسرح الكوميدى
 #الجبرتى_بيقول

وغار الفرنساوية الى غير رجعة .. 
واتخرب جزء من الازبكية لكن تم اعادة اعمارها
وجه والى عثمانلى
 فثار اهل القاهرة عليه
 واختاروا محمد على يمسك بعد حملة #كمل_جميلك_1



وبعد ما محمد على قال مش عارف واستهبل
وبعدين قال والله غالب على أمره ..
 تراجع بعد ان أصر الشعب إلحاحاااا
ومسك الحكم عشان مصر تبقى قد الدنيا



وراح ساكن ف الازبكية ..
اختار قصر لباشا غالبا انقتل ..
المهم عاش محمد على ف الأزبكية 3 سنين
لحد ما جند الأرءناؤط عملوا عليه مؤامرة
ومملوكه عابدين كشفها وقاله ..
فمحمد على كافىء عابدين بحتة الأرض
 اللى اتسمت بعدين على اسمه بحى عابدين
 اما السوسة الكهين محمد على
 فراح طالع القلعة واتمرتس فيها خوفا على حياته
وبعدين فضل قاعد في القلعة علطول

 ويسيب القصر اللى كان ساكن فيه ف الازبكية
 يبقى دار ضيافة
ويشتريه راجل أجنبى بعدين
يحوله لفندق ويسميه "شبرد " وبعدين يكبره

ويخليه فندق عظيم

وبعدين يتدمر الفندق دا ف حريق القاهرة 

ورغم محاولة الأغتيال اللى كان هيتعرضلها محمد على
 الا انه بنى سراية لبنته "زينب" ف الازبكية
اللى فضلت حى الأكابر والباشوات
 لفترة مش قليلة
ويقرر محمد على ف لحظة كدا متفهموش ليه ..
انه يردم بركة الازبكية ويقول كفاية عليها كدا
 انا عاوزها أرض وبس 
وفعلا اتردمت ف ولاية ابراهيم ابنه

وروح يا زمان وتعالى يا زمان
عيلة محمد على تبدأ مسيرة التوريث 
 يموت ابراهيم باشا
قبل أبوه 
ويموت الاب 
ويمسك عباس حلمى الاول الحكم
والواد كان رخم وسقيل وبراوى وفيه كل العِبر
دار الشرايبى تاجر البن اللى حكينا عنها
كانت من أعظم البيوتات
كانت قبابها دهبية وأرضها لونها أزرق
والمدخل بالسلالم 
قوم اشتهر المطرح بالعتبة الزرقا

جه عباس حلمى الاول واشترى البيت العظيم دا
وقال ايه كان بيتشاءم م اللون الازرق
راح هده ومساويه بالارض
 وبانيه بأرضية خضرا عشان بيحب اللون دا اكتر 
#جاك_وكسة
فأتغيرت التسمية من العتبة الزرقا ..
للعتبة الخضرا من يومها
وروح يا زمان وتعالى يا زمان
مسك سعيد ومات 
وبعد منه جه حبيبى .. سماعين ابو السباع

وكل الناس ف كوم
 واول ما نجيب سيرة اسماعيل كوم تانى
 عشان الراجل اللى ينكرفضله (رغم مساوئه يعنى )
 يبقى هينضرب منىىىى
ابو السباع كانت دماغه مختلفة عن سابقيه
وعنده احلام يخلى مصر حتة من أوربا
ويخلى القاهرة باريس الشرق
والجدع كان ف زيارة لمعرض ف باريس بيتفرج ...
والكلام دا كان سنة ١٨٦٧
قوم شاف وانبهر بالعمران والجو
ورجع من هناك
وهوه مصمم يعمل من القاهرة نظير لباريس

وحط خطة بمساعدة "على مبارك"
على مبارك مكنش بس مهندس وراجل علامة ف مجاله
 كان كمان زميل دراسة للخديوى ايام دراستهم ف باريس
 لما بعتوهم يتعلموا فالدماغ كانت واحدة ..

 واحد سمع الأفكار والأقتراحات
 والتانى ابتدى يعملها من لحم ودم ع الورق
 واتحطت الخريطة للقاهرة الخديوية
وكان للازبكية منها أكبر نصيب .. !

الأزبكية قبل أسماعيل كانت مجرد حى قديم
 بركته تم تجفيفها وتم اهماله ف زمن عباس وسعيد
وبقى البيوت يسكنها الطبقة العادية والمتوسطة 
بس حالها دلوقتى هيتبدل تماما

لأن على مبارك والمهندسين الأجانب
هيحطوا تخطيط للقاهرة الوليدة
وتقريبا هتكون الازبكية هيا مركزه
او كما وصفها على مبارك 
وبالحرف "سرة البلد"

وزى ما اتحطت خطط لبنا العماير الكبيرة
وحواليها حدايق
 اتحطت الخطة لعمل حديقة عامة
على غرار حديقة شافها الخديوى ف باريس
وقال نعمل زيها بالظبط
لدرجة انه جاب نفس المهندس الفرنسى
وكان اسمه باريل ديشان عشان يعمل حديقة ..
هتعرف بعدين بحديقة الازبكية

ومش عاوزة عياط ونحيب وشهنفة وشحتفة
وأى مظاهر تعاسة 
عشان الصور الجاية أوقع وأبشعععع 
ماشى ؟
 هه





الجونينة حضرتك تم انشائها على 20 فدان بحالهم
وتم تزويدها ب2500 مصباح غاز
واتغرس فيها أشجار من حوالى 150 نوع نادر وغالى 

الأشجار دى
جت من الهند واوربا وافريقيا والبرازيل وكوبا .. !
واتسمت شجرة على اسم فرجينيا تكريما ليها
وشجرة على اسم جورج واشنطن تكريما له برضك
#ياختشى ع الروقان 

واتعملت بحيرة صناعية كبيرة ف قلب الحديقة
مع بحيرات صغننة متفرقة
وجسور عليها وقنوات 
وافلام كدا غير ايه بقى .. ؟

اتعمل جبلاية ..
 زى بتاعت جنينة الأسماك والحيوانات كدا 

واتعمل كشك يتعزف فيه المزيكا مرتين اسبوعى 

واتخصصت مراكب بالبدال للى عاوز يتنزه ف البحيرة 

وخدوا التقيلة بقى
 اللى كان بيعزف المزيكا دى مش أى مزيكاتية 
دى تبقى فرقة الخديوى الموسيقية
فرقة ميرى رسمى فهمة نظمى
يعنى آل إيه ..
 العسكر زمااااااان مكنوش بيضربونا ويسحلونا ويقتلونا
دول كانوا بيعزفولنا مزيكا يا ولااااد 
#هااااححح

وبيقولوا الجنينة لما أفتتحوها كانت مزودة 
بمحلات صغننة للهدايا 
ومعمل تصوير 
ومنصى لبيع الدخان 
ومنصة للرماية 
ومطاعم ومقاهى شرقى وأوربى 
O.o

أقولكم كمان ؟!
الحديقة كان فيها مسرح بيتعرض عليه عروض مسرحية
حضر الخديوى اسماعيل بعضها
وكان اسمه التياترو الخديوى
ويقال ان اسماعيل اتعرض لمحاولة اغتيال هناك 
مرة لما حطوا قنبلة تحت الكرسى اللى بيقعد عليه 
ومشهور بأنه كرسى مولانا ... !

التياتروا دا اتقدم عليه أوائل العروض المسرحية
 اللى قدمها فنانين الشام زى يعقوب صنوع

 وما تلاه من فنانين مصريين
حبوا المهنة
وكملوا المسيرة ..
فاطمة رشدى مثلالما  قدمت عليه أشهر عروضها
مصرع كليوباترا

وغيرها من فرق زى فرقة عكاشة المسرحية
اللى اجرت المسرح لفترة

والمطربين يا عيال واشهرهم أم كلثوم
اللى قعدت عمر بحاله
ولحد نص الستينات تقدم حفلاتها الشهرية هناك
على مسرح الحديقة
المسرح كان يساع 600 كرسى
 قوم بعد مدة مبقاش كفاية
 راحت الست ناقلة حفلاتها لمسرح سينما قصر النيل
 اللى يساع ضعف العدد

الحديقة كان محاوطها سور ب 3 أبواب
 اتسمت الشوارع المطلة عليه بأسمائها
 لكن مفضلش منهم غير شارع واحد
اسمه الباب البحرى 
لسه موجود لحد دلوقتى

والحديقة اول ما تم الانتهاء منها افتتحت للجمهور
 بس كانت بتشتغل بليل وبس
 وقعدت فترة كدا لحد ما بقت مفتوحة بالنهار كمان

الفرقة الخديوية كانت بتعزف المزيكا العسكرية والشرقية والغربية بمواعيد ثابتة يومين ف الاسبوع
ف كشك الموسيقى المبين ف الصورة 
وكانت التذكرة ف الايام دى بتبقى دوبل

الحديقة كانت مثار أعجاب الأجانب
والمصريين والناس البسيطة كله على السواء
كل طبقة كانت بتلاقى فيها متنفس ومتعة 

واللى يبص ف الصور المتاخدة ف الجنينة من جوا 
هيلاقى جلاليب ولبس خدم وناس على قدها
.. مش بهوات وهوانم بس .. 

روعة المكان كانت بتسمح بعمل الاحتفالات والحفلات فيه للاجانب مثلا 
بمناسبتهم زى عيد الملكة فيكتوريا 
الفرنساوية بعيد الجمهورية .. 
والطلاينة .. الخ الخ 

اما المصريين فكانوا بيحتفلوا بعيد الجلوس السلطاني
واحتفال الجمعيات الخيرية
جنب حفلات المطربين زى الحامولى والمنيلاوى

وجود الحديقة ف قلب ميدان الاوبرا 
وقرب عابدين (القصر)
 خلاها تحضر بلا قصد مناسباتكتير
ايام ثورة 19 وما قبلها وبعدها 

وبيقولوا جمال الدين الافغانى وغيره
كانوا احيانا بيلقوا فيها محاضرات 
والثوار تجتمع فيها قبل خروج للمظاهرات .. 
وياما سمعت الجنينة دى هتافات ضد المحتل وكل طاغية

ومع لمعان القاهرة الخديوية وعمرانها
بقت حديقة الازبكية بتطل على فنادق انتشرت
ف ميدان ابراهيم باشا - الاوبرا حاليا 
الصورة أعلاه من تراس فندق الكونتينتال 

والأزبكية تنقسم
 جزء يبقى العتبة الخضرا
 وجزء ميدان الاوبرا

وروح يا زمان وتعالى يا زمان
وعهد الملكية بفاروق بينتهى
 وييجى الظباط الاحرار

والجنينة يتعملها خطة مختلفة ..
هتخلى شارع فؤاد او 26 يوليو يقسمها نصين
وتتقلص مساحة حديقة الازبكية للنص
و النص التانى فيتعمل عليه منشئات
زى مسرح العرايس
 ومسرح 26 يوليوالمسرح القومى حاليا

وروح يا زمان وتعالى يا زمان
وييجى زمن السادات ومن بعده الموكوس مبارك
وحديقة الازبكية ينحدر حالها زى ما انحدر حال كل شىء
ازعلكم وتشوفوا ؟؟؟

كفاية صورة واحدة .. عشان تشوفوا اللى جرالها 
ومفيش داعى اتكلم عن السرقة والنهب
 وانحسار النباتات النادرة 

والباعة الجائلين ومصايبهم 
واستغلالهم لسور الجنينة من برا 
بعد ما معرفوش يحتلوها من جوا 

ف الصورة اعلاه نافورة من الرخام الأبيض
 واخدينلى بالكو .... الابييييض
 واحد الصحفيين كتب انه لما دخل يصورها
لقى واحد بيعمل بيبى فيها !!

والمأساة انها مش بس اتجردت من الأشجار النادرة
والمبانى فيها اتمرمطت .. 
دى بقت مرتع للبلطجية والخارجين ع القانون 

والمشكلة الاكبر ان محطة المترو
والمشروع استقطع منها أجزاء
و الناس بتوع الأثار والبيئة بيهاتوا بقالهم زمن
عشان يتحافظ ع الباقى الحديقة قدر الامكان بس مين بيسمع

قصره عشان طولت ..
والليمت هيداهمنى أكيد وهكمل ف الحساب التانى ..
 الحديقة شأنها شأن كل شىء جميل تم تخريبه
بفعل القبح والفساد وقولوا أى حاجة

وهقول دايما الجملة اللى بقولها كل ما اشوف حاجة كدا
 لو الخديوى اسماعيل قام من تربته
وشاف قاهرته حصلها ايه 
والله لاّ يولع فينا وهيبقى عنده ألف حق

دى الحديقة بعد نحل وبرها

بينما دا منظرها ف عزها وفيها بجع يا عيال ...
عيطوا براحتكم بقى 

وأى صور قديمة لميدان الأوبرا
لازم هتلاقوا جنب من حديقة الأزبكية باين ف الصورة 

وأى لون أخضر 

وجميل تلمحه ف الكادر

تعرف انه جاى من الازبكية 

الحديقة ملاصقة لدار الأوبرا الخديوية
 اللى اتحرقت للأسف

مشهد من الأعلى والبركة الصناعية ف النص 

بياع الفول والطعمية 
والسقا بيسترزقواعلى سور الحديقة .. 

الله .. دا البياعين  من زمان برضك 
وهما منمرين ع السور .. !

صورة نابليون مع المنجوس خليل البكرى بيشاورله
على الاحتفالات والمراسيم ... الخ الخ
 انشالله يارب تكونوا بتحتفلوا ف جهنم سوا برضو 

جامع أزبك اللى على يمين الصورة دا
 اتعرض للضرب ف الحملة الفرنسية
وجزء كبير منه واتهد
 واللى فضل هده اسماعيل عشان يوسع الطريق 
فالجامع اندثر تماما وبقى ملوش وجود 

مبقاش موجود غير ف الصور بس
 وبنميزه بمئذنته الطويلة
اللى بتظهر ف الصور القديمة المرسومة للازبكية
والصورة اعلاه لنفس المطرح بس بعد هده

وبجملة العياط بقى حديقة الازبكية
 كان فيها ساحة للبتيناج بتشتغل ف الشتا وبس 
#عاااااااااا
 شوف الجمال بتاع العالم زمان ؟
واخيرا فاضل حاجتين بس ..
أسمعكم مقولة احدهم عن الازبكية وجمالها ؟
وثانيا هقول ليه بهدى القصة دى لعزة ؟ 

واحد اسمه سافارى كان شغوف بمصر
 وصف الازبكية بأنها كانت بحيرة رحبة
تسبح فوقها الاف من القوارب ذات الصوارى
 تضاء بمصابيح ذات أنوار مختلفة الالوان
وبها قوراب ذهبية لكبار القوم
و تسمع عزف الموسيقى
 واطلاق الألعاب النارية
وترى نساء الطبقة الرقية يطلون من المشربيات
والشبابيك فنرى الجمال متجسد 
وفى جملة واحدة يختصر كل شىء قائلا عن الازبكية
 ومشهد البشر وهم يتنزهون ليلا بها
" انه واحد من أجمل المناظر التى يمكن لليل أن يهبها للعيون"

ليه بقى القصة اهداء لعزة :-* @Azza_ElShinawy
عشان عيد ميلادها أكيد
وعشان لو كانت الازبكية لسه ف عزها
كنت هخليهم يعزفولها مزيكا مخصوص عشانها

@Azza_ElShinawy
بس نظرا لأن الفرقة الخديوية دى اعتزلت من زمان
 فهكتفى بالحدوتة
وكل سنة وانتى طيبة يا زوزو
 كل عيد ميلاد وانتى طيبة يا حبيبتى



وكفااااااااااااية حرااااااااااااااااااام ..
بتكرهونى صح
 :) 
تصبحوا على ألف خير

-----------------------------------------

احمد مخلوف @ahmed_m5lof 
 الناس كان شكاها احلى اخلاقهم احلى
 كل حاجه كانت كويسه


Hope = Faith @HendMAbdelaziz 
ولو صلاح الدين قام وشاف قلعته
 والناس اللى بترمى البيبسى هناك لدعا علينا
 ولو الفراعنة قاموا وشافوا اثرهم لدفنونا من غير تحنيط



كريموفيتش @Muh_Magdy 
 على كدة تاريخ #مصر بيسف وأحنا مش واخدين بالنا ؟! #هع