اللى عاوز يعرف قيمة مصر كبلد فعلا
يبص ف التاريخ هيلاقى الاهتمام بيها كان كبير
وف أغلب الأوقات ولا يتوقف
مش بس سياسة وصراعات بسبب موقعها وخيرها
ولا حتى المكانة الدينية بوجود الازهر وغيره
وانما أضف العلوم .. الفنون ..
البهجة المصاحبة للحياة الاجتماعية بكل مظاهرها تقريبا
كل دى كان عناصر جذب
وعاوز تحس بعظمة هذا البلد على كل ما يفُعل به
اتفرج بس على كم اللوحات اللى رسمها الفنانين لمصر
بأدق التفاصيل وأقرى مذكرات الرحالة والشخصيات العامة
اللى عاشت ف مصر أى فترة من الفترات
شىء يدعو للفخر ويحسسك قد إيه مصر دى غالية
لولا النحس الدكر اللى ملازمها
من ضمن الناس اللى جت زمان واحد اسمه
لويجى ماير
Luigi Mayer
نص إيطالى نص ألمانى ..
تم ايفاده لمصر بتمويل من السفير البريطانى
المعتمد لدى تركيا السير روبرت أينسلي
الجدع زار مصر بعد رحيل الحملة الفرنسية
وقبل وصول محمد على للحكم بكام سنة
ورسم لوحات لمصر وتركيا والشام
وحط اللوحات دى ف مجلدات
واللوحات والأعمال دى
تم جمعها
واهدوها للمتحف البريطانى
ومع إن فيه رسامين أمهر منه وأكثر دقة وجمال .
الا ان شهروزة بتعز الراجل دا
بتحس كدا بالحميمية ف لوحاته ألطف ما فيها البشر
اللى لا تكاد لوحة تخلو منهم
وتحس انهم مرسومين بمحبة
غير ان لوحات ماير عن مصر توثيق لأماكن كتير فيها
ونبتدى الفرجة وافتحو الصور
واتفرجوا ع التفاصيل بإمعان يا عيال
مقياس النيل
قلعة صلاح الدين
وف الخلفية مئذنة مسجد قلاوون
قاعة يوسف وأعمدتها الشهيرة
القاعة دى تهدمت بالكامل وبنى مكانها مسجد محمد على
مسجد الربعميت عمود
اللوحة دى كنت فاكراها عن أحد مساجد اسكندرية
طلعت ف القاهرة ... مقلش اسم المسجد إيه ؟
يمكن يقصد جامع عمرو ؟!
لأنه تهدم بالكامل بعد رحيل الحملة الفرنسية ؟!!
المسجد دا كمان مقلش اسمه ولا المكان
شهروزة عمالة تضرب أخماس ف أسداس
وتقول دا ف الازبكية ؟ ولا ف شارع المعز ؟
ركزوا ف التابوت الفرعونى اللى تحت ف الشمال دا
عشان هنشوفه تانى
مسلة المطرية هنااااااك أهى
أبو الهول مطمورا لحد رقبته ف الرمل
الأهرامات
شايفين الرملة واصلة لحد فتحة الهرم الاكبر
ازاى عشان يعرفوا يدخلوا
الصياعة ادب والله
يدخلوا يعملوا إيه يا ترى .. ؟!!
اوعى يكونوا هيلطشوا حاجات ...
أهى دى أسئلة متتسألش ..
من فوق الهرم
أول نواة لمتحف للأثار فى بولاق
ولا تلاقيهم بيبعوها ولا حاجة .. مش بعيد !
التابوت تانى
وهما بيخرجوه تقريبا
وهما بيخرجوه تقريبا
أجمل لوحاته ف نظرى والمحببة لقلبى
ميدان الأزبكية وف الواجهة موكب احد البكوات يمر
وكمان الجزء الاخضر اللى ف النص دا كان بيتملى بالمية
بعد الفيضان والمراكب تمشى فيه
تدريبات المماليك فى حوش قصر مراد بك ... الأزبكية
رشيد
إحدى مقابر الاولياء فى رشيد .
حد يعرف يا ولاد لسه موجودة ولا لأ
فشلت الاقى حاجة عنها ف النت للأسف
إندثرت ولا إيه ؟؟
مسجد أبو مندور - رشيد
المسجد لسه موجود للآن
بس طبعا صابه ما أصاب
مسجد أصلباى ف الفيوم وغيرهم
كفر رضوان - القليوبية
منوف 1
منوف 2 ومش فاهمة ايه البتاع اللى فوق التل دا
برج حراسة ولا إيه ؟؟
برج حراسة ولا إيه ؟؟
فوة - كفر الشيخ
نزهة ف النيل فى منطقة مش قادرة افهم هيا ايه
اسمها
Ned Sili
فيه حفلة وهيصة ف نفس المنطقة دى
... Ned Sili
يتهيألى دا مولد لأحد الأولياء أو الأشخاص
والرسام مسمعش الاسم كويس ولا حاجة !
أحد البكوات وعلية القوم ومن خلفه خادمه
بصوا ع اللى تحت ورا حديد البكلونة كدا
أحد امراء المماليك
لقطة من الحريم
عمدة او شيخ بلد
أحد البدو والمدام بتاعته .. أظن الست باينة جدا
العوالم جم .. العوالم جم *بصوت الدكتور رأفت*
مشهد مصرى بأمتياز
ست بتغسل الهدوم ف الترعة
ست بتغسل الهدوم ف الترعة
والواد سلبوتة قاعد فوق دماغها
وواحد متحرش قاعد بيبص علي صدرها
بمناسبة اللوحة اللى فاتت .. المشهد دا كان متكرر وعادى
ان ست تكون مهتمة تغطى وشها لكن جسمها مكشوف
وجنود الحملة الفرنسية كانوا بيستغربوا
ان الواحدة من دول تبقى واقفة ع الترعة
ورجلها كلها باينة بينما اول ما تشوفه
تروح مغطية وشها بالطرحة
واللى هوه جالهم صدمة بسبب التناقض دا
اسكندرية الماريا خليناها للأخر
واضح انه قعد فيها مدة طويلة
وعجبته ورسم اكتر من حتة منها
..
بوابة رشيد احدى بوابات المنتشرة
على سور الأسكندرية
اللى كان بيحاوطها لحمايتها من الغزو والغرباء
أحد المساجد بالقرب من بوابة رشيد - الأسكندرية
مسجد النبى دانيال القديم
وبالقرب منه عواميد الرخام المتبقية
من الأسكندرية القديمة
عمود السوارى
من خلفه سور الاسكندرية
عمود السوارى من بعيد
وف الواجهة قنطرة للعبور من جهة للتانية
مسجد النبى دانيال من زاوية مختلفة
بصوا والنبى الست اللى نايمة على الجنينة جنب الراجل
منظرها لطيف قوى
قاعدة بأريحية
عمار يا اسكندرية والله
المقابر دى ف كوم الشقافة على ما أظن
تحت عمود السوارى
إبرة كليوباترا
اللى اخدوها الامريكان بعدين
إبرة كليوباترا من ناحية البحر ..
نفس المشهد السابق بس
بعد بتاع 70 او 80 سنة
حمامات كليوباترا
ما تبقى من حطام مكتبة الأسكندرية
واخيرا مشهد للأسكندرية والجزء الحديث منها
من بعيد قلعة قايتباى وبها المئذنة العالية
اللى صمدت امام الفرنسيس
ولكنها تحطمت تماما مع الاجزاء العلوية للقلعة
بعد أن قصفها الانجليز بكل عنف قبيل احتلالهم الاسكندرية
ثم مصر كلها سنة 1882
خلاص خلصنا
تصبحوا على ألف خير
تصبحوا على ألف خير
-------------------------------
- حسب المقالة دى http://almasalla.travel/255242/ المسجد دا ف قلعة الكبش بالسيدة زينب والتابوت دى يبقى "الحوض" المرصود الشهير اللى بعد رحيل الحملة الفرنسية بقى من نصيب انجلترا ف المنهوبات والمقالة فيها إشارة لدراسة علمية عملتها الجميلة @Radwazaky ف لوحات الرسام دا تحديدا
- عن الكلمة الغريبة اللى مفهمنهاش .. تفسير ألمعى من صاحب مزرعة المكرونة العزيز https://twitter.com/justin_C4se/status/1157807556984745984 …
- أنا منشحكة جدا من المنشنات يا عيال .. يعنى فيه اهتمام بتفاصيل قد يستعجب لها البعض ويقول تفرق إيه لو عرفتوا يعنى ! بس بجد ممتنة لوجودى وسطكم
ليست هناك تعليقات:
إرسال تعليق