نحكى حدوتة صغننة
عن أدبيات القباحة عند المصريين
كلنا عارفين ان الخديوى عباس حلمى التانى
أول ما قعد على الأريكة الخديوية
وهوه عامل ثورى وضد الانجليز وواخداه الجلالة
لحد ما ادوله فوق دماغه وعرفوه حجمه
فأنهمك ف لم الفلوس والتجارة
وتكنيز الثروة واياكش تولع
وقتها انصب تركيزه على إرضاء السلطان العثمانى
عشان يفضل على أريكته
ويعرف يرص الفلوس اكوام اكوام ف الفسحة
روح يا زمان وتعالى يا زمان
واحنا دلوقتى سنة 1914م لما بوادر الحرب
العالمية الاولى تظهر فتركيا تاخد صف الالمان
ف العركة دى فانجلترا تنتهز الفرصة
وتقول للتراكوة باى باى ملكوش ف هذا البلد
أى حاجة ووضعت مصر تحت الحماية البريطانية
وهيا الحماية فرقت كتير عن الاحتلال
اللى تم من 1882 يعنى ؟!
الحقيقة فرق ف حاجات
منها ان الانجليز وصلت بيهم الوقاحة
انهم يخلعوا خديوى مصر باعتباره
"منضم لأعداء انجلترا"
بصفته خادم لرغبات السلطان العثمانى وتركيا وكدا
قوم ايه ف ديسمبر هيطلعوا اعلان بعنوان
التغيير العظيم
هيبصوا ف الأسرة العلوية يلاقوا أكبرهم سنا
هو .. الامير حسين كامل
عم عباس واللى عرضوا عليه المنصب
فتلكأ قليلا بسبب ضغوطات من الأسرة
لكن ما أن لوحت بريطانيا انها هتجيب حد
أى حد
انشالله من خارج مصر لتولى المنصب
حتى وافق سريعا وبقى سلطان مصر
ولغى الانجليز الخديوية عشان يقطعوا السكة
على عباس حلمى التانى نفسه
أو على ابنه ليرجع ف يوم يطالب بالعرش ولا حاجة ... !
وحسين جاتله السلطة بعد سن الستين
ولا كان يتوقعها اساسا
بموجب الفرمان اللى اخده اسماعيل من الأستانة
وفيه بيورث العرش لذريته فقط .. أكبر الذكور
حسين قعد يشوف توفيق اخوه الاكبر خديوى ثانى
ثم عباس حلمى ابن توفيق خديوى ثالث
وفجأة وقعت ف حجره
فكلبش فيها
لكن على مين ؟!!
هوه قعد بتاع سنتين و9 اشهر بس ف المنصب
وشاف الويل ببتاع تلاتين سنة مثلا
اولا الانجليز تلاعبوا بيه
وفهموه من اولها حدوده فين وانه طيشة
وانهم يقدروا يشيلوه أى قت الخ
اما عن الشعب بقى
فالناس كرهته ف البداية وعاملته معاملة وحشة
وتم معارضته بمسيرات ومظاهرات
ومحاولتين فاشلين لاغتياله !
والجماعة الوطنية والمعارضة شرشحتله
واتهمته بالخيانة وانه وافق على خلع خديو مصر
الراجل عبثا يشرح انه حاول يحتفظ بالمنصب دا
لحين عودة الخديوى فعلا
لكن الكلام دا مخلش ع الناس
وان كان يشاع ان حسين كامل كان مصدق كدا فعلا !
وسبحان الله قبل الحكاية دى
كان محبوب من العوام جدا
خصوصا انه كان بيحب الارض والفلاحة
وكان مشهور بمحاولاته لتحسين احوال فلاحين دايرته
وكانوا بيلقبوه بالـ
"العمدة"
و
"أبو الفلاح"
جت حركة خلع الخديوى دى وبوظت الدنيا
الناس ف المظاهرت بقت تهتف ضد السلطان
ليس حبا فى عباس وانما كرها فى الإنجليز
من الهتافات الشهيرة
الله حى .. عباس جى
والهتاف له تكملة
الله حى
عباس جى
ضرب البومبة
فى (...) العمدة
وهوه جاى
............
عباس : الخديوى
عباس : الخديوى
العمدة : حسين كامل
طب ايه معنى ؟
(...)
قول انتا بقى
وطبعا التلت نقط دول ممكن يعملوا حيرة كبيييرة
للى ميعرفش التراث المصرى العريق
يعنى ممكن تبقى
راس .. عين .. إيد ... رجل .. بطن .. ضهر .. أظؤظة
والراجل الكُبرة بقى يسمع شتيمته بودنه
ويروح القصر ياخد بالجزمة م الانجليز
ومبقاش عارف يروح فين وييجى منين
وعلى ما خف الهجوم عليه من رجل الشارع شوية
كان خلاص بيفيص وركبته الامراض كلها
و قبل ما يتم 3 سنين حكم
ربنا اخده
وريحه وريحنا
فى فترة مرضه الاخيرة ندهوا ابنه
وقالوله هتاخد مكان أبوك
قالهم ف شبشبى ورفض العرش المهين دا
وكان راجل صحيح
راحوا جايبين الصايع القارح
احمد فؤاد
أصغر اولاد الخديوى اسماعيل
وقالوله هتمسكها انتا واحنا نامر وننهى
وانتا حدودك ان العرش يتورث لأبنك
فقالهم أبيع يا باشا .. أبيع
والحدوتة خلصت
والعبرة منها تتلخص ف إنه
طول عمرنا شعب لسانه فرقّلة .. ميسترش
واللى يقولك فين أيام الزمن الجميييييل
والألفاظ اللى معرفش إيه
قوله معلشى
اصلك مسمعتش الهتاف ضد السلطان
اصلك مسمعتش الهتاف ضد السلطان
تلاقيك كنت مسافر ساعتها ولا حاجة
المصدر : تأملات فى ثورات مصر .. ثورة 1919
المؤلف : محمد عبدالفتاح أبو الفضل
الناشر : مكتبة الأسرة
السعر : 6,5 جنيه
وخلاص خلصنا
----------------------------------
- بمناسبة مكتبة الأسرة ... لقيت عندهم كتاب تباريح جريح .. مجموعة مقالات للعم صلاح عيسى بـ 17 جنيه ويا بلاش لو ف دار نشر تانية ولا 100 جنيه ع الأقل اشتروا من الهيئة المصرية العامة للكتاب يا عيال دى فلوسنا وحقنا .. دى أخر حاجة مدعومة للمواطن تقريبا .. روح واشترى نسختك
ليست هناك تعليقات:
إرسال تعليق