حدوتة النهاردة من كتاب جمال بدوى
نظرات فى تاريخ مصر
تحت عنوان
"شهيد أسيوط"
والأحداث الساخنة هتبدأ لما تنتشر الاخبار
بالقبض على سعد زغلول
وكام نفر معاه
وتعاليلى يا بطة
وشيليى الشنطة
ونروحو على مالطا
حيث قررت سلطات الاحتلال نفى سعد ومن معه
بس عنها وبدأت الاحتجاجات والاضرابات
واندلعت ثورة 1919 ملعلعة تهز كل أرجاء مصر
وكما كان لأهل القاهرة
وسكان مدن الدلتا نصيب كبير فيها ...
كان للصعيد برضو ..
رأى وشأن ومقاومة ودم وشهداء
لما علم الأسايطة بخبر القبض على سعد زغلول ورفاقه
ونفيهم لمالطة ... معجبهمش الموضوع
لكن لأنه دايما رأس حربة الثورات هم الشباب ..
فبدأت الاحتجاجات على ما يحدث
من طلبة المعهد الدينى بأسيوط
اللى نظموا مظاهرة
مش لوحدهم .. طلبة مدرسة الامريكان كمان
قرروا تنظيم مظاهرة
وانضملهم مدرسة إخوان ويصا والمدرسة الثانوية
وخرج الشباب كلهم ف مسيرة كبيرة تلف شوارع البلد
وتهتف لمصر ولسعد
وارتفع الهتاف الشهير
الاستقلال التام أو الموت الزؤام
الاستقلال التام أو الموت الزؤام
...
والمعجم بيقول انه الْمَوْتُ الزُّؤامُ : الْمَوْتُ الكَرِيهُ السَّريعُ
والمعجم بيقول انه الْمَوْتُ الزُّؤامُ : الْمَوْتُ الكَرِيهُ السَّريعُ
...
والانجليز يا خويا ما صدقوا وسمعوها
والانجليز يا خويا ما صدقوا وسمعوها
فقرروا بعد ما حد ترجملهم ... انهم ينفذوها هما
قاموا ضاربين النار ع المظاهرة !
وانتا جاى تضرب ع العيال نار
وفاكر ان الاهالى هتفوتهالك؟
الأسايطة هيسكتوا؟
لأ طبعا قرروا يعملوا لجان لتنظيم شئون المظاهرات
وحماية اللى فيها والبلد كلها من نيران الاحتلال
زاد وغطى انهم قبضوا على بعض الزعامات المحلية
ف البلد زى المحاميين محمود بسيونى واحمد علوان
ومحمد محفوظ باشا
ووصل للناس أخبار ان التلاتة المقبوض عليهم
على مكانتهم ف البلد اجتماعيا وسياسيا
بيتعرضوا للتعذيب والمهانة فى الاعتقال
فالناس هتشيط اكتر !
وتروج مجموعات منهم على معسكرات الانجليز
القريبة من البلد .. هتلاقى شوية تبن حاطينه
عشان الحصنة بتاعتهم .. فيولع الأسايطة فيه النار
جنود الاحتلال يترعبوا ويبدأ اطلاق نار تجاه الجموع
ويكملوا داخل البلد لحد ما يسقط يومها
حسب ما قيل مئات من القتلى والجرحى
والدم سال انهار ف الشوارع جنود مدججة بالسلاح
أمام شعب أعزل لكن عزته أقوى من أى شىء
والانجليز هيخافوا اكتر من المشاعر العدائية
اللى بقت ف الجو فيلموا الجالية البريطانية الموجودة
ف البلد ويسكنوهم ف المدرسة الثانوية
ويشددوا عليهم الحراسة خوفا على حياتهم
قوم ايه ؟
مجموعات من اللجان المكونة من الاهالى
تقعد تتسلى عليهم وتهاجم الحراسات اللى اتعملت
لحماية الثكنة العسكرية الجديدة دى
اللى اتعملت برا المعسكرات ... وفين يوجعك بقى
والموضوع وِسع وبهوا من الانجليز
لدرجة انه أعييتهم الحيلة
فأضطروا يطلبوا المدد من القاهرة
قولوا هيعملوا ايه يا عيال عشان يكسروا مناخير البلد
اللى واقفلهم زى الخازوق دى
ومش راضية تنخ ؟
جمال بدوى اللى بيقول :
" لأول مرة فى تاريخ الصعيد
وفى صباح 24 مارس 1919 قامت طائرتان حربيتان
بصب حمولتهما من القنابل على المدينة الباسلة
ف غارات وحشية لم تفرق بين البيت والمدرسة
والجامع والمستشفى وتساقط مئات دول ان ينال ذلك
من عزيمة الأسايطة "
وضربنا رصاص مش نافع
ولا طيارات حربية بقنابل شافع
ولا طيارات حربية بقنابل شافع
وما زال الاهالى فى صمود
والتنكيد على قوات الاحتلال مستمرة
والظاهر حد ابن حرام يعرف سِلو البلد
شار عليهم بحيلة
شار عليهم بحيلة
ما لاذلال الناس لأنهم فجأة أصدروا بيان
بإنهم هيفتشوا البيوت بليل وعلى الرجال الخروج منها
وبقاء النساء والاطفال
الأهالى هتسكت ؟
" لم يستسلم الاهالى لهذا الانذار الحقير
فهجرت العائلات
فهجرت العائلات
بأكلمها الأسر الى المقابر والكهوف والصحراء
والاديرة للحفاظ ع الاعراض
دون ان تمسها شراذم الاحتلال
دون ان تمسها شراذم الاحتلال
او تستعملها للضغط وقت المعركة "
وتستمر المواجهات بقى ..
أهل أسيوط هيوصلهم اخبار عن قطر جاى من الأقصر
هيعدى عليهم ف السكة وفيه كمية من الرتب
وكبار ضباط الانجليز رايحين ع القاهرة
حلو ؟
فاللى هيحدث هو الآتى :
" ارسلت مديرية الامن فى اسيوط اشارة إلى جميع مراكز
ونقاط الشرطة لتشديد الحراسة على المحطات
ولكن الضباط بدلا من تشديد الحراسة أبلغوا الاهالى
حتى لا يفلت هذا الصيد الثمين "
جمال بدوى بيكمل :
" وتحركت جموع الثوارمن القرى والنجوع القريبة
من ديروط الى محطتها حتى اذا توقف بها القطار
انطلقوا الى داخله كالسيل وانهالوا ضربا على الانجليز
فيه فقتلوا اتين ضباط وخمسة جنود
وكان لهذا الحادث أثره على اسيوط "
اللى الانجليز فيها شددوا من اجراءتهم وحفروا خنادق
وحطوا مدافع تقيلة استعدادا لدكها
ف الوقت اللى اتبعت فيه إشارة لمأمور بندر أسيوط
انه يساعد قوات الاحتلال فى تسليم المدينة
البكباشى محمد كامل رد عليهم
"لن تدخلوا إلى المدينة الا فوق أشلائنا"
ولنا هنا وقفة
زمان شهروزة حكت عن احد المأمير برضو
لكن كان العكس تماما وكان يمثل نظام الحكم
والملكية ف هذا التوقيت البغيض
مقتولا
بسبب ظلمه وتوحشه
الحقيقة ان مأمور بندر أسيوط ضرب مثالا
ف شرف الوظيفة والانتماء للوطن وللشعب
ودا نموذج نادر جدا اللى هوه تقريبا مش موجود دلوقتى
الا واحد ف كل نص مليون ضابط مثلا
اللى يعملها هيا ايه يا شهرو ؟
دقة الشجاعة والجدعنة دى
والوقوف ف يمة الشعب وليس الملك والاحتلال
القصد
بيقولوا ان دى صورته والله أعلم
معرفش مصداقية الحكاية دى .. لكن لما
"بدأت القذائف تمطر المدينة بوابل من النيران والمأمور
لم يستسلم وفتح السلاحليك على مصراعيها
ووزع البنادق والطبنجات على الاهالى والثوار منهم
وتقدم مع جنوده للقيام بواجب الدفاع عن المدينة"
والمعركة الغير متكافئة دى استمرت وسجال بين الطرفين
وطبعا ضحايا ف الطرف المصرى أكتر
لحد ما وصلت تعزيزات كبيرة من القاهرة
وللأسف
طبت كفة المحتل ف النهاية
ودخلوا المدينة وطبعا اول حاجة عملوها
انهم قبضوا على مأمور بندر اسيوط
واتوجهله لوكشة الاتهامات اللى مع بعضيها دى بعد
" تقديمه الى محاكمة عسكرية بتهمة التفريط
فى السلاح الميرى وتحريض الاهالى على التمرد "
ايوه طبعا ازاى تتظاهروا سلميا
فيضربوا عليكم رصاص
وتنقتلوا من سكات وكدا صحيح ؟!!
والباقى معروف ...
" اصدرت المحكمة حكمها بأعدام البكباشى محمد كامل
وتلقى الرجل الحكم فى شجاعة وثبات"
بيقولوا أن بعض وجهاء أسيوط تدخلوا بواسطات
من كل ناحية لمحاولة تخفيف الحكم ع الراجل المحترم
لكن أبداااا الاحتلال قرر يعمل منه عبرة
لتخويف أى حد ف مكانه .. !
وف اليوم الموعود ..
" يوم 10 يونيو 1919 سيق البكباشى محمد كامل
الى ساحة الأعدام داخل احد المعسكرات البريطانية
ونفذ فيه حكم الاعدام رميا بالرصاص"
والحدوتة خلصت على كدا وقتها صحيح
لكن مخلصتش فعلا
لأنه ثورة 19 توهجت
وخطفت بصمودها حقوق للمواطن
وخطفت بصمودها حقوق للمواطن
تبعها طريق طويل من النضال
لم يتوقف لحد يناير 2011 ولن يتوقف ان شاء الله
ما دام فيه شرفاء ف هذا البلد الطيب
وانا خلصت
فاضل الملاحظات
...
...
(1)
من المرات النادرة ان الواحد يلاقى حدوتة
تتكلم عن واحد ف الموسسة النجسة دى
منذ وجودها تاريخيا الصراحة وميقولش
نروح ونقول لمين ...
لأ شخصية الليلة كانت مثال نادر ومخلص ومحترم
عز وجوده ف موقع زى كدا ومؤسسة زى دى
دورها على مر الزمن هوه قهر المواطن
لصالح حماية النظام الحاكم
اكتر من أى ادوار اخرى زى الامن والضبط والربط
ولهذا كان القضاء عليه ف حينه ضرورة قصوى
(2)
عز عليا ان جمال بدوى يلتفت لشخصية
مأمور بندر أسيوط ويبروزه دون أن يذكر ويشدد على
ان فيه ناس كتير من أهل أسيوط ماتوا وانجرحوا
واعتقلوا ف المحنة دى ومحدش يعرف أساميهم
وربما تكون تضحياتهم كانت أعظم لأنهم كانوا بلا ضهر
ولا حماية ولا حد يفتكرهم غير اهلهم
لكن احنا فاكرين يا مصر
فاكرين ولن ننسى
(3)
ايه اللى عملوه أهل أسيوط دا !
الصعايدة أجدع ناس والله
توصل لانهم يبعتوا يجيبولهم طيارات
عشان مش قادرين عليهم ... !
الأسايطة وكمان الأسايطة ... ألف مرة
وبغض النظر عن النهايات .. المؤقتة
فيه ناس بتاخد قرارات قد تبدو متهورة
وواضح قوى ان نهايتها حبس أو موت
لكن بياخدوها ويكملوا
عشان كل شخص ف هذه الدنيا له دور
ومصير محدد بيعيشه ويكمله
ولما بيخلصه .. ينسحب من الحياة بجسده
لكن تفضل السيرة اللى على رأى المثل
أطول من العمر !
(4)
واحد من المقبوض عليهم فى احداث أسيوط
كان المحامى محمود بسيونى
اللى أصبح فيما بعد نقيب المحامين لفترة ما
وكمان اتسمى على اسمه واحد من شوارع وسط البلد
(5)
مالطا لو تشوفوا بعض صورها .. جنة !
زمان كانوا بينفوا الناس يودوهم جزر
طبعا كان بيبقى الهدف عزلهم عن العالم
وان ميبقاش فيه مواصلات سهلة لحد يروحلهم وكدا
انما يخربيت الجمال .. تشوف المنظر تلاقيك بتسأل
رجعت ليه يا سعد لوجع القلب !!
(6)
هذا الشعب بقى اللى قبل ثورة 1919 كان ساكت
ومكبر دماغه قدر الممكن
ما يمكن تسميته بـ .. جيل ما بعد هزيمة الثورة العرابية
بنى نفسه من تانى وظهر من رحمه جيل شبابه نابض
وكباره مساندين وبدأت حركات مقاومة علنية وسرية
سلمية ومسلحة
وظلت الثورة لسنوات لحد ما غار الانجليز اخيرا
بعد سلسلة متواصلة من النضال
عمار يا مصر ...
على كل اللى شوفتيه ولسه هتشوفيه
بالشرفاء
ولأ
مش المواطنين الشورفاء عشان اكون محددة
مش المواطنين الشورفاء عشان اكون محددة
:)
خلاص خلصنا تصبحوا على ألف خير
-----------------------------------------
المتابعة علي تويتر غير
ردحذفرائعة 👏👏👏
ردحذف