الحكاية عن واحد من الاماكن
اللى بتنده صاحبها
ولو بعد حين
وقصتنا الليلة دى تؤكد ذلك
وبشدة
زائد ان للحتة دى غلاوة خاصة عندى
وكان يا ما كان ... خديوى مش غلبان
واسمه اسماعيل بن محمد على
اللى قرر يخلى مصر جنة ويخلى القاهرة باريس الشرق
واستعان ف ذلك بالاجانب صحيح بس كانت ثقته
ف على مبارك رفيق دراسته والمصرى حتى النخاع
واللى ساعده ف وضع خريطة للقاهرة الإسماعيلية الخديوية
وقولنا قبل كدا بس نقول تانى وندوش دماغكم وماله !
ان الخديوى بناء على نصائح المتخصصين
قرر يعمل أرض وسط البلد دى بنطام صارم
و مفيهوش دلع
كان التخطيط مبنى على فكرة ان الطرق تشغل 30 %
والمبانى من 13% إلى 15 %
والباقى جناين ومساحات مفتوحة كأحتياطى للتوسع
قدام ف المستقبل
وف سنة 1871 كانت معالم وسط البلد بانت
وخصوصا الميادين الكبيرة زى التحرير
(كان اسمه الأسماعيلية وقتها)
وزى ميدان سليمان
وميدان الاوبرا
والعتبة
كل ميدان من دول كانله شنة ورنة
وكمية صور لو عملتوا سيرش ع النت
هتكتشفوا قد ايه كانت الحتت دى عليها العين وبتتصور
قوم اييييه بقى ؟؟
يفضل وسطهم ميدان غلبان .. بائس حيران
متعرفوش ليه كدهون
وهذا المطرح يبقى ميدان مصطفى كامل
أصلا أصلا مكنش اسمه كدا
حتة الارض دى ف البداية
وتحديدا سنة 1871 كانت أرض واسعة وفضا
فالخديوى تعاقد مع مهندس سويسرى
اسمه ج. ليبروى
وقاله عاوزك تبنيلى ف الحتة دى مضمار للسبق
وفعلا حصل
الميدان الصغنن كان جنب منه مباشرة
حلقة بيضاوية كبيرة اتخصصت لسبق الحصنة
ولعروض السيرك ..
وخلوا بالكم احنا بنتكلم عن فترة كانت الأرض دى
اغلبها فيه الكثير من الجناين والقليل من المبانى
مش زى دلوقتى خالص
المهم .. الخديوى اتفق مع المهندس
المهندس خلص الشغلانة
وسمى المنشأة دى بـ HIPPODROME
ودى كلمة قديمة قوى معناها مضمار الخيل عند اليونان
وكان ممكن جدا التفصيلة دى متبقاش مهمة
ولا اجيب سيرتها
لولا ان المضمار دا بحكم موقعه ف الحتة دى
هيخلى الميدان يتسمى بأسمه ميدان الهيبدروم
بس طبعا الأسم كان تقيل ع اللسان
فالمصريون حرفوه وبقوا يقولوا ع المكان
ميدان البدروم
انتوا عارفين المصريين بقى
لازم يحطوا التاتش بتاعهم
:)
وفضل الميدان شايل الأسم العجيب دا من وقتها
لحد ما جت عيلة يهودية غنية
عملت بيزنس ف مصر كبير
واشترت اراضى ف وسط البلد
وهنا لازم يحضرنى قبل ما اتكلم ع العيلة دى
ان أنوه انها كانت هتخرب بيت الست الغلبانة
اللى انا بعشقها دى
أمينة
لما سيدنا الحسين نداها .. قمت لبت الندا
وهيا ماشية سوارس صدمتها
ورجلها بقت بتوجعها قوى يا سى السيد
#عااااااا
مين سوارس دا بقى اللى صدمها ان شاء الله ؟!!!
يبقى الأخ رافاييل سوارس
كان رجل اعمال يهودى جه عشان يلهط حتة من التورتة
اللى عملها الخديوى ف مصر
وانتوا هارشين اليهود بقى اساتذة ف الأقتصاد !
اول ما نزل مصر 1875عرف من اين تؤكل الكتف
اشترى اراضى
ووسع التجارة
وعمل شركة لنقل الركاب
وسماها بأسم العيلة سوارس
الاخ سوارس اشتغل ف النقل
والمية
والسكك الحديد
وشرا الأراضى
ومخلاش ف نفسه حاجة
ونجح لدرجة ان عربية النقل اشتهرت بأسمه
قوم أى عربية تروماى تمشى وتاخد حد ف سكتها
يقول علطوووول ان السوارس صدمتنى
وسى السيد يطين عيشتهم
والعيلة كلها تتهزأ من تحت راسك يا بعيد !!
الجميل بقى ان مش بس العربية هتشتهر بأسمه
لأ فيه الاهم
ان سوارس هيشترى كام حتة أرض ف وسط البلد
ومنهم منطقة ميدان البدروم المذكورة !
ويقرر سوارس انه يبنى لروحه قصر ف هذه المنطقة
بالقرب من مضمار السبق
والقصر يشتهر باسم صاحبه
والميدان كله من 1900 يبقى اسمه
ميدان سوارس
القصر دا هيقعد على قد ما يقعد وبعدين يتهد
ويتبنى مكانه عمارة سوارس ... برضو
وتفضل موجودة لحد النهاردة
وزى منتوا شايفين الميدان كان محندق كدا
وكتكوتة يا حبيبى لا بيهش ولا بينش
ف منطقة وسط بين ميدانين كبار
هما الأوبرا وسليمان
وغلبان ع الآخريا ميدو
واللى يخرج من ميدان سليمان (طلعت حرب حاليا)
و ياخد شارع قصر النيل لحد آخره
كان بيوصله
مكنش فيه غير محلات بسيطة والدنيا هادية
ووقع تحت ايدى مقالة لطيفة بتحكى عن حال الميادين
وزعلانين قوى على ميدان سوارس
وحاله المتدنى !!
وبيقول ان الميدان بقى مرتع للخدم
يقعدوا ف الكنب الموجود ف الجوانب بتاعته
ومفيش اهتمام بالمكان ليه
وعيب عليكوا
وحاجات كدا تحرق الدم بصراحة!
دى الصورة بتاعت الميدان اللى مكنتش عاجبة
كاتب المقال
آل كدا الميدان مكنش شكله حلو ومش مشجع لحد يقعد فيه .. !
#طب
هستأجز خمس ساعات هلطم فيهم وارجعلكم
و نركن شوية حكاية الميدان ...
اللى بقى اسمه سوارس
بعد ما كان اسمه البدروم
ونروح لصاحب المطرح ونشوف ايه حكايته ؟!!
أغلبنا عارف بما يكفى عنه
اللى هوه مصطفى كامل السياسى والمفوه البارع
واللى لسخرية القدر لما تيجى تكتب اسمه دلوقتى
ف صور جوجل قول هيطلعلك مييييييين ....؟
قصره مصطفى كامل ابوه كان ضابط ف الجيش
والولد اتشرب حب البلد من الصغر
وف سن بدرى اشتهر بالخطابة
ودخل مدرسة الحقوق أقرب واسرع الطرق للسياسة
ومش هنقعد نقول عمل ايه وكان ازاى
اكيد انتوا عارفين اكتر منى
لكن حكاية الشاب هتخلص بدرى بدرى
بعد سفره باريس
وهيموت ف عز شبابه وهوه داخل ع ال 34 سنة
ويموت وتنعيه كل البلد
ويتشال الحزن ف القلب لحد ما تقوم ثورة
اللى كانوا 18 وانضملهم واحد فبقوا 19
:)
والمصريين تاخدهم الحماسة كدا
زى ما حصل بعد ثورة يناير
وييجى نحات عبقرى محلاوى عايش ف باريس
واسمه محمود مختار ويعمل تمثال نهضة مصر
#نهضة_بجد
والناس تتحمس لفكرة انه يتعمل تمثال زى كدا
على حجم اكبر ولموا من بعض فلوس الشغلانة
واتعمل اكتتاب وفعلا اتلم تمن التمثال
وبعتوا لمحمود مختار
واتعمل التمثال بعد جهد جهيد
و كنا حكينا القصة دى زمان
هنا
قوم لما نهضة مصر فكرته نجحت
الناس فكرت ليه منعملش لمصطفى كامل تمثال شبيه .. ؟!!!
وكتبت الجرايد عن الفكرة والناس اتحمست
واتفق محمد فريد مع نحات فرنساوى
اسمه ليوبولد سافين
والراجل أتم المهمة ف باريس وبعت التمثال على مصر
الشهادة لله ولازم نقول الحق
الملك احمد فؤاد كان غتيت غتيت غتيت غتاتة التنين
ومكنش بيحب حد يتحطله تماثيل
غير اهله والعيلة المالكة بس !!
قوم المسئولين عن الاكتتاب اخدوا التمثال
وحطوه ف حوش مدرسة مطصفى كامل الأولية
اللى اتسمت باسمه تكريما له
وقعد التمثال هناك ...
لحد ما جه فاروق بقى ...و كان غير ابوه خالص
كان جاى العرش شاب
ولسه مقبل ع الحياة ولطيف كدا ونفسه هادى
قوم لما عرضوا عليه الفكرة وافق ...
كانت ايه بقى الفكرة ؟؟
قالوله يا مولانا ... تمثال مصطفى كامل
مركون من زمان ف مدرسته ولازم يخرج للنور
ومفيش ميدان مناسب اكتر من ميدان سوارس
الراجل معترضش ولا عمل زى ابوه
وقالوله هنغير بقى اسم الميدان بالمرة
برضو معترضشى
#كان_أمير_و_اخلاق_الجدع_دا_والله
خلوا بالكم انه لحد دلوقتى
الميدان لسه اسمه ميدان سوارس
ولسه مفيهوش تمثال ف النص
وفاضى زى ما ف الصورة
والملك ووافق على مطرحه
والتمثال وموجود وجاهز
ومبقاش فاضل غير لحظة تنصيبه ف مكانه الاخير
بس الاول هيعملوا حركة لطيفة
:)
هيقرروا يعرضوه للجمهور اللى دفع فلوسه
وهيخرجوه ويودوه كلية الحقوق اكراما لصاحب التمثال
أعرق طلاب هذا التخصص
والناس فعلا هتروح تتفرج ع التمثال
قبل ما يتحرك من الحقوق ..
ويروح لمقره النهائى ف وسط البلد
ويروح التمثال ف وسط زفة وهيصة ... ع الميدان
ويتنصب هناك عشان يفضل من سنة 1940 لحد النهاردة
شاهد ع المكان والزمان
واللطيف ان كان فيه اقتراح ان التمثال يتحط ف العتبة
والأقتراح اترفض عشان قدر ومكتوب
الراجل ميتوهش هناك ف الوسع
و مكتوباله يبقاله ميدان بأسمه!
وفكرة التمثال انه يكون جزءين
الاول مصطفى كامل بالملابسه الرسمية الملكية
«الردنجوت» واقف بيخطب
ومتحمس وبيشاور ع الجزء التانى
وهو ...
ابو الهول .. وكأنه بيتحسر على حال بلاده وما آلت ايه
والسؤال هنا .
. معقول مكان يتسمى بأسم شخص
لا سكن فيه ولا له علاقة بيه
ويمكن يكون مر عليه مرة ولاّ اتنين
وهوه بيتمشى ف وسط البلد وبس ؟!!
مصطفى كامل مكنلوش أى علاقة بميدان البدروم
ولا ميدان سوارس
وحتى لما مات دفنوه
ف مكان جنب مدرسة ف القاهرة الفاطمية .. فإيه ؟
الحقيقة ان الزمن هيشيل لمصطفى حاجة حلوة قوى
بعدييييييين سنة 1953 لما تقوم ثورة يوليو
ويقرروا ينقلوا جثمان الفقيد
لمطرح تانى عند القلعة
وساعتها بقى .. هينقلوا حثمانه
ويعملوا جنازة جديدة
بس تكريمية اكتر منها بكائية وحزاينى
والمشهد كله صوت وصورة
متسجل
هنا
وهيعدى مصطفى كامل اللى مات سنة 1908
على تمثاله اللى اتحط سنة 1940
ف جنازة شعبية ف ميدان بقى بأسمه سنة 1953 !!!!
آه من الزمن ...
وتصاريفه التى لا يتوقعها أحد ... ابدا
بس على فكرة الراجل دا
مكنش ميدانه بس اللى حاجة غريبة
الأغرب والأعجب انه ف مرة وقف يخطب ف جمع ما
وقال كلمتين تلاتة كدا لفتوا الأنتباه
والكلمتين تلاتة دول يتصادف انهم بعد كام سنة
يرنوا ف ودن مؤلف وشاعر فيقرر يكتب عليهم قصيدة
والشاعر دا اسمه احمد يونس القاضى
وبالصدفة يقولهم قصاد سيد درويش
فيعجبوه ويقرر يلحنهم
وتطلع أغنية تعلم مع الناس
وبعد سنيييين تبقى النشيد الوطنى ... لـ مصر !
والكلمتين دول باختصار كانوا
بلادى بلادى ... لكى حبى وفؤادى !
شوفوا الجمال !
قصره مصطفى كامل دا
من نوعية الناس اللى ماتت عشان تعيش ... م الآخر
وحكايتى انا مع الميدان
هتكون مختلفة شوية عن أى حد بيزوره
لما بينزل وسط البلد يشترى حاجة او يقضى مصلحة
انا عشت 20 سنة جنب الميدان دا
يعنى تقريبا نص عمرى بالضبط
وبعد فترة مبقاش مجرد أسفلت وتمثال ومحلات و عمارات
لأ بقى شىء اكبر وأقيم واجمل
ميدان مصطفى كامل عندى
يعنى وقت ادان المغرب ف رمضان
والعساكر واقفة بتنده بعض عند التمثال
عشان ياخدوا الفطار والتمر والمية م العربيات المعدية
ميدان مصطفى كامل
يعنى يوم الزلزال ف اكتوبر
الناس تتلم زى النمل حوالين قاعدة التماثيل
وفجأة الخوف يوحدهم .. ف مشهد عبقرى
كنت اول مرة اشوفه
قبل ما تحصل ثورة ف البلد !
ميدان مصطفى كامل يعنى يوم 28 يناير 2011
والمسيرات توصل الميدان ويحدفوا عليهم الغاز
فيتفرقوا وبعدين يرجعوا بعد شوية
وتعلى اصوات العيش والحرية ..
ميدان مصطفى كامل
هوه لأول مرة اشوف الدبابات والمدرعات
واقفة على ناصيته
عشان مش تحمى البشر
لأ
عشان تحمى البنوك والفلوس .. وبس
وابقى بعد الأيام اللى هيغوروا فيها
لأن وقوفهم استفزنى
من اول يوم
ميدان مصطفى كامل ...
هوه صوت الهتافات كل جمعة لما تطق ف دماغ العيال
يلفوا ف وسط البلد شوية
ويصحوا القلوب
ميدان مصطفى كامل ...
يعنى الزحمة ليلة العيد
وف آخر يوم رمضان
وقبل المدارس بيومين
والمحلات سهرانة لوش الفجر
ميدان مصطفى كامل يعنى ..
عبق الزمن الجميل
والمطارح اللى خطت عليها مليون مليون قدم
من زمان لدلوقتى
والناس القديمة شوية تفتكر انه كان فيه
محل فاتح ف الميدان واسمه بينتون
كان ماركة مشهورة ودلع ع الآخر
واتقفل
ولسه موجودة شركة التامين ... بمبناها العريق
وبوتشلاتى بتاع الصور القديمة
واللوحات الفنية التقليد والأصلى ...
والشجر اللى كل شوية يقطعوا منه واحدة
والصينية اللى كشتّ وبقت اغلبها بلاط
ومفيش زرع وخضار زى الاول
والتمثال اللى محدش عارف قيمته
وحكايته
ودلوقتى مغطينه آل عشان ينضفوه
طب عالله ميتبهدلشى هوه راخر زى أسود قصر النيل
اللى كل مصر كتبت عليه تاريخ ميلادها !
واخيرا قبل ما أسيب الميدان وحكايته
أزهو بكونى من جيرانه
وان لحد دلوقتى لسه بييجوا يصوروا فيه الأعلانات
الاعلان دا مثلا
كان هناك
وفيه حاجات كتييييير بس مش فاكراها دلوقتى ...
واخيرا
عشان انا خدتها جد قوى قوى النهاردة
مصطفى كامل لو كان عايش دلوقتى بيننا
كان زمانه غير كل أقواله اللى قالها
عن الثورة والنضال والبلد
بجد :)
يعنى انا ممكن أتخيل انه هيقولنا مثلا
لو لم اكن مصريا لوددت أن أكون ابن الامريكانية
لا معنى لليأس مع الحياة ولامعنى للحياة مع الأخوان #مصطفى_كامل_بتصرف
ان الامة التى لا تأكل مما تزرع وتلبس مما تصنع
تستورد م الصين او تستلف من قطر مجراش حاجة ! #مصطفى_كامل_بتصرف
ان من يتهاون فى حق من حقوق دينه وامته ولو مرة واحدة
يبقى مش اخوان بس بيحترمهم !
واخيرا
حكمة السنيييين بقى
واخيرا زى ما قولت على تمثال نهضة مصر
هكررها ف تمثال مصطفى كامل
طبق الأصل
لما تعدوا من جنبه افتكروا كويس انه بفلوسنا
واحنا دافعين كل مليم فيه
وانه بتاعنا بجد
مش فكرة حكومة ولا حزب ولا نظام
دا فكرة الناس و بس
وافتكروا كمان ..
ان ممكن جدا واحد يعمل حاجة
ويتهيأله ان محدش هيقدرها
او هيفتكرها
او انه هتروح ف الوبا مع هنادى
وكأنه محض هراء
#لأ_خالص
ادى مثال اهو وف غاية الوضوح
الشاب مات بس مش بس قضيته عاشت
دا اسمه وصورته وتمثاله
وكمان مقطع من خطبة ليه بقت
نشيدنا الوطنى !
+%D8%B9%D8%A7%D9%85+1891.jpg)
محدش يستهين بحفاظه على المبدأ او الفكرة
ولو كانت مش هيشوف مردودها دلوقتى او قدام
ويمكن كلنا منلحقش نشوف الثورة دى بتنجح
وتاخد حقها
لكن
بكرة اخواتنا وولادنا يشوفوا ويعيشوا ويقدروا
زى ما احنا دلوقتى عارفين قيمة اللى فاتوا
وماتوا بس عاشوا ف قلوبنا
وكمان ف الشوارع والميادين
وكفاية كدا رغينا وسهرناكوا بس بكرة اجازة
محدش هيدعى عليا
:)
تصبحوا على الف خير
تدوينات شبيهة
عن ميدان الاوبرا و ميدان التحرير
